Yeremia
14 Eni tie lembe pa Yehova m’ubino i bang’ Yeremia pi koth m’ukang’:
2 Yuda ubewak man dhugang’ pare unyothere.
Gimwony i ng’om ma givoc,
Man wak ubeidho malu niai kud i Yeruzalem.
3 Man rwodhi migi uoro jutic migi* ucidh utwom pii.
Gicidho i bang’ vuj pii* ento giwok ginwang’u ngo pii.
Gidwogo kud agulu migi ma iye nanu.
Lewic umakugi man cwinygi utur,
E giumo wigi.
4 Calu ma ng’om ukak,
Pilembe koth ukang’ i ng’ombe,
Jurufur uvoc man giumo wigi.
5 Kadok min ruda mi lum de uweko nyathinne m’eai enyolo,
Pilembe lum umbe.
6 Kana mi lum ucungo iwi ungulu gudi* ma lelele.
Gibeng’wiyo yamu calu utho;
Wang’gi ucido pilembe lum umbe.
7 Kadok nwang’u dubo mwa ubetuco lembe i kumwa de,
Ee Yehova, tim lembe pi nyingi.
Kum kosobedoleng’ mwa udaru sagu,
Man wadubo iri.
8 Ee genogen mir Israel, Jalarne i saa mi masendi,
Pirang’o i calu jawirok i ng’ombe,
Calu jawotho ma robo pi nivuto diewor acel kende?
9 Pirang’o itie calu ng’atu m’ubezungo lembe,
Calu jarukara ma copo larujo ngo?
Kum in’i kindwa, Ee Yehova,
Man nyingi ulwong’ere i kumwa.
Kud iwekwa timba.
10 Yehova uwacu pi dhanu maeni kumae: “Gimaru niwotho swa; gicero ngo tiendgi. Pieno anyong’a nego ngo Yehova i kumgi. Kawoni ebipoy pi kosa migi man ebikwayu giwodh wel pi dubo migi.”
11 I ng’eye Yehova uyero ira kumae: “Kud irwo nia lembe uwoth ma ber ni dhanu maeni. 12 Saa ma gibekwiro cam, awinjo ngo kwac migi, man saa ma gibethiero lam m’awang’a ma boo man girathiera mi nying cam, anyong’a nega ngo i kumgi; kum abinegogi ku palamularu, ku ndru man ku thong’om.”
13 E ayero kumae: “Akaa, Ee Rwoth Ubimo ma Malu Ngbir Yehova! Nen, jubila gibeyero igi kumae: ‘Wubineno ngo palamularu man ndru de bipodho ngo i wiwu, ento abimiyo iwu kwiyocwiny mandha i kabedo maeni.’”
14 Yehova ugam uyero ira kumae: “Jubilane gibeewo lembila mi ndra ku nyinga. Aorogi ngo, gin m’ang’olo igi mbe, kadi aweca de aweco ngo i bang’gi. Gin ma wok i wang’ mi ndra, ewolembe ma tije mbe man vupo mir adundegi re ma gibeewo iwu. 15 Pieno, maeni tie lembe ma Yehova uwacu pi jubila m’ubeewo lembila ku nyinga ma ke aorogi ngo, man m’ubeyero nia palamularu kadi ndru moko mbe ma bipodho i ng’ombuni: ‘Jubilane gibitho ku palamularu man ndru. 16 Dhanu ma gibeewo igi lembilane de jubibayugi i gengi mi Yeruzalem, pilembe gibitho nikum ndru man palamularu, ma ng’atu moko mbe ma bikunyogi, gin, mon migi, wotgi man nyiggi, pilembe abikonjo nyoth ma giromo ko i wigi.’
17 “Icikiri niyero igi kumae:
‘Wek piwang’a ucwir dieceng’ ku diewor, kud githum,
Kum jurungo man juturo i dhanu para ma sumba tup
Ku rem ma rac mandha.
18 Tek awok woko i podho,
Aneno dhanu ma junego ku palamularu!
Man tek adwogo i adhura de,
Aneno dhanu m’utwoyo nikum ndru!
Kum jabila ku jalam ceke giciwotho i ng’om ma ging’eyo ngo.’”
19 Nyo dong’ ikwero Yuda magwei, kunoke nyo dong’ idagu* Sayuni ku raci?
Pirang’o igoyowa uketho wabekey ungo?
Wabino geno kwiyocwiny, ento lembe ma ber moko mbe m’utundo,
Wabino geno keyokum, ento ndiri re m’utie!
20 Wayiyo racu mwa, Ee Yehova,
Man kosa pa kwaruwa,
Kum wadubo iri.
21 Pi nyingi, kud ikwerwa;
Kud icay komker peri ma dwong’.
Poy i kum lembariba peri m’itimo kudwa man kud iture.
22 Nyo i kind ayi gin m’acwiya ma tijgi mbe mi thek, moko tie de ma romo miyo koth,
Kunoke nyo polo copo ng’iyo en gire nia ecor kothi?
Nyo utie ngo ini kendi, Ee Yehova Mungu mwa?
Man wageno in,
Kum ini kendi re m’itimo gin maeni ceke.