Yeremia
13 Yehova uwacu ira kumae: “Cidh ing’iew iri mukaba mi bongu ma nwang’ man itwiye i pieri, ento kud iroye i pii.” 2 E ang’iewo mukaba calu ma Yehova uyero, man atwiye i piera. 3 Lembe pa Yehova ubino i bang’a wang’ mir arionde, uyero kumae: 4 “Ting’ mukaba m’ing’iewo man m’itwiyo i pieri man ai malu icidh i Efrath, man iwok ikane kuca i odicana.” 5 E acidh akane i dhug Efrath, tap calu ma Yehova ung’olo ira.
6 Ento nindo dupa i ng’eye, Yehova udog uyero ira kumae: “Ai malu icidh i Efrath man iwok iting’ mukaba m’agam ang’olo iri nia icidh ikan kuca.” 7 E acidho i Efrath man awok agolo mukabane man ating’e ku kaka ma nwang’u akane i iye. Anwang’u nia mukabane udaru nyothere, tije mbe nyanok de.
8 I ng’eye, lembe pa Yehova ubino i bang’a: 9 “Yehova uwacu kumae: ‘Abinyotho doro mi Yuda man doro ma hai mi Yeruzalem i ayi ma rom eno. 10 Dhanu maeni ma reco m’ukwero niworo wec para man m’ubelubo tok adundegi ku thwon, m’ubelubo tok mungu mange, m’ubetimo igi man m’ubekulo korgi piny igi bidoko tap calu mukaba maeni ma tije mbe acel de.’ 11 ‘Kum tap calu ma mukaba moko i pier ng’atini, e aketho ot mir Israel man ot mi Yuda zoo umoko i kuma,’ Yehova wacu, ‘kara gibed ira ni dhanu, ni nying’, ni pak man ni piny ma leng’. Ento giworo ngo.’
12 “Icikiri nimiyo igi bende lemkwenda ma e: ‘Yehova Mungu mir Israel uwacu kumae: “Jucikiri nipong’o agulu ceke ma dongo ku pigulok.”’ Man gibidwoko iri kumae: ‘Iparu nia wang’eyo ngo ya jucikiri nipong’o agulu ceke ma dongo ku piguloki?’ 13 E iyer igi kumae: ‘Yehova uwacu kumae: “Nen, abepong’o dhanu ma bedo i ng’ombuni zoo ku mero, jubim ma jany iwi komker pa Daudi, julam ku jubila, man dhanu ceke ma bedo i Yeruzalem. 14 Man abirungogi, ng’atuman i kum wadi, wego ku wot i ayi ma rom,” Yehova wacu. “Ngisi binega ngo kadi can man kisa binega ngo nyanok de i kumgi. Gin moko mbe ma bicera ku nyothogi.”’
15 Wuwinji man wucik ithwu.
Kud wukethuru, pilembe Yehova daru weco.
16 Wumii dwong’ ni Yehova Mungu mwu
Ma fodi ekelo ngo mudho,
Man ma fodi tiendwu ukier ungo iwi gudi saa ma piny ugamere.
Wubigeno der,
Ento ebikelo piny ma col bii;
Ebiloke ni mudho ma bii.
17 Man tek wukwero niwinjo,
Abiwak* i amung’ nikum doro mwu.
Abiwak lee man piwang’a bicwir lee mandha,
Pilembe judaru tero dwol pa Yehova i ng’eca.
18 Yer ni ubimo man ni min ubimo* kumae: ‘Wubed i kabedo ma piny magwei,
Kum jamker mi wic mwu ma leng’ bipodho kud i wiwu.’
19 Juciko* dhug adhura ma yo piny, ma ng’atu moko mbe ma romo yabugi.
Jutero Yuda zoo i ng’eca, jutero gin kpo i ng’eca.
20 Ting’ weng’i man inen ju m’ubebino niai ku yo malu.
Udul lim ma jumiyo iri, rombe peri ma beco ni kani?
21 Ibiyero ang’o saa ma matira peri
Biai i bang’ ju ma saa ceke ibed ikwanu ni jurimbi ma ceng’ini?
Nyo moc bigoyi ngo calu dhaku m’ubegonyere?
22 Man saa m’iyero i adundeni kumae: ‘Lembe maeni uwok i wiya pirang’o?’
Utie nikum dubo peri ma dit re m’uketho juthumo dhu tiend kendi peri
Man iwinjo litho ma lee i tok tiendi.
23 Nyo Jakuc* copo loko dend kume kadi ng’uu copo loko kume ma kwici kwici?
Kan ecopo loko, nen wun de wucopo timo lembe ma ber,
Wu ju ma juponjowu ku timo racu.
24 Pieno abilalu iwu calu soka ma yamu mi langa ulalu iye.
25 Eni tie maka peri, thenge m’apimo iri,” Yehova wacu,
“Pilembe iwil kuda man ibegeno peri ndra.
26 Pieno abidolo dhu kendi peri nitundo i weng’i,
Man lewic peri binen,
27 Timo peri mir abor,* man ayiri peri,
Asara peri ma rac* no.
Aneno timo peri ma judagu
Iwi ungulu gudi,* i lum.
Can i wii, Ee Yeruzalem!
Ibibedo m’icido nitundo awene?”