Yeremia

33 Lembe pa Yehova ubino i bang’ Yeremia wang’ mir arionde, nwang’u fodi jutwiyo bang’e asu i Lela mi jukur, uyero kumae: 2 “Eni tie lembe ma Yehova ma Jacwii ng’om uyero, Yehova m’ung’ine man m’uketho ecungo ma tek; Yehova tie nyinge: 3 ‘Lwong’a, e abigamu dhogi, man abibedo ayika ninyutho iri lembe ma dongo ma juromo nyang’ ungo i iye m’ing’eyo ngo.’”

4 “Kum eni tie lembe ma Yehova Mungu mir Israel uyero pi udi mir adhura maeni man udi mi jubim mi Yuda ma jurwombo nikum gang’ ma tek ma jutieko kogi man palamularu, 5 man pi ju m’ubebino nikiedo i dhu Jukaldayo, m’ubepong’o kabedo maeni kud avuj ju m’anego ku dhu ng’eicwiny man kwinyo para, ju ma timo migi ma reco uketho akanu wang’a ni adhura maeni: 6 ‘Nen, abidwoko kume leng’ kendo, abidaru twoyo pare, man abikeyo kumgi, abimiyo igi kwiyocwiny ma dwong’ man lemandha. 7 Man abidwogo dhanu mi Yuda ku mir Israel ma jutero i ng’eca, man abidogierogi calu m’alar atimo i acaki. 8 Abidwokogi leng’ nikum kier ceke ma n’i wigi pi dubo ma gitimo ira, man abiweko igi kier ceke ma n’i wigi pi dubo migi ku kosa ma gitimo ira. 9 Man ebidoko ira ni nying’ ma nyayu anyong’a, pak man leng’o i wang’ thek ceke mi ng’om ma biwinjo pi bero ceke m’atimo igi. E ndiri bimakugi man kumgi bimiel pi bero ceke man kwiyocwiny m’abimiyo ire.’”

10 “Yehova uwacu kumae: ‘I kabedo maeni ma wubiyero nia tie ng’om ngele, ma dhanu kadi udul lim de mbe i iye, i adhura mi Yuda man i gengi mi Yeruzalem m’udong’ ni uvuru, ma dhanu kadi jubedo kadi udul lim umbe i iye, jubiwinjo kendo 11 dwal mir anyong’a man dwal mi foc, dwand cwar mugole man dwand nyamugole,* dwal mi ju m’ubeyero kumae: “Wudwok foyofoc ni Yehova mir udul, pilembe Yehova e ber; mer pare ma lokere ngo bedo rondo ku rondo!”’

“‘Gibikelo girathiera mi dwoko foyofoc i ot pa Yehova, kum abidwogo dhanu mi ng’ombe ma jutero i ng’eca, calu mir acaki,’ Yehova wacu.”

12 “Yehova mir udul uwacu kumae: ‘I ng’om ngele maeni ma dhanu kadi udul lim umbe i iye man i adhurane ceke, luba bibedo nuti kendo ma jukwac biketho udul lim migi biyom i iye.’

13 “‘I adhura mi ng’om gudi, i adhura ma yor i poga, i adhura ma yo piny, i ng’om pa Benjamin, i kabedo m’utieko Yeruzalem, man i adhura pa Yuda, udul lim bikadhu kendo i the cing’ ng’atu m’ubekwanugi,’ Yehova wacu.”

14 “‘Nen! nindo bebino,’ Yehova wacu, ‘m’abipong’o i iye lembe ma ber m’ang’olo ni ot mir Israel man ni ot mi Yuda. 15 I rundi maeca man i nindo maeca, abiketho jang yen* ma pwe biloth ni Daudi man ebiketho pokolembe m’atira ku bedopwe bitimere i ng’ombe. 16 I rundi maeca, jubibodho Yuda man Yeruzalem bibedo museme. Man jubilwong’e ku nying’ ma e: Yehova tie bedopwe mwa.’”

17 “Kum Yehova uwacu kumae: ‘Saa ceke komker mi ot pa Israel bikoso ngo ng’atu ma bibedo i wiye m’uwok kud i thekwaru pa Daudi, 18 kadi i kind julam ma Julawi de ng’atu acel bibedo nuti kwa ma bibecungo i wang’a pi nithiero lam m’awang’a ma boo, pi niwang’u girathiera mi nying cam, man pi nithiero lam.’”

19 Man lembe pa Yehova ubino kendo i bang’ Yeremia, uyero kumae: 20 “Yehova uwacu kumae: ‘Nyo wuromo turo lembariba para m’aketho pi dieceng’ man lembariba para m’aketho pi diewor, pi nicero dieceng’ ku diewor kud urom i saa migi m’ukethere? 21 Ungo. Kumeno bende, gin moko mbe ma romo turo lembariba para m’atimo ku Daudi man ma romo cere nibedo ku nyathin m’ubim iwi komker pare, man bende gin moko mbe ma romo turo lembariba para m’atimo ku julam ma Julawi, ma gi jutic para. 22 Tap calu ma jucopo kwanu ngo wend udul mi polo man nying’ kwiyo mi nam de copo pimere ngo, abinyayu bende nyikway* Daudi ma jatic para man Julawi m’ubetimo ira de kumeno.’”

23 Lembe pa Yehova ubino kendo i bang’ Yeremia, uyero kumae: 24 “Nyo iwinjo ngo lembe ma dhanu maeno ubeyero nia, ‘Yehova bikwero juruot ario m’eng’iyo’? Gibecayu dhanu para ma dhe, man gibenenogi ngo dong’ ni thek.

25 “Yehova uwacu kumae: ‘Tap calu m’aketho lembariba para m’atimo pi dieceng’ ku diewor, cik* mi polo man mi ng’om ucungo andha ma tek, 26 kumeno bende abikwero ngo nyanok de nyikway Yakobo man nyikway Daudi ma jatic para, man gin moko mbe ma bicera ku ting’o nyikwaye pi niketho gibim iwi nyikway* Abraham, Isak man Yakobo. Pilembe abidwogo dhanu migi ma jutero i ng’eca man kisa binega i kumgi.’”