Yeremia
38 Man Cefathia ma wod Matan, Gedalia ma wod Pacur, Yukal ma wod Celemia, man Pacur ma wod Malkiya giwinjo lembe ma Yeremia ubino yero ni dhanu ceke kumae: 2 “Yehova uwacu kumae: ‘Ng’atu ma bidong’ i adhura maeni bitho ku palamularu, ndru man thong’om. Ento ng’atu ma bimiyere i cing’* Jukaldayo bidong’ kwo man ebibodho kwo pare, e ebikwo.’ 3 Yehova uwacu kumae: ‘Jubimiyo adhura maeni andha i cing udul mony p’ubimo mi Babeli, man ebimake.’”
4 Judongo ma wijo giyero ni ubimo kumae: “Timba keth juneg jalwo e cen, pilembe ebeturo cwiny* juaskari m’udong’ i adhura maeni man bende cwiny dhanu ceke ku lembe m’ebeyero igi. Kum jalwo maeni ubesayu kende kende nyoth mi dhanu maeni, ento kwiyocwiny migi re ngo.” 5 Ubimo Zedekia udwoko kumae: “Wunen! En’i cingwu eno, pilembe ubimo copo timo ngo gin moko pi nicerowu.”
6 E giting’o Yeremia man gibole i vuj pii pa Malkiya ma wod ubimo m’ubino i Lela mi jukur. Giloro Yeremia ku thol. Nwang’u pii ubino mbe i vuje, usabu re ma n’i iye; man Yeremia ucaku mwony i usabune.
7 Ebed-melek ma Jaethiopia ma jatic mi kal p’ubimo uwinjo nia jubolo Yeremia i vuj pii. Nwang’u ubimo ke ubedo pare i Dhugang’ pa Benjamin. 8 Ebed-melek ugam uwok kud i kal p’ubimo man ecidh eweco kud ubimo, eyero kumae: 9 “Ee rwoth ubimo, gin ma dhanu maeni gitimo i kum jabila Yeremia tie rac dit! Gibole i vuj pii man ebitho kuca, pilembe mukathi mbe m’udong’ i adhura maeni.”
10 E ubimo ung’olo ni Ebed-melek ma Jaethiopia kumae: “Gam jumaco pier adek ma ni keni, man wucidh uwodh jabila Yeremia kud i vur ma fodi etho ngo.” 11 Pieno Ebed-melek ugamu jumaco man ecidho karacelo kugi i kal p’ubimo i the kakanpiny. Giting’o dund bongu moko m’utii kud asamba bongu keca man gilorogi ku thol i bang’ Yeremia i vur. 12 I ng’eye, Ebed-melek ma Jaethiopia uyero ni Yeremia kumae: “Wakweyi, keth bongu m’utii kud asamba bongu no i the yothi man keth thol ukadh kud i wigi.” Yeremia utimo tap kumeno. 13 E gipeyo Yeremia ku thol man giwodhe kud i vuj pii. Man Yeremia umedere nibedo i Lela mi jukur.
14 Ubimo Zedekia uoro jucidh julwong’o jabila Yeremia ubin i bang’e i dhu kamondo mir adek mi ot pa Yehova, man ubimo yero ni Yeremia kumae: “Abemito akepenji ku lembe moko. Kud imung’ ira gin moko acel de.” 15 E Yeremia uyero ni Zedekia kumae: “Tek anyutho iri, ibinega andha. Man tek amiyo iri juk de, ibiwinja ngo.” 16 Ubimo Zedekia ukwong’o kwong’ i amung’ ni Yeremia, eyero kumae: “Calu andha Yehova bedo kwo, en m’emiyo iwa kwo maeni,* abinegi ngo man abimiyi ngo i cing’ dhanu maeni m’ubeyenyo nikabu kwo peri.”*
17 Yeremia ugam uyero ni Zedekia kumae: “Yehova Mungu mir udul ma Mungu mir Israel uwacu kumae: ‘Tek imiyiri i cing’* judongo ma wijo p’ubimo mi Babeli, e kwo peri biboth,* adhura maeni de jubiwang’u ngo ku mac, man in ku juruot peri de wubiboth. 18 Ento tek ikwero nimiyiri i cing’* judongo ma wijo p’ubimo mi Babeli, e jubimiyo adhura maeni i cing’ Jukaldayo man gibiwang’e ku mac, in de ibiboth ungo kud i cing’gi.’”
19 E Ubimo Zedekia uyero ni Yeremia kumae: “Abelworo Juyahudi m’uringo pi nicidho i bang’ Jukaldayo, pilembe tek jumiya i cing’gi ci, giromo tima rac mi tuko ngo.” 20 Ento Yeremia udwoko ire kumae: “Gibimiyi ngo i cing’gi. Akweyi, wor dwand Yehova man itim lembe m’abeyero iri, e lembe biwotho ber iri man ibimediri nibedo kwo. 21 Enre tek ikwero nimiyiri, kewinj lembe ma Yehova unyutho ira e: 22 Nen! jubewodho mon ceke m’udong’ i ot* p’ubimo mi Yuda woko i bang’ judongo ma wijo p’ubimo mi Babeli man gibeyero kumae:
‘Co m’igeno* uwondi man uvoyi.
Giketho tiendi nyang’ i usabu.
Gin ke gilund giloko man gidok ku ng’eygi.’
23 Jubewodho mon peri man woti ceke i bang’ Jukaldayo man ibiboth ungo kud i cing’gi; ubimo mi Babeli bimeki man ebiwang’u adhura maeni ku mac piri.”
24 Zedekia ugam uyero ni Yeremia kumae: “Kud iketh ng’atu moko ung’ey pi lembuni kara kud itho. 25 Man tek judongo ma wijo giwinjo nia aweco kudi, man gibino i beng’i, giyero iri nia ‘wakweyi, kekor iwa lembe m’iyero ni ubimo. Kud imung’ iwa gin moko, e wabinegi ngo. Ubimo yero iri ang’o?’ 26 Icikiri nidwoko igi kumae: ‘Abino kwayu ubimo nia kud edwoka i ot pa Yehonathan, amaru tho kuca.’”
27 I ng’ey kare, judongo ma wijo ceke gibino i bang’ Yeremia man gipenje ku penji. Ekoro igi lembe ceke m’ubimo ung’olo ire nia eyer. E gimedo ngo lembe mange, pilembe ng’atu moko mbe m’uwinjo lembe ma giweco i wiye. 28 Yeremia umedere nibedo i Lela mi jukur nitundo i nindo ma jumaku i iye Yeruzalem; saa ma jumaku Yeruzalem nwang’u etie asu keca.