Lembrieko
31 Wec p’Ubimo Lemuel, lembe ma pek ma min uyero ire pi niponje:
2 Ukwayu ayer iri ang’o, Ee woda,
Ayer iri ang’o, Ee wod m’i iya,
Man ayer iri ang’o, Ee wod mi lembang’ola para?
3 Kud imii tego peri ni mon,
Kadi kud ilub yo ma nyotho jubim.
4 Etie ngo ni jubim, Ee Lemuel,
Etie ngo ni jubim nimadhu pigulok
Kadi ni jutelwic niwacu kumae: “Giramadha para ni kani?”
5 Kara kud gimadhi man wigi wil i kum gin m’ukethere
Man ginyoth twero mi ju ma ka kitgi mbe.
6 Mii kong’o ni ju ma gibecitho
Man pigulok ni ju ma gin’i can ma kec.*
7 Wek gimadhi man wigi wil i kum can migi;
Man dong’ kud gipoy ki i kum masendi migi.
8 Wec pir ajuba;*
Cer bang’ dhanu ceke ma gibecitho.
9 Weci man pok lembe ku bedopwe;
Cer bang’ twero mi dhanu ma ka kitgi mbe man mi jucan.
א [Alef]
10 Ng’a ma copo nwang’u dhaku m’uromo?*
Valer pare ukadhu valer pa korai* bor dit.
ב [Beth]
11 Cware gene kud adundene ceke,
Ekoso ngo gin moko ma pire tek.
ג [Gimel]
12 Etimo ire lembe ma ber, ento lembe ma rac ungo
I nindo ceke mi kwo pare.
ד [Daleth]
13 Enwang’u yuk rombe man bongu ma nwang’;*
Anyong’a nege nitimo tic ku cinge.
ה [He]
14 E calu meli mi jukuloka,
Eyeyo cam pare niai ku bor.
ו [Waw]
15 Bende eai ma fodi piny uru ngo,
Emiyo cam ni juruot pare
Man makapiny ni jutic pare ma nyir.
ז [Zayin]
16 Eketho wiye i kum podho moko man eng’iewe;
Epidho podho mir ulok kud adwogi mi tic mi cinge.*
ח [Heth]
17 Eyikere gire pi tic ma tek,*
Man edwoko bote tek.
ט [Teth]
18 Eneno nia kuloka pare tie kud adwogi ma ber;
Thala pare tho ngo ku diewor.
י [Yod]
19 Cinge maku jam cwiyo kendi,
Man gimaku yen mi riwo wuzi.*
כ [Kaf]
20 Ethang’u cinge ni ng’atu ma ka kite mbe,
Man eyabu cinge ni jacan.
ל [Lamed]
21 Cwinye pido ngo pi juruot pare i saa pa pei,
Kum juruot pare ceke gikendiri ku kendi ma mor.*
מ [Mem]
22 Eyiko jam umo kavuto pare gire.
Ekendere ku bongu ma nwang’ man mi yuk urombo mi rangi m’uluga.
נ [Nun]
23 Jung’eyo cware cuu i dhugang’ mir adhura,
Kaka m’ebedo i iye i kind judongo mi ng’om pare.
ס [Samek]
24 Eyiko bongu ma nwang’* man elworogi
Man elworo mukaba ni jukuloka.
ע [Ayin]
25 Eronyere ku tego man leng’o,
Man eneno anyim ku tegocwinye.*
פ [Pe]
26 Eyabu dhoge ku rieko;
Cik mi bero* n’i wi lebe.
צ [Tsade]
27 Eneno wi tic mi ot pare,
Man ecamu ngo cam* mi nyap.
ק [Kof]
28 Nyithindho pare giai malu man gilwong’e jamutoro;
Cware ai malu man epake.
ר [Rec]
29 Mon ma giromo* gi dupa,
Ento in ikadhugi ceke.
ש [Cin]
30 Leng’wang’ copo wondo wang’jo, man leng’o de kakare copo kadhu,*
Ento jubipaku dhaku ma lworo Yehova.
ת [Taw]
31 Wumii ire sukulia pi gin m’ebetimo,*
Man wek tic pare upake i dhugang’ mir adhura.