Yeremia

39 I oro mir abung’wende mi camuker p’Ubimo Zedekia mi Yuda, i dwi mir apaje, Ubimo Nebukadnezar* mi Babeli kud udul askari pare ceke gibino i Yeruzalem man gitieke.

2 I oro mir apar acende mi camuker pa Zedekia, i dwi mir ang’wende, i nindo abung’wen mi dwije, gituco gang’ mir adhura. 3 Judongo ma wijo ceke p’ubimo mi Babeli gimondo man giwok gibedo i Dhugang’ mi diere, niwacu Nergal-carezer ma Samgar, Nebosarsecim ma Rabsaris,* Nergal-carezer ma Rabmag* man dong judongo ma wijo ceke p’ubimo mi Babeli.

4 Saa m’Ubimo Zedekia mi Yuda ku juaskari ceke ginenogi, e giringo, giwok kud i adhura ku diewor man gicidho kud i gengi mi podho p’ubimo, gikadhu kud i dhugang’ ma n’i kind gang’ ario man gimediri kud i yo mir Araba. 5 Ento udul mony mi Jukaldayo uriemo tokgi man giwok girubo Zedekia i pambu mi langa mi Yeriko. Gimake man gikele i bang’ Ubimo Nebukadnezar* mi Babeli i Ribla i ng’om mir Hamath, kaka m’ubimo uwok upoko i iye lembe i wiye. 6 Ubimo mi Babeli uketho junego wot Zedekia i wang’e keca i Ribla man ubimo mi Babeli uketho junego dhanu mir awora ceke mi Yuda. 7 Egam eloyo wang’ Zedekia kan i ng’eye etwiye ku kongo mi mola pi nitere i Babeli.

8 I ng’eye Jukaldayo uwang’u ot* p’ubimo ku udi mi dhanu man girwombo gang’kidi mi Yeruzalem. 9 Nebuzaradan ma jadit mi jukur utero dong dhanu ma nwang’u udong’ i adhura i ng’eca i Babeli, ju ma gipiey giringo i bang’e man dhanu ceke m’udong’.

10 Ento Nebuzaradan ma jadit mi jukur uweko dhanu moko ma jucan ma ngolo ngolo i ng’om mi Yuda, ju m’ubino mbe ku piny moko acel de. I nindo maeca emiyo igi podho mir ulok man podho ma gitim tic i iye.*

11 Ubimo Nebukadnezar* mi Babeli ugam umiyo ng’ol ma e ni Nebuzaradan ma jadit mi jukur pi Yeremia: 12 “Game man ipong’ yeny pare; kud itime rac man mii ire piny moko ci m’ekwayu i beng’i.”

13 Pieno Nebuzaradan ma jadit mi jukur, Nebucazban ma Rabsaris,* Nergal-carezer ma Rabmag* man judongo ceke p’ubimo mi Babeli gioro dhanu 14 ucidh uwodho Yeremia kud i Lela mi jukur man ukele i bang’ Gedalia ma wod Ahikam ma wod Cafan kara utere i ot pare. E ekwo i kind dhanu.

15 Saa ma nwang’u fodi jutwiyo ba Yeremia i Lela mi jukur, lembe pa Yehova ubino i bang’e, uyero kumae: 16 “Cidh iyer ni Ebed-melek ma Jaethiopia kumae: ‘Yehova mir udul ma Mungu mir Israel uwacu kumae: “Nen, abepong’o lembe m’ayero pir adhura maeni, abekelo nyoth ento bero ngo, man i nindo maeca, ibineno saa ma lembene betimere.”’

17 “‘Ento abibodhi i nindo maeca,’ Yehova wacu, ‘man jubimii ngo i cing’ dhanu m’ibelworo.’

18 “‘Kum abibodhi andha man ibipodho ngo i lak palamularu. Ibibodho kwo peri pilembe igena,’ Yehova wacu.”