Yeremia

40 Lembe pa Yehova ubino i bang’ Yeremia i ng’ey ma Nebuzaradan ma jadit mi jukur uweko ecidho m’etie agonya niai kud i Rama. Etere keca ma nwang’u jutwiye ku nyoro man ebino i kind dhanu mi Yeruzalem man mi Yuda ma jubetero i ng’eca i Babeli. 2 I ng’eye jadit mi jukur ugamu Yeremia man ewacu ire kumae: “Yehova Mungu peri ular uyero pi nyoth maeni m’uwok iwi kabedo maeni, 3 man Yehova ukelo nyothne tap calu m’elar eyero, pilembe juthu udubo ni Yehova man giworo ngo dwande. Eno re m’uketho lembuno unwang’uwu. 4 Kawoni abegonyo nyoro ma jutwiyo icingi tin eni. Tek ineno nia tie ber wacidh wakudi i Babeli, bin wacidhi, e abigwoki. Ento tek imito ngo nibino karacelo kuda i Babeli, kud ibin. Nen! ng’om zoo n’i weng’i. Icopo cidho kaka moko ci m’ing’iyo.”

5 Ma fodi Yeremia ulokere ngo, Nebuzaradan uyero ire kumae: “Dok i bang’ Gedalia ma wod Ahikam ma wod Cafan, m’ubimo mi Babeli uketho ubim wi adhura mi Yuda man ibed i bang’e i kind dhanu kunoke icidh kaka moko ci m’ing’iyo.”

I ng’eye jadit mi jukur umiyo ire cam ku giramiya man eweko ecidho i wang’e. 6 E Yeremia ucidho i bang’ Gedalia ma wod Ahikam i Mizpa man ewok ebedo i bang’e i kind dhanu m’udong’ i ng’ombe.

7 I ng’ey kare judong askari ceke m’ubino i lum karacelo ku juaskari migi giwinjo nia ubimo mi Babeli uketho Gedalia ma wod Ahikam ubim wi ng’ombe, man nia emiyo ire dito iwi jumaco, jumamon, man awiya m’i kind jucan mi ng’ombe ma nwang’u jutero ngo i Babeli. 8 E gibino i bang’ Gedalia i Mizpa. Ju m’ubinone utie Ismael ma wod Nethania, Yohanan man Yonathan ma gi wot Kareya, Seraya ma wod Tanumeth, wot Efai ma Janetofa man Yezania ma wod Maakath karacelo ku juaskari migi. 9 Gedalia ma wod Ahikam ma wod Cafan ung’olo igi ku kwong’ man ni juaskari migi, ewacu kumae: “Kud wulwor nitimo ni Jukaldayo. Wukwo i ng’ombuni man wutim ni ubimo mi Babeli, e lembe biwotho ma ber iwu. 10 An re abibedo para asu i Mizpa pi nicungo kakewu i wang’ Jukaldayo ma bibebino i bang’wa. Ento wun wucikuru nicoko pigulok, nying yen mi cir man mo; wugwokgi i agulu mwu man wubedi i adhura ma wumaku.”

11 Man Juyahudi ceke m’ubino i Moab, i Amon man i Edom man bende m’ubino i ng’om mange ceke de giwinjo nia ubimo mi Babeli uweko dhanu moko udong’ i Yuda man nia eketho Gedalia ma wod Ahikam ma wod Cafan ubim wigi. 12 Pieno Juyahudi ceke gicaku dwogo niai kud i kabedo ceke ma julalugi i iye, man gidwogo i ng’om mi Yuda i bang’ Gedalia i Mizpa. Gicoko pigulok man nying yen mi cir lee mandha.

13 Yohanan ma wod Kareya ku judong askari ceke m’ubino i lum gibino i bang’ Gedalia i Mizpa. 14 Giwacu ire kumae: “Nyo ing’eyo de nia Baalis m’ubimo mi Juamon uoro Ismael ma wod Nethania pi ninegi?” Ento Gedalia ma wod Ahikam uyiyo ngo lembe ma giyero.

15 E Yohanan ma wod Kareya ubino i bang’ Gedalia i Mizpa i amung’ man eyero ire kumae: “Amito acidh aneg Ismael ma wod Nethania cen, man ng’atu moko mbe ma bing’eyo. Nyo ukwayu enegi man nyo ukwayu dhanu ceke mi Yuda m’ucokiri i beng’i ulal man Yuda urwinyi?” 16 Ento Gedalia ma wod Ahikam uyero ni Yohanan ma wod Kareya kumae: “Kud itim kumeno, pilembe gin m’ibeyero pi Ismael no utie vupo.”