Yeremia

41 I nindo mir abiro, Ismael ma wod Nethania ma wod Elicama m’ubino ng’atu acel mi ot mi ker* man ng’atu acel ma pire tek p’ubimo ubino ku dhanu mange apar i bang’ Gedalia ma wod Ahikam i Mizpa. Kinde ma gibecamu cam karacelo i Mizpa, 2 Ismael ma wod Nethania man jumaco apar m’ubino karacelo kude giai malu man ginego Gedalia ma wod Ahikam ma wod Cafan ku palamularu. Pieno enego ng’atu m’ubimo mi Babeli uketho ubim wi ng’ombe. 3 Ismael unego bende Juyahudi ceke m’ubino karacelo ku Gedalia i Mizpa man bende juaskari mi Jukaldayo m’ubino keca.

4 I nindo mir arionde i ng’ey ma junego Gedalia, ma fodi ng’atu moko acel de mbe m’ung’eyo lembene, 5 jumaco pier abora ubino niai kud i Cekem, niai kud i Cilo, man niai kud i Samaria. Gibino ma julielo yir tikgi, ma bongu migi yec, githumo kumgi man gibino ku girathiera mi nying cam man kud udok sengi i cing’gi ma gibekelo i ot pa Yehova. 6 Pieno Ismael ma wod Nethania uwok kud i Mizpa pi nicirombo kugi, ebino wak saa m’ebewotho i yo. Kinde m’erombo kugi, ewacu igi kumae: “Wubin i bang’ Gedalia ma wod Ahikam.” 7 Ento saa ma gimondo i adhura, Ismael ma wod Nethania ku dhanu pare ginegogi man gibologi i vuj pii.

8 Juapar m’i kindgi ulund uwacu ni Ismael kumae: “Kud inegwa, pilembe wakanu dero mi nganu, mi nganu ma juyuke, mi mo man mi miyokic i lum.” E enegogi ngo karacelo kud umego migi. 9 Nwang’u Ismael ubolo avuj dhanu ceke m’enego i vuj pii ma dit, m’Ubimo Asa utong’o saa m’ebekiedo kud Ubimo Baca mir Israel. Eno tie vuj pii ma Ismael ma wod Nethania upong’o kud avuj dhanu.

10 Ismael utwiyo dong dhanu ceke mi Mizpa, m’uketho i iye jumanyir p’ubimo man dhanu ceke ma nwang’u udong’ i Mizpa ma Nebuzaradan ma jadit mi jukur uketho i the loc pa Gedalia ma wod Ahikam. Ismael ma wod Nethania utwiyogi man etugo woth pi nikadhu loka i bang’ Juamon.

11 Saa ma Yohanan ma wod Kareya man judong askari ceke m’ubino karacelo kude giwinjo pi lembe ma reco ceke ma Ismael ma wod Nethania utimo, 12 gicoko dhu juaskari zoo man gitugo woth pi nicikiedo i dhu Ismael ma wod Nethania, giwok ginwang’e i dhu kulo ma dit* i Gibeon.

13 Anyong’a unego dhanu ceke m’ubino karacelo ku Ismael kinde ma gineno Yohanan ma wod Kareya man judong askari ceke ma ni karacelo kude. 14 E dhanu ceke ma nwang’u Ismael utwiyo niai kud i Mizpa giloko man gidok ku Yohanan ma wod Kareya. 15 Ento Ismael ma wod Nethania ku jumaco abora givuth kud i cing’ Yohanan man gicidho i bang’ Juamon.

16 Yohanan ma wod Kareya ku judong askari ceke m’ubino karacelo kude gicoko dong dhanu m’udong’ kud i Mizpa, ju ma gibodho kud i cing’ Ismael ma wod Nethania i ng’ey m’enego Gedalia ma wod Ahikam. Gicoko jumaco, juaskari, jumamon, awiya, man bajego kud i Gibeon man gidok kugi. 17 Pieno gicidho man giwok gibedo i odi welo pa Kimham i ng’et Bethlehem, kum nwang’u gikeco nicidho i Misiri 18 pi Jukaldayo. Kum lworo bino negogi pigi, pilembe Ismael ma wod Nethania unego Gedalia ma wod Ahikam m’ubimo mi Babeli uketho ubim wi ng’ombe.