Yeremia

42 E judong askari ceke, Yohanan ma wod Kareya, Yezania ma wod Hocaya man dhanu ceke niai i kum ng’atu ma nok nitundo i kum ng’atu ma dit gibino 2 man giyero ni jabila Yeremia kumae: “Kewinj kwac mwa, man kway Yehova Mungu peri piwa, pi dong dhanu maeni ceke m’udong’, kum ju ma nok kende re m’udong’ calu ma in de ibeneno eni. 3 Timba Yehova Mungu peri unyuth iwa yo ma wacikara nikwanyu man lembe m’ukwayu watim.”

4 Jabila Yeremia udwoko igi kumae: “Awinjo lembe ma wuyero, man abirwo i bang’ Yehova Mungu mwu calu ma wukwayu; abinyutho iwu lembe ceke ma Yehova bidwoko iwu, abimung’o ngo wec acel de iwu.”

5 Gidwoko ni Yeremia kumae: “Wek Yehova ubed jamulembe mandha man ma jugeno i kindwa tek watimo ngo lembe ma Yehova Mungu peri ung’olo iwa nikadhu kud i beng’i kubang’e kubang’e. 6 Dok ebed lembe ma ber kunoke ma rac, wabiworo dwand Yehova Mungu mwa ma wabeori i bang’e, kara lembe uwoth iwa ma ber pilembe waworo dwand Yehova Mungu mwa.”

7 Nindo apar i ng’eye, lembe pa Yehova ubino i bang’ Yeremia. 8 E elwong’o Yohanan ma wod Kareya man judong askari ceke m’ubino karacelo kude man dhanu ceke niai i kum ng’atu ma nok nitundo i kum ng’atu ma dit. 9 Edwoko igi kumae: “Yehova Mungu mir Israel ma wuora acidh ater kwac mwu i bang’e uyero kumae: 10 ‘Tek andha wubibedo i ng’ombuni, e abigierowu ento abirwombowu ngo, abipidhowu ento abifudhowu ngo, kum ang’eyang’o bimondo i iya* pi nyoth ceke m’akelo i wiwu. 11 Lworo kud unegwu pir ubimo mi Babeli ma wubelworo.’

“‘Kud wulwore,’ Yehova wacu, ‘kum ani kudwu pi nibodhowu man pi nilaruwu kud i cinge. 12 Man abibedo ku kisa i kumwu, e kisa binege i kumwu man ebidwogowu i ng’om mwu ma dhe.

13 “‘Ento tek wuyero kumae: “Ungo, wabibedo ngo i ng’ombuni!” man wuworo ngo dwand Yehova Mungu mwu 14 man wuwacu kumae: “Ungo, wabicidho mwa i ng’om mi Misiri, kuca wabineno ngo lwiny, kadi wabiwinjo ngo dwand agwara man wabikoso ngo cam;* wabikwo mwa kuca,” 15 e wuwinj lembe pa Yehova, Ee dong dhanu mi Yuda. Yehova mir udul ma Mungu mir Israel uwacu kumae: “Tek wukeco mwu andha nicidho i Misiri man wucidho nibedo kuca, 16 e tap palamularu ma wubelworo eni birubowu i ng’om mi Misiri kuca, man tap ndru ma wubelworo eni bilubo tokwu i Misiri man wubitho kuca. 17 Dhanu ceke m’ukeco nicidho i Misiri pi nibedo kuca bitho ku palamularu, ndru man thong’om.* Ng’atu moko mbe m’i kindgi ma bidong’ kwo kadi ma biboth kud i nyoth m’abikelo i wigi.”’

18 “Kum Yehova mir udul ma Mungu mir Israel uwacu kumae: ‘Tap calu m’akonjo ng’eicwiny ku kwinyo para iwi dhanu ma bedo i Yeruzalem, abikonjo bende kwinyo para i wiwu tek wucidho i Misiri, man wubidoko ni alam, piny ma ng’oyo ndiri, kwong’ man cac, e wubineno ngo kabedo maeni kendo nyanok de.’

19 “Yehova ujukowu, Ee dong dhanu mi Yuda. Kud wucidh i Misiri. Wucikuru ning’eyo andhandha nia adaru cimowu tin eni 20 nia wubiculo kawang’ kosa mwu ku kwo mwu.* Kum wuora i bang’ Yehova Mungu mwu, wuwacu kumae: ‘Rwo i bang’ Yehova Mungu mwa piwa, man dwog iyer iwa lembe ceke ma Yehova Mungu mwa uyero, man wabitime.’ 21 Man ayere iwu tin eni, ento wubiworo ngo dwand Yehova Mungu mwu kadi wubitimo ngo lembe ceke m’eora ayer iwu. 22 Dong’ wung’ey cuu nia wubitho ku palamularu, ndru man thong’om i kabedo ma wubemito wucidhi man wubed i iye.”