Yeremia

43 Saa ma Yeremia udaru niweco i bang’ dhanu ceke man niyero igi lembe ceke ma Yehova Mungu migi uyero, lembeman acel acel ma Yehova Mungu migi uore eyer igi, 2 Azaria ma wod Hocaya, Yohanan ma wod Kareya man dhanu ceke ma kethiri giyero ni Yeremia kumae: “Lembe m’ibeyero no utie vupo! Yehova Mungu mwa uori ngo ibin iyer iwa nia, ‘kud wucidh i Misiri pi nibedo kuca.’ 3 Baruk ma wod Neria re m’ubepiko lembe i ii i kumwa pi nimiyowa i cing’ Jukaldayo, pi ninegowa kunoke pi niterowa i ng’eca i Babeli.”

4 Pieno Yohanan ma wod Kareya man judong askari ceke ku dhanu ceke giworo ngo dwand Yehova ma nia gibed i ng’om mi Yuda. 5 Ento Yohanan ma wod Kareya ku judong askari ceke gicoko dong dhanu ceke mi Yuda ma nwang’u udwogo pi nibedo i ng’om mi Yuda kud i kind thek ceke ma julalugi i iye. 6 Gicoko jumaco, jumamon, awiya, jumanyir p’ubimo man dhanu ceke* ma Nebuzaradan ma jadit mi jukur uweko i bang’ Gedalia ma wod Ahikam ma wod Cafan, man bende jabila Yeremia giku Baruk ma wod Neria. 7 Gimondo i ng’om mi Misiri kum giworo ngo dwand Yehova man gicidho nitundo bir i Tapanes.

8 I ng’eye, lembe pa Yehova ubino i bang’ Yeremia i Tapanes, uyero kumae: 9 “Ting’ kidi ma dongo i cingi man kangi i ulobo i kind briki ma jukpero i dhu kamondo mi ot pa Farao i Tapanes, ma Juyahudi gibeneno. 10 I ng’eye, wac igi kumae: ‘Yehova mir udul ma Mungu mir Israel uwacu kumae: “Nen, abelwong’o Nebukadnezar* m’ubimo mi Babeli ma jatic para, man abiketho komker pare tap iwi kidi maeni m’akanu, e ebiyaru hema mi ker pare i wigi. 11 Ebibino man ebigoyo ng’om mi Misiri. Ju m’ukwayu utho ku thong’om, bitho ku thong’om, ju m’ukwayu ucidh i ng’eca bicidho i ng’eca, man ju m’ukwayu utho ku palamularu bitho ku palamularu. 12 Abigudo mac i kum udi* mi mungu mi Misiri, Nebukadnezar biwang’ugi man ebiterogi i ng’eca. Ebitukere ku ng’om mi Misiri tap calu ma jakwac tukere ko ku kendi pare man ebiai ku keca ku kwiyocwiny.* 13 Ebirungo mbegi* mi Beth-cemec* i ng’om mi Misiri, man ebiwang’u udi* mi mungu mi Misiri ku mac.”’”