Yeremia

44 Maeni tie lembe m’ubino i bang’ Yeremia pi Juyahudi ceke ma bedo i ng’om mi Misiri, ju ma bedo i Migdol, i Tapanes, i Nof* man i ng’om mi Pathros, m’uyero kumae: 2 “Yehova mir udul ma Mungu mir Israel uwacu kumae: ‘Wuneno nyoth ceke m’akelo iwi Yeruzalem man iwi adhura ceke mi Yuda. Tin dong’ gin uvuru ma ng’atu moko mbe ma bedo i igi. 3 Utie pi lembe ma reco ma gitimo pi ninyayu ng’eicwiny i iya, kum gicidh githiero lam, man gitimo ni mungu mange ma ging’eyo ngo, nik’ebed wun kadi kwaruwu de. 4 Amedara nioro jutic para ceke ma jubila i beng’wu, aorogi kendo kendo,* ayero kumae: “Timba kud wutim gin maeni ma judagu m’amaru ngo.” 5 Ento giwinjo ngo man ithgi de giciko ngo pi niloko kud i timo migi ma reco ma giwek ko nithiero lam ni mungu mange. 6 Pieno ng’eicwiny ku kwinyo para ukonjere man uwang’u adhura mi Yuda ku gengi mi Yeruzalem. Gidoko ni uvuru man ng’om ngele calu ma gitie ko tin eni.’

7 “Man kawoni Yehova Mungu mir udul ma Mungu mir Israel uwacu kumae: ‘Pirang’o wubekelo tho nyoth ma dit kumeni i wiwu,* ma biketho jumaco ceke, mon, awiya man mukere birwinyo pet kud i Yuda, dongwu de bibedo mbe? 8 Pirang’o wubenyayu ng’eicwiny i iya ku tic mi cingwu ma wubethiero ko lam ni mungu mange i ng’om mi Misiri, kaka ma wucidho nibedo i iye? Wubithum pet man wubidoko ni jambalam man jamcac i kind thek ceke mi ng’om. 9 Nyo wiwu wil i kum timo ma reco pa kwaruwu, timo ma reco mi jubim mi Yuda, timo ma reco mi mon migi man bende timo mwu ma reco, ku timo ma reco mi mon mwu m’utimere i ng’om mi Yuda man i gengi mi Yeruzalemi? 10 Cil tin eni wujwiguru ngo, lworo negowu ngo, kadi wuworo de ngo cik ku lembang’ola para m’aketho i weng’wu man i wang’ kwaruwu.’

11 “Pieno Yehova mir udul ma Mungu mir Israel uwacu kumae: ‘Nen, akeco nikelo nyoth i wiwu pi ninyotho Yuda kpo. 12 Man abiketho dong dhanu mi Yuda m’ukeco nicidho i ng’om mi Misiri pi nikwo kuca, bithum pet i ng’om mi Misiri. Gibitho i lak palamularu man ndru bidarugi; niai i kum ng’atu ma nok nitundo i kum ng’atu ma dit, gibitho ku palamularu man ku ndru. Man gibidoko ni alam, piny ma ng’oyo ndiri, kwong’ man jamcac. 13 Abimiyo matira ni dhanu ma bedo i ng’om mi Misiri tap calu m’amiyo matira ni Yeruzalem, ku palamularu, ku ndru, man ku thong’om.* 14 Man dong dhanu mi Yuda m’ucidho pi nibedo i ng’om mi Misiri biboth ungo, kadi bidong’ de ngo kwo pi nidwogo i ng’om mi Yuda. Ava dobedo i ng’ombe binegogi lee, ento gibidwogo ngo, ndhu kende kende ju ma nok ma biboth.’”

15 Jumaco ceke m’ung’eyo nia mon migi bethiero lam ni mungu mange man mon m’ucungo keca, m’ucoko dhoggi ni udul ma lee man dhanu ceke ma kwo i ng’om mi Misiri, i Pathros, gidwoko ni Yeremia kumae: 16 “Wabitiyo ngo ku lembe m’iyero iwa i nying’ Yehova. 17 Ento wabitimo mwa andha lembe ceke ma dhogwa yero: wabithiero lam ni Ubimo ma dhaku mi polo* man wabikonjo girathiera mi pigulok ire, tap calu ma wan, kwaruwa, jubim mwa, man judongo ma wijo mwa gitimo i adhura mi Yuda man i gengi mi Yeruzalem kinde ma wayeng’ ku mukathi man wakwo ma ber ma waneno ngo nyoth moko acel de. 18 Niai ma waweko nithiero lam ni Ubimo ma dhaku mi polo* man nikonjo girathiera mi pigulok ire ci, wakoso piny ceke man wathum ku palamularu man ku ndru.”

19 Jumamon umedo kumae: “Kinde ma wabethiero lam ni Ubimo ma dhaku mi polo* man wabekonjo girathiera mi pigulok ire, nyo cogwa ngo re m’uyiyo nia wathier lam mi mukathi ma juyiko i ayi pare man wakonj girathiera mi pigulok ire?”

20 E Yeremia uyero ni dhanu zoo, ni jumaco ku mon migi man dhanu ceke m’ubino weco i bang’e kumae: 21 “Lam ma wun, kwaruwu, jubim mwu, judongo ma wijo mwu man dhanu mi ng’ombuni uthiero i adhura mi Yuda man i gengi mi Yeruzalem, Yehova upoy pigi man wiye wil ungo i kumgi! 22 Kpe ci, ciro timo mwu ma reco man lembe ma judagu ma wutimo udoko tek ni Yehova; e ng’om mwu udoko ni uvuru, piny ma ng’oyo ndiri, man alam ma ng’atu moko mbe ma bedo i iye calu m’etie ko tin eni. 23 Tie pilembe wuthiero lam maeno man wudubo ni Yehova ma wuworo ko ngo dwand Yehova man wulubo ngo cik pare, lembang’ola pare, poyowic pare, re m’uketho nyoth maeno uwok i wiwu calu m’etie ko tin eni.”

24 Yeremia umedo ni dhanu ceke man ni jumamon ceke kumae: “Wuwinj lembe ma Yehova uyero, wu dhanu ceke mi Yuda ma wu n’i ng’om mi Misiri. 25 Yehova mir udul ma Mungu mir Israel uwacu kumae: ‘Lembe ma wun ku mon mwu wuyero ku dhogwu, wutimogi ku cingwu, kum wuyero kumae: “Wabitimo andha lembe ma wakwong’o nia wabithiero lam ni Ubimo ma dhaku mi polo* man wabikonjo ire girathiera mi pigulok.” Wu mon wubipong’o andha lembe ma wukwong’o man wubitimo lembe ma wung’olo ku kwong’.’

26 “Dong’ wuwinj lembe ma Yehova uyero, wu dhanu ceke mi Yuda ma wubedo i ng’om mi Misiri: ‘“Nen, abekwong’o ku nyinga ma dwong’,” Yehova wacu, “nia Jayahudi moko mbe ma bilwong’o nyinga kendo saa m’ekwong’o kwong’ nia, ‘calu andha Rwoth Ubimo ma Malu Ngbir Yehova bedo kwo!’ 27 Kawoni wang’a n’i kumgi pi nikelo nyoth man lembe ma ber ungo; dhanu ceke mi Yuda ma n’i ng’om mi Misiri bitho ku palamularu man ku ndru, cil ma gibithum ko pet. 28 Ju ma nok kende re ma biboth kud i lak palamularu man ma bidwogo i ng’om mi Yuda niai kud i ng’om mi Misiri. E dong dhanu ceke mi Yuda m’ubino i ng’om mi Misiri pi nibedo i iye bing’eyo nia lembe pa ng’a m’utimere andha, nyo para kunoke migi!”’”

29 “‘Man eni tie lanyuth iwu,’ Yehova wacu. ‘Abimiyo iwu matira i kabedo maeni, kara wuyii nia nyoth m’ang’olo nia binwang’uwu bitimere andha. 30 Yehova uwacu kumae: “Wunen, abemiyo Farao Hofra m’ubimo mi Misiri i cing’ judegi pare man i cing’ ju m’ubesayu nikabu kwo pare,* tap calu m’agam amiyo Ubimo Zedekia mi Yuda i cing Ubimo Nebukadnezar* mi Babeli m’ubino jadegi pare man m’uyenyo nikabu kwo pare.”’”*