Yeremia
25 Lembe m’ubino i bang’ Yeremia pi dhanu ceke mi Yuda i oro mir ang’wende mi camuker pa Yehoiakim ma wod Yosiya m’ubimo mi Yuda, m’ubino bende oro ma kwong’a mi camuker p’Ubimo Nebukadnezar* mi Babeli. 2 Eni tie lembe ma jabila Yeremia uyero pi* dhanu ceke mi Yuda man pi dhanu ceke ma bedo i Yeruzalem:
3 “Niai i oro mir apar adege mi camuker pa Yosiya ma wod Amon m’ubimo mi Yuda cil tin, niyero oro pier ario wi adek maeni zoo, Yehova uwotho weco i bang’a man amedara niweco i beng’wu kendo kendo,* ento wuwinjo ngo. 4 Yehova uoro jutic pare ceke ma gi jubila i beng’wu; eorogi kendo kendo* ento wuwinjo ngo kadi ithwu de wuciko ngo pi niwinjo. 5 Gibed giyero kumae: ‘Timba wun ceke wulokuru kud i yo mwu ma rac man kud i timo mwu ma reco; e wubimeduru nikwo pi kare ma lee i nindo m’ubino i ng’om ma Yehova umiyo iwu yang’ con man ni kwaruwu. 6 Kud wulub tok mungu mange, kud wutim igi man kud wukul korwu piny igi; kum wubenyayu ng’eicwiny i iya kud ayi gin m’acwiya ma wuyiko, kan ungo abikelo nyoth i wiwu.’
7 “‘Ento wukwero niwinja,’ Yehova wacu. ‘Wulund wunyayu ng’eicwiny i iya kud ayi gin m’acwiya ma wuyiko pi nyoth mwu giwu.’
8 “Pieno Yehova mir udul uwacu kumae: ‘“Calu ma wukwero niwinjo lembe m’ayero, 9 abeoro juwak dhanu ceke ma yo malu,” Yehova wacu, “man abeoro julwong’ Ubimo Nebukadnezar* mi Babeli ma jatic para; abikelogi i kum ng’ombuni, i kum dhanu m’i iye man i kum thek ceke m’udhokogi. Abinyothogi man abiketho gibidoko ni gin ma ng’oyo ndiri, gin ma julwiyo i kume ku zungo man uvuru ma rondo ku rondo. 10 Abijigo dwal mir anyong’a man dwal mi foc kud i bang’gi, dwand cwar mugole man dwand nyamugole,* dwand kidirego man der mi thala. 11 Ng’om maeni ceke bidoko ni uvuru man ebidoko ni gin ma ng’oyo ndiri, man thek maeni bitimo ni ubimo mi Babeli pi oro pier abiro.”’
12 “‘Ento kinde ma oro pier abiro bithum, abiketho ubimo mi Babeli ku thekne gibiwodho wel pi kier migi,’ Yehova wacu, ‘man abiketho ng’om mi Jukaldayo bidoko ni uvuru pi nja. 13 Abikelo iwi ng’ombe lembe para ceke m’ayero i kume, lembe ceke m’ukiewere i buku maeni ma Yeremia uewo i kum thek ceke. 14 Kum thek dupa man jubim ma dongo bidwokogi ni ng’eca, man abiculogi nimakere ku timo migi man tic mi cing’gi.’”
15 Kum Yehova Mungu mir Israel uwacu ira kumae: “Gam kikombe* maeni mi pigulok mi kwinyo kud i cinga, man keth thek ceke m’aori i bang’gi umadhe. 16 Gibimadhe, e gibithambini man gibitimiri ve abelu nikum palamularu m’abeoro i kindgi.”
17 E agamu kikombene kud i cing’ Yehova man aketho thek ceke ma Yehova uora i bang’gi umadhe: 18 Acaku ku Yeruzalem man kud adhura mi Yuda, jubim migi man judongo ma wijo migi, pi nidwokogi ni uvuru, ni gin ma ng’oyo ndiri, gin ma julwiyo i kume ku zungo man alam, calu m’etie ko tin eni; 19 i ng’eye ke Farao m’ubimo mi Misiri ku jutic pare, judongo ma wijo pare man dhanu pare ceke, 20 man thek ceke m’ujebere i kindgi; jubim ceke mi ng’om mi Uz, jubim ceke mi ng’om mi Jufilisti, Ackelon, Gaza, Ekron man dong dhanu mir Acdod; 21 Edom, Moab man Juamon; 22 jubim ceke mi Turo, jubim ceke mi Sidon, man jubim mi cula mi nam; 23 Dedan, Thema, Buz man dhanu ceke ma juthumo yukwic mi theng’gi; 24 jubim ceke mi Juarabia man jubim ceke mi thek m’ujebere ma bedo i langa; 25 jubim ceke mi Zimri, jubim ceke mir Elam man jubim ceke mi Jumedi; 26 jubim ceke ma yo malu ma ni ceng’ini man ma ni bor, ng’atuman acel acel, man ker mange ceke ma n’i wang’ ng’om zoo; i ng’eygi ke ubimo mi Cecak* re ma bimadhe.
27 “Man icikiri niyero igi kumae: ‘Yehova mir udul ma Mungu mir Israel uwacu kumae: “Wumadhi, wumer, wung’oki, man wupodhi ma dong’ wucopo ai ungo malu nikum palamularu m’abeoro i kindwu.”’ 28 Man tek gikwero nigamu kikombene kud i cingi pi nimadhe, yer igi kumae: ‘Yehova mir udul uwacu kumae: “Wucikuru nimadhe! 29 Kum wunen! tek alar akelo nyoth iwi adhura ma lwong’ere ku nyinga, nyo wun wubinwang’u ngo matira?”’
“‘Wubinwang’u matira, pilembe abelwong’o palamularu i kum dhanu ceke ma bedo iwi ng’om,’ Yehova mir udul uwacu.
30 “Icikiri niewo lembuni ceke igi man niwacu igi kumae:
‘Yehova birundo niai ku malu,
Man ebiketho dwande biwinjere niai kud i kabedo pare ma leng’.
Ebirundo ma tek i kum kabedo pare,
Ebikok calu ju m’ubenyono nyigulok i vur mi biyo pigulok,
Ebiwero wer mir aloci i kum dhanu ceke ma bedo i ng’om.’
31 ‘Woy biwinjere cil i tung’ ng’om,
Kum Yehova n’i piem ku thek.
En ku kume, ebikelo pokolembe iwi dhanu ceke.*
Man ebiketho jutim rac i lak palamularu,’ Yehova wacu.
32 Yehova mir udul uwacu kumae:
‘Nen! nyoth ubemew niai kud i bang’ thek acel nicidho i bang’ thek ma kucelo,
Man vira ma dit bituk niai kud i theng ng’om ma bor mandha.
33 “‘Man dhanu ma Yehova binego i nindo maeca bimoyiri niai i tung’ ng’om acel nitundo bir i tunge ma kucelo. Jubiwagugi ngo, jubicoko de ngo dhoggi kadi akunya de jubikunyogi ngo. Gibidoko calu uweyo i wang’ ng’om.’
34 Wugoy nduru wu jukwac, man wukoki!
Wung’ienduru wu dhanu mir awora mi dwol,
Pilembe nindo mi nek man mi laluwu uromo,
Man wubipodho calu agulu ma pire tek!
35 Jukwac umbe ku kaka ma giromo ringo i iye
Man kaboth umbe ni dhanu mir awora mi dwol.
36 Wuwinji! Jukwac ubewak ma tek
Man dhanu mir awora mi dwol ubegoyo nduru,
Kum Yehova ubenyotho luba migi.
37 Judwoko kabedo m’ukwiyo gire ni kaka ma kwo mbe i iye,
Nikum kwinyo pa Yehova m’uopo.
38 Eweko ode tap calu nyathin umvor,*
Kum ng’om migi udoko ni piny ma ng’oyo ndiri
Nikum palamularu ma ger
Man nikum kwinyo pare m’uopo.”