KAPANG BUKU YAMU Watchtower
Watchtower
KAPANG BUKU I YAMU
Alur
  • BIBLIA
  • GIRASOMA
  • COKO
  • Yeremia 36
  • Biblia—Lok mi ng’om ma nyen

Thenge maeni umbe ku video.

Tim kisa, kosa moko uwok rek.

Lembe ma dongo m’i buku pa Yeremia

      • Yeremia unyutho lembe ma jukiewo i kithabu m’adola (1-7)

      • Baruk usomo kithabu m’adola ku dwande ma tek (8-19)

      • Yehoiakim uwang’u kithabu m’adola (20-26)

      • Lembe ma judog jukiewo i kithabu m’adola ma nyen (27-32)

Yeremia 36:10

Korolembe mi there

  • *

    Kunoke “kusika ma jucamu i iye.”

Yeremia 36:12

Korolembe mi there

  • *

    Kunoke “kal.”

  • *

    Kunoke “bajego.”

Yeremia 36:22

Korolembe mi there

  • *

    Dwi maeno maku niai diere pa dwi mir 11 nitundo i diere pa dwi mir 12. Nen Thenge ma jumedo B15.

Yeremia 36:31

Korolembe mi there

  • *

    I dhu Juebrania: “kodhine.”

Lok m'urombo

Dii wi namba pi nineno verse mange m'urombo kude.
  • Biblia—Lok mi ng’om ma nyen
  • 1
  • 2
  • 3
  • 4
  • 5
  • 6
  • 7
  • 8
  • 9
  • 10
  • 11
  • 12
  • 13
  • 14
  • 15
  • 16
  • 17
  • 18
  • 19
  • 20
  • 21
  • 22
  • 23
  • 24
  • 25
  • 26
  • 27
  • 28
  • 29
  • 30
  • 31
  • 32
Biblia—Lok mi ng’om ma nyen
Yeremia 36:1-32

Yeremia

36 I oro mir ang’wende mi camuker pa Yehoiakim ma wod Yosiya m’ubimo mi Yuda, lembe pa Yehova ubino i bang’ Yeremia, uyero kumae: 2 “Ting’ kithabu m’adola man kiew lembe ceke m’ayero iri pir Israel ku Yuda man thek ceke, lembe m’ayero iri niai i nindo ma kwong’a m’aweco kudi i iye i rundi pa Yosiya cil tin eni. 3 Saa moko nyo kinde ma dhanu mi ot pa Yuda biwinjo pi nyoth ceke m’akeco nia abikelo i wigi, gibiloko kud i timo migi ma reco kara awek kier migi man awek dubo migi.”

4 E Yeremia ulwong’o Baruk ma wod Neria man Yeremia uyero ire lembe ceke ma Yehova uwacu ire, e Baruk ukiewogi i kithabu m’adola. 5 I ng’eye Yeremia ung’olo ni Baruk kumae: “Jutwiyo bang’a man acopo mondo ngo i ot pa Yehova. 6 Dong’ in re m’icikiri nicidho man nisomo ku dwendi ma tek lembe pa Yehova m’ayero iri ikiewo i kithabu m’adola. Some i ith dhanu i ot pa Yehova i nindo mi kwirocam; pieno ibisome ni dhanu ceke mi Yuda m’ubino niai kud i adhura migi ma tung’ tung’. 7 Saa moko nyo kisa ma gibekwayu bitundo i bang’ Yehova man ng’atuman biloko kud i timo pare ma reco, kum Yehova udaru ng’olo pi ng’eicwiny man kwinyo pare ma dit i kum dhanu maeni.”

8 E Baruk ma wod Neria utimo lembe ceke ma jabila Yeremia ung’olo ire; esomo lembe pa Yehova ma n’i kithabu m’adola ku dwande ma tek i ot pa Yehova.

9 I oro mir abije mi camuker pa Yehoiakim ma wod Yosiya m’ubimo mi Yuda, i dwi mir abung’wende, dhanu ceke mi Yeruzalem man dhanu ceke m’ubino i Yeruzalem niai kud i adhura mi Yuda gicaku kwiro cam i wang’ Yehova. 10 E Baruk usomo wec pa Yeremia ma n’i kithabu m’adola ku dwande ma tek i ith dhanu ceke, i ot pa Yehova i kusika* pa Gemaria ma wod Cafan ma jagor, i lela ma yo malu i dhu kamondo mi dhugang’ ma nyen mi ot pa Yehova.

11 Saa ma Mikaya ma wod Gemaria ma wod Cafan uwinjo lembe pa Yehova ma n’i kithabu m’adola, 12 eloro i ot* p’ubimo i kusika pa jagor. Nwang’u judongo ma wijo* ceke ubedo keca: Elicama ma jagor, Delaya ma wod Cemaya, Elnathan ma wod Akbor, Gemaria ma wod Cafan, Zedekia ma wod Hanania man judongo ma wijo mange ceke. 13 Mikaya ukoro igi lembe ceke m’ewinjo saa ma Baruk usomo kithabu m’adola i ith dhanu.

14 E judongo ma wijo ceke uoro Yehudi ma wod Nethania ma wod Celemia ma wod Kuci i bang’ Baruk pi niwacu kumae: “Bin ku kithabu m’adola mi somo i ith dhanu.” Baruk ma wod Neria ugam uting’o kithabu m’adolane i cinge man ecidho i bang’gi. 15 Giyero ire kumae: “Wakweyi, kebed piny man isome iwa ku dwal ma tek.” E Baruk usome igi.

16 Saa ma giwinjo lembuno zoo ci, gineniri i kindgi ku ndiri man giyero ni Baruk kumae: “Ukwayu wayer kokoro lembuni zoo ni ubimo.” 17 E gipenjo Baruk kumae: “Wakweyi, keyer iwa, ikiewo lembe maeni zoo nenedi. Nyo Yeremia re m’unyutho iri gin m’ikiewi?” 18 Baruk udwoko igi kumae: “Eyo, en re m’enyutho ira lembe maeni zoo, man akiewogi ku vino i kithabu m’adola maeni.” 19 Judongo ma wijo uwacu ni Baruk kumae: “Wucidh wupondi wuku Yeremia, man kud wuketh ng’atu moko ung’ey kaka ma wun’i iye.”

20 I ng’eye gicidho i bang’ ubimo i lela, man giwok giketho kithabu m’adola i kusika pa Elicama ma jagor, e gikoro lembe ceke ma giwinjo ni ubimo.

21 E ubimo uoro Yehudi ucidh ugam kithabu m’adolane man ekele kud i kusika pa Elicama ma jagor. Yehudi ucaku some i ith ubimo man i ith judongo ma wijo ceke ma nwang’u ucungo i ng’et ubimo. 22 Nwang’u ubimo ubedo i ot mi koyo i dwi mir abung’wende,* man kpanu ma mac ubino liel i iye ubino i wang’e. 23 Saa ceke ma ka Yehudi usomo mbaya adek kunoke ang’wen ci, e ubimo thumo thenge maenone ku pala pa jagor man ebole i mac m’ubino liel i kpanu. Etimo kumeno cil ma kithabu m’adolane ceke uwang’ i mac m’ubino i kpanu. 24 Man ndiri ung’oy ungo i igi; nik’ebed ubimo kadi jutic pare ceke ma giwinjo lembuno zoo giyeco ngo bongu migi. 25 Kadok nwang’u Elnathan, Delaya, man Gemaria gipaku dhoggi ni ubimo nia kud ewang’ kithabu m’adolane de, re ewinjogi ngo. 26 M’umedo maeno, ubimo ng’olo ni Yeramel ma wod ubimo, Seraya ma wod Azriel, Celemia ma wod Abdel nia gimak Baruk ma jagor man jabila Yeremia, ento Yehova ukanugi.

27 I ng’ey m’ubimo uwang’u kithabu m’adola m’ubino ku wec ma Yeremia unyutho ni Baruk ukiewo, lembe pa Yehova ubino i bang’ Yeremia kendo, uyero kumae: 28 “Gam kithabu mange m’adola man kiew lembe ceke m’ubino iwi kithabu m’adola ma kwong’a i iye, niwacu kithabu m’adola m’Ubimo Yehoiakim mi Yuda uwang’u. 29 Man icikiri niyero pir Ubimo Yehoiakim mi Yuda kumae: ‘Yehova uwacu kumae: “Iwang’u kithabu maeni m’adola man iwacu kumae: ‘Pirang’o ikiewo i kithabu m’adolane nia “Ubimo mi Babeli bibino andha, ebinyotho ng’ombuni man ebiweko ngo dhanu kadi yedi i iye”?’ 30 Pieno Yehova uwacu pir Ubimo Yehoiakim mi Yuda kumae: ‘Ebibedo mbe ku ng’atu moko ma bijany iwi komker pa Daudi man avuje de jubiweko i lietho mi dieceng’ man i mwomo mi diewor. 31 Abikwayu en, nyikwaye,* man jutic pare giwodh wel pi kosa migi, man abikelo i wigi, iwi dhanu ma bedo i Yeruzalem man iwi dhanu mi Yuda nyoth ceke m’alar ayero nia abikelo i wigi, ento giwinjo ngo.’”’”

32 Yeremia ugamu kithabu m’adola mange man emiye i bang’ Baruk ma jagor ma wod Neria. Ekiewo lembe ceke ma Yeremia unyutho ire m’ubino i kithabu m’adola m’Ubimo Yehoiakim mi Yuda uwang’u i mac. Man jumedo lembe mange dupa ma kumeno i kume.

Girasoma mi dhu Alur (1993-2026)
Woki
Mondi
  • Alur
  • Ore ni ng'atini
  • Lembe m'imaru
  • Copyright © 2025 Watch Tower Bible and Tract Society of Pennsylvania
  • Cik mi tio kude
  • Cik mi Gwoko Lembamung'a
  • Paramètres de confidentialité
  • JW.ORG
  • Mondi
Ore ni ng'atini