Zaburi
Ni jatel wi wer. Wer.
66 Wu ng’om ceke, wukok ku kok mir aloci ni Mungu.
2 Wuwer wer mi pak* ni nyinge ma dwong’.
Wupak dwong’ pare.
3 Wuwac ni Mungu kumae: “Tic peri ng’oyo ndiri mire maa!
Nikum tego peri ma dit,
Kum judegini bimiel amiela ku lworo i weng’i.
4 Dhanu ceke m’i ng’om birumo cong’gi i weng’i;
Gibiwero wer mi pak iri;
Gibiwero wer mi pak ni nyingi.” (Sela)
5 Wubin wunen tic pa Mungu.
Tic m’etimo ni wot dhanu ng’oyo ndiri.
6 Eloko nam udoko ni ng’om m’uthwo;
Gikadhu kulo ku tiendgi.
Keca anyong’a unegowa i kume.
7 Ebimo nja ku nja nikum tego pare.
Wang’e n’i wi thek saa ceke.
Ju ma wigi tek kud gidodiri gigi. (Sela)
8 Wupak Mungu mwa, wu dhanu,
Man wuketh dwal mi pak pare uwinjere.
9 Ebegwokowa wabed kwo;*
Ebeweko ngo tiendwa ukier.
10 Kum ing’iyowa cuu, E Mungu;
Ililowa calu ma julilo ko mola ma tar.
11 Iroyowa i voi mi dwar;
Iketho ter ma rungojo i wiwa.*
12 Iweko dhanu ma tho e uwotho i wiwa;
Wakadhu kud i mac man kud i pii;
E iterowa kaka mi yom.
13 Abimondo i ot peri ku lam m’awang’a ma boo;
Abipong’o lembang’ola ma ku kwong’ m’atimo iri,
14 Ma dend dhoga ung’olo
Man ma dhoga uyero kinde m’abino i can.
15 Abithiero lam m’awang’a mi lei ma fulful iri
Karacelo ku yiro mi lam mi nyogi rombe.
Abithiero thwoni dhieng’ karacelo ku nyogi diegi. (Sela)
16 Wubin wuwinji, wun ceke ma wulworo Mungu,
Abikoro iwu gin m’etimo ira.*
17 Awak i bang’e ku dhoga
Man ayunge ku leba.
18 Ka nwang’u akanu gin moko ma timojo rac i adundena,
Nwang’u Yehova ubewinja ngo.
19 Ento Mungu uwinjo;
Eciko ithe i bang’ rwo para.
20 Pak ubed ni Mungu m’ukwero ngo rwo para
Kadi m’ucero ngo ira mer pare ma lokere ngo.