Zaburi
71 E Yehova, apondo i beng’i.
Timba lewic kud unyay i wiya ki.
2 Bodha man lara nikum bedopwe peri.
Cik ithi i bang’a* man ibodha.
3 Dok ira ni cana ma en e ot ma tek
Kaka m’acopo mondo i iye saa ceke.
Mii ng’ol kara jubodha,
Kum in i cana para man kaka ma tek para.
4 E Mungu para, lara kud i cing’ jatimrac,
Kud i the lwet ng’atu m’ubesenda mananu.
5 Kum in i genogen para, E Rwoth Ubimo ma Malu ngbir Yehova;
Ageni* niai ma fodi an aradu.
6 Acaku jengara i wii niai m’anyolara;
In re m’iwodha kud i maa.
Abepeki saa ceke.
7 Adoko ni udu ni dhanu dupa,
Ento in i kapondo para ma nging’ nging’.
8 Dhoga upong’ bik ku pak peri;
Abeyero pi leng’o peri dieceng’ duu.
9 Kud iwenja kinde m’atii;
Kud ikuna kinde ma tego para ubethum.
10 Judegina gibeweco rac i kuma,
Man ju ma gibeyenyo gikab kwo* para gibecamu gamba karacelo,
11 Giwacu kumae: “Mungu udaru kune.
Wuriem toke man wumake, kum ng’atu ma copo bodhe mbe.”
12 E Mungu, kud ibed bor kuda.
E Mungu para, bin pio pio ikonya.
13 Wek lewic umak judhoga*
Man girwiny.
Wek ju ma gibeyenyo can para
Gidong’ kud acidi man gidok pang’ pang’.
14 Ento an, abikuro asu;
Abipeki kendo nisagu.
15 Dhoga bikoro pi bedopwe peri,
Dieceng’ duu abikoro pi tic peri mi both,
Kadok gidupa dit m’acopo nyang’ i igi ngo.*
16 Abibino man abikoro pi tic mi tego peri,
E Rwoth Ubimo ma Malu ngbir Yehova;
Abinyutho pi bedopwe peri, peri kendi.
17 E Mungu, iponja niai ma fodi an aradu,
Man nitundo kawoni abetwong’o pi tic peri ma wang’u ijo.
18 Kadok kinde m’atii man wiya julwar, E Mungu, kud ikuna.
Wek anyuth pi tego* peri ni dhanu m’utuk ma bibino,
Man pi kero peri ni dhanu ceke ma bibino.
19 E Mungu, bedopwe peri utundo malu ngbir;
Itimo giki ma dongo;
E Mungu, ng’a ma calu ini?
20 Kadok nwang’u iketho anwang’ara ku masendi man can dupa,
Dwok tego kendo i kuma;
Wodha kud i thuc* mi ng’om.
21 Dong’ med dwong’ para,
Tiek kuma gbur man juk cwinya.
22 E abipeki* ku jamgoyo wer ma juthondhe
Pi bedoleng’ peri, E Mungu para.
Abiwero iri wer mi pak kud adungu,
E in m’i Ng’atu ma leng’ mir Israel.
23 Dend dhoga bikok ku mutoro kinde m’abewero iri wer mi pak,
Kum ibodho kwo para.*
24 Leba biweco pi* bedopwe peri dieceng’ duu,
Kum ju ma gibeyenyo nia anyothara gibidong’ ku lewic man acidi.