Zaburi
Wer pa Daudi.
141 E Yehova, abelwong’o in.
Bin ikonya nyapio pio.
Cik ithi kinde m’abelwong’i.
2 Dong’ rwo para ubed calu udok ma ng’wice ng’ar ma juyiko i weng’i,
Cinga m’ating’o malu ubed calu girathiera mi nying cam mir uthieno.
3 E Yehova, keth jakur ukur dhoga,
Keth jakur i dhugola mi dend dhoga.
4 Kud iwek adundena ucidh ki i kum gin moko ma rac,
Kara kud adikara i lembe ma reco ku dhanu ma reco;
Timba kud adikara ki i foc migi.
5 Ka won bedopwe ugoya, eno bibedo ayi m’enyutho ko ira mer ma lokere ngo;
Kan ejuka, ebibedo calu mo i wiya,
Ma wiya bikwero ki ngo.
Abimedara asu nirwo pire kadok i saa mi peko pare.
6 Kadok nwang’u jubolo jupoklembe mi dhanu piny kud i lak cana,
Re asu gibiciko ithgi i kum lembe para, pilembe gi mit.
7 Tap calu kinde ma ng’atini ubefuro ng’om man ebegoyo iye,
Julalu cogowa de kumeno i dhu Liel.*
8 Ento wang’a ubeneno beng’i, E Rwoth Ubimo ma Malu ngbir Yehova.
Apondo i beng’i.
Kud ikab kwo para cen.*
9 Gwoka kud i lak uwic ma giciko ira,
Kud i uwic mi jutimrac.
10 Jutimrac gibipodho karacelo gin ceke i voi ma giciko de gin,
An ke nwang’u abekadhu para museme kud i ng’ete.