Zaburi
Ni jatel wi wer. Wer pa Daudi.
140 Lara, E Yehova, kud i cing’ jutimrac;
Gwoka kud i cing’ weg rop,
2 Gi dhanu ma gipangu lembe ma rac i adundegi
Man gitugo ali dieceng’ duu.
3 Gipaku lebgi calu pa thwol;
Kwir p’urobi n’i the dend dhoggi. (Sela)
4 E Yehova, gwoka kud i cing’ jutimrac;
Bodha kud i cing’ weg rop,
Gi ju ma gibesayu nicika i uwic.
5 Jukuhaya giciko ira uwic;
Giciko ira voi ku thol i dhu gengi.
Giciko uwic ira. (Sela)
6 Awacu ni Yehova kumae: “In itie Mungu para.
E Yehova, winj kwac para m’akwayu ko kony.”
7 E Rwoth Ubimo ma Malu ngbir Yehova, Jalarna ma tek,
Igwoko wiya i nindo mi lwiny.
8 E Yehova, kud ipong’ yeny mi jutimrac.
Kud iketh lembe ma gipangu urombi maru gibidodiri. (Sela)
9 Dong’ wi ju ma gitieka tingili
Uumere ku lembe ma reco ma dend dhoggi uyero.
10 Dong’ cugimac ucwii i wigi.
Dong’ jubolgi i mac,
I vur ma thuc,* kara kud giai kendo.
11 Dong’ jayer nying’ kud unwang’ kaka iwi ng’om.
Dong’ lembe ma rac uriem tok jurop man ugoygi cen.
12 Ang’eyo nia Yehova bicero bang’ ju ma ka kitgi mbe
Man ebipoko lembe i atira ni jucan.
13 Andhandha weg bedopwe gibidwoko foyofoc ni nyingi;
Ju m’atira gibibedo i weng’i.