Zaburi
Ni jatel wi wer. Wer pa Daudi.
139 E Yehova, iyenyo iya man ing’eya.
2 Ing’eyo kinde m’abedo piny man kinde m’aai malu.
Ing’iyo paru para ku bor.
3 Inena* kinde m’abewotho man kinde m’avuto piny;
Ing’eyo yo para ceke.
4 I wang’ ma wec moko uwok iwi leba,
Nen! E Yehova, idaru ng’eye cuu.
5 Itwoda tingili yor i ng’eya man yor i wang’a;
Man iketho cingi i wiya.
6 Ng’eyong’ec ma kumeno acopo nyang’ i iye ngo.*
En’i malu dit, acopo tundo i bang’e ngo.*
7 Acopo ringo kani ni tipo peri,
Man acopo pondo kani kud i weng’i?
8 Kadok nwang’u aidho i polo, ibibedo keca,
Man kadok nwang’u aketho kavuto para i Liel,* nen! ibibedo keca.
9 Ka nwang’u aringo ku vomb mombwa
Pi nibedo i dhu nam ma bor mandha,
10 Nwang’u kuca de cingi ubetelo wiya
Man nwang’u cingi mir acwic ubemaka.
11 Kan awacu kumae: “Andhandha mudho biuma!”
E nwang’u diewor m’utieka ubedoko ni der.
12 Kadok nwang’u mudho de ubebedo ngo col akeca iri,
Ento nwang’u diewor ubelero calu dieceng’;
Iri mudho tie rom ku der.
13 Kum icwiyo nying rong’ini para;
Igwoka* kud i maa.
14 Abepeki pilembe icwiya i ayi ma nyayu ndiri man ma wang’u ijo.
Tic peri giwang’u ijo,
Ang’eyo* maeni cuu.
15 Cogona upondo ngo iri
Kinde ma jubino cwiya i amung’,
Kinde ma jubino cwiya karacelo i ka ma thuc mi ng’om.
16 Weng’i unena ma fodi an’i maa;
Wathkuma ceke gigoriri i buku peri
Nimakere ku nindo ma jucwiyogi i iye,
I wang’ ma fodi acel m’i kindgi de mbe.
17 Paru peri pire tie tek ira mire maa!
E Mungu, wendgi tie lee dit!
18 Kan apimo nia akeakwangi, gikadhu wend nying kwiyo.
Kinde m’acew, nwang’u asu atie karacelo kudi.*
19 E Mungu, ka nwang’u ndhu inego jutimrac ba!
Nwang’u weg rop* gilal kud i vuta,
20 Gi ju ma giyero lembe ma rac i kumi, ma gitie ku paru ma rac;*
Gitie judegi peri ma gibetiyo ku nyingi i ayi m’umaku piny ungo.
21 E Yehova, nyo adagu ngo ju m’udegi,
Man adagu ngo ku rac ju ma gibejai iri?
22 Adagugi ku rac;
Gidoko judegi para.
23 Yeny iya, E Mungu, man ng’ey adundena.
Ng’iya man ng’ey paru m’ubedieng’o cwinya.*
24 Nen ka nyo yo moko ma rac utie i iya,
Man tel wiya kara akwo rondo ku rondo.