Isaya
6 I oro m’Ubimo Uzia utho i iye, aneno Yehova ujany iwi komker m’udodere man m’uting’ere malu, man dhu kanzu pare upong’o i hekalu. 2 Juserafi ucungo yor i wiye; kagi ceke gibedo ku vombgi abusiel abusiel: vombgi ario giumo ko wang’gi, vombgi ario giumo ko tiendgi man vombgi ario ke gituk ko.
3 Gilwong’iri i kindgi man giwacu kumae:
“Yehova mir udul utie leng’, e leng’, e leng’.
Ng’om zoo upong’ ku dwong’ pare.”
4 Man riu mi the dhugola uyengere nikum dwal mi kok,* man yiro upong’o i ode.
5 E ayero kumae: “Can i wiya!
Adaru tho para athoa* eni,
Kum an a dhanu ma dend dhoge cido,
Man abekwo de i kind dhanu ma dend dhoggi cido;
Kum wang’a uneno Ubimo, Yehova mir udul ku kume!”
6 E jaserafi acel utuk ubino i bang’a, man cugimac m’eting’o kud iwi pemlam ku ramak ubino i cinge. 7 Emulo dhoga man ewacu kumae:
“Nen, gini udaru mulo dend dhogi.
Kier peri ukabere,
Man dubo peri uwekere.”
8 I ng’eye awinjo dwand Yehova ubepenjo kumae: “Abioro ng’a, man ng’a ma bicidho iwa?” E adwoko kumae: “Anuti eni! Ora!”
9 Man eyero kumae: “Cidhi man iyer ni dhanu maeni kumae:
‘Wubiwinjo lembe kendo kendo,
Ento wubinyang’ ungo;
Wubineno piny kendo kendo,
Ento wubinwang’u ngo ng’eyong’ec moko ci.’
10 Dwok adunde dhanu maeni nwang’,
Cul ithgi
Man mwon wang’gi,
Kara kud ginen piny ku wang’gi
Man kud giwinj lembe ku ithgi,
Kara adundegi kud unyang’ i lembe,
Gimaru dwogo ku ng’eygi man gimaru key.”
11 E agam apenjo kumae: “Nitundo awene, Ee Yehova?” Edwoko kumae:
“Nitundo m’adhurane gibirwombiri man gibidong’ ni uvuru ma ng’atu moko mbe ma bedo i igi,
Ma udi bibedo ma dhanu mbe i igi,
Man ma ng’ombe bidong’ ko ni uvuru man kende;
12 Nitundo ma Yehova bitero dhanu bor mandha
Man kaka m’udong’ kende i ng’ombe bimaku kabedo ma lac mandha.
13 “Ento apaje moko bidong’ asu i iye, man jubidowang’e kendo, calu yen ma dit man calu yen m’ujany ma ka jung’ondo, cudhone dong’; kodhi ma leng’ re ma bibedo cudhone.”