Yeremia

35 Lembe pa Yehova ubino i bang’ Yeremia i rundi pa Yehoiakim ma wod Yosiya m’ubimo mi Yuda, uyero kumae: 2 “Cidh i bang’ ju pa Rekab man iwec kugi; kelgi i ot pa Yehova i kusika acel ma jucamu i iye man i ng’eye mii igi pigulok kara gimadhi.”

3 E agamu Yazania ma wod Yeremia ma wod Habazinia, umego pare, wote ceke man ju pa Rekab zoo 4 man akelogi i ot pa Yehova. Aketho gimondo i kusika ma wod Hanan ma wod Igdalia ma dhanu pa Mungu mandha gicamu i iye; kusikane ubino i ng’et kusika ma judongo ma wijo gicamu i iye ma n’i yor iwi kusika ma Maaseya ma wod Calum ma jakur dhugola camu i iye. 5 I ng’eye aketho kikombe man kopo ku pigulok bik i igi i wang’ dhanu maeno mi ju pa Rekab man awacu igi kumae: “Wumadh pigulok.”

6 Ento giwacu kumae: “Wabimadhu ngo pigulok, pilembe Yehonadab* ma wod Rekab ma kwaruwa ung’olo iwa kumae: ‘Kud wumadh pigulok nyanok de, nik’ebed wun kadi wotwu. 7 Man kud wugier ot, kud wucoy kodhi, kud wupidh cam kadi kud wubed ku podho mir ulok. Ento saa ceke wucikuru nibedo i hema kara wukwo pi nindo ma lee i ng’om ma wubedo i iye calu umondo.’ 8 Pieno wabemedara niworo dwand Yehonadab ma wod kwaruwa ma Rekab i lembe ceke m’eng’olo iwa ma wabemadhu ko ngo nyanok de pigulok, wan, mon mwa, wotwa man awiya mwa ma nyir. 9 Man wagiero ngo udi pi nibedo i igi, wambe ku podho mir ulok kadi podho kunoke kodhi. 10 Wabemedara nikwo i hema man niworo lembe ceke ma Yehonadab* ma kwaruwa ung’olo iwa. 11 Ento kinde m’Ubimo Nebukadnezar* mi Babeli uidho i kum ng’ombuni, wayero kumae: ‘Wubin, wek wamondu i Yeruzalem kara wabothu kud i cing’ jurumony mi Jukaldayo man mi ju Asiria,’ e kawoni dong’ wabekwo i Yeruzalem.”

12 Man lembe pa Yehova ubino i bang’ Yeremia, uyero kumae: 13 “Yehova mir udul ma Mungu mir Israel uwacu kumae: ‘Cidh iyer ni dhanu mi Yuda ku dhanu ma bedo i Yeruzalem kumae: “Nyo saa ceke abed akwayuwu ngo nia wuwor lembe para?” Yehova wacu. 14 “Yehonadab ma wod Rekab ung’olo ni nyikwaye nia kud gimadh pigulok, man gitimo lembe m’eng’olo igi, gimadhu ngo pigulok cil tin eni. Pieno giworo lembe ma kwarugi ng’olo. Ento an aweco i beng’wu kendo kendo,* re wuwora ngo. 15 Man amedara nioro jutic para ma jubila i beng’wu, aorogi kendo kendo* pi niwacu kumae: ‘Akwayuwu, wuloki, ng’atuman kud i yo pare ma rac, man wutim lembe m’atira! Kud wulub tok mungu mange man kud wutim igi. E wubimeduru nibedo i ng’om maeni m’amiyo iwu man ni kwaruwu.’ Ento wuciko ngo ithwu man wuwinja ngo. 16 Nyikway Yehonadab ma wod Rekab utimo lembe ma kwarugi ung’olo igi, ento dhanu maeni uwinja ngo.”’”

17 “Pieno Yehova Mungu mir udul ma Mungu mir Israel uwacu kumae: ‘Nen, abekelo iwi Yuda man iwi dhanu ceke ma bedo i Yeruzalem nyoth ceke m’acimogi pire, kum aweco i bang’gi ento giwinjo ngo, amedara nilwong’ogi ento giyii ngo.’”

18 E Yeremia uyero ni ju pa Rekab kumae: “Yehova mir udul ma Mungu mir Israel uwacu kumae: ‘Calu ma wuworo lembe ma kwaruwu ma Yehonadab ung’olo man wubemeduru nitimo lembe ceke m’eng’olo, ma wubetimo ko tap lembe m’eng’olo iwu, 19 Yehova mir udul ma Mungu mir Israel uwacu kumae: “Nyikway Yehonadab ma wod Rekab bikoso ngo nyanok de nitimo ira.”’”