Zaburi
Wer p’Asaf.
83 E Mungu, kud ibed ling’;
Kud iling’ kadi kud ibed ting’, E in m’i Mungu.
2 Kum nen! judegi peri ginyayu yakini;
Ju ma gidegi gibetimo ku kuhaya.*
3 Gibepangu lembe i amung’ ku rieko ma rac i kum dhanu peri;
Gibecamu gamba i kum ju ma pigi tek i ii.*
4 Giwacu kumae: “Wubin, wek wanyothu thek migi cen,
Kara kud jupoy kendo nyanok de i kum nying’ Israel.”
5 Gibepangu lembe karacelo i adundegi;
Gitimo lembariba i kumi:
6 Hema mi Juedom man mi Juismael, Moab man Juhagri,
7 Gebal man Amon man Amalek,
Filistia karacelo ku dhanu mi Turo.
8 Asiria de udikere karacelo kugi;
Gibediko cing’gi ku* wot Lot. (Sela)
9 Tim igi tap calu m’itimo ni Midian,
Calu m’itimo ni Sisera man Yabin i dhu kulo* mi Kicon.
10 Ginyothiri i En-dor;
Gidoko ni uweyo iwi ng’om.
11 Keth weg yung migi gidok calu Oreb man Zeeb
Man judongo ma wijo* migi, calu Zeba giku Zalmuna,
12 Kum giwacu kumae: “Wek wamak ng’om maeni ma Mungu bedo i iye.”
13 E Mungu para, keth yamu ulekgi calu ucok m’ubewirere,
Keth yamu ulalgi calu lum.
14 Calu mac ma wang’u luli,
Calu lebmac ma nang’u gudi,
15 Pieno riem tokgi kud avuvu peri
Man nyay lworo i igi ku vira peri.
16 Um* wang’gi ku lewic,
Kara gisay nyingi, E Yehova.
17 Dong’ lewic unyay i wigi man lworo umakgi pi rondo ku rondo;
Dong’ gidok pang’ pang’ man ginyothiri;
18 Kara dhanu ging’ey nia in, ma nyingi tie Yehova,
In i kendi m’i Ng’atu ma Malu ngbir iwi ng’om ngung’.