Zaburi
Ni jatel wi wer; iwi Gitith.* Wer pa wot Kora.
84 Amaru hema ma dit mi thier peri mire maa,
E Yehova mir udul!
2 Ng’eyong’ec para ubeyenyo,
Eyo, avoc
Ku yenyo lela pa Yehova.
Adundena man ring’ kuma ubekok ku mutoro ni Mungu ma kwo.
3 Kadok winyo de nwang’u kaka m’ebedo i iye i ot peri
Man ugwelo de giero ode,
Kaka m’etungo i iye nyithindhe,
Ceng’ini ku pemlam peri ma dit, E Yehova mir udul,
Rwoth para man Mungu para!
4 Jumutoro gi ju ma gibedo i ot peri!
Gibemediri niyungi. (Sela)
5 Jumutoro gi dhanu ma tego migi ai i beng’i,
Ma giketho adundegi iwi gengi ma dongo.
6 Kinde ma gibekadhu kud i Poga mi Baka,*
Gidwoke ni kabedo ma pii n’i iye;
Man koth ma kwong’a coro* mugisa i wiye.
7 Gibiwotho ma tego mi kumgi bimedere ameda;
Ng’atuman m’i kindgi binyuthere i wang’ Mungu i Sayuni.
8 E Yehova Mungu mir udul, winj rwo para;
Winji, E Mungu pa Yakobo. (Sela)
9 Nen, ban mwa man Mungu mwa,*
Nen wang’ ng’atu ma juwiro peri.
10 Kum nindo acel i lela peri tie ber nisagu nindo elufu acel (1 000) kaka mange!
Ang’iyo nicungo i wang’ dhugola mi ot pa Mungu para
Kakare nibedo i hema mi jutimrac.
11 Kum Yehova Mungu en e ceng’ man ban;
Emiyo bero man dwong’.
Yehova bicero ngo gin moko ma ber acel de
Ni ju m’uwotho i bedocu migi.
12 E Yehova mir udul,
Jamutoro tie ng’atu m’uketho genogen pare i wii.