Zaburi
Ni jatel wi wer. Wer pa wot Kora.
85 E Yehova, inyutho bero ni ng’om peri;
Idwogo nyikway Yakobo ma jutero i ng’eca.
2 Iweko kier mi dhanu peri;
Iumo wi dubo migi ceke. (Sela)
3 Ibimo wi ng’eicwiny peri ceke;
Ilokiri cen kud i kwinyo peri m’uopo.
4 Dwokwa kakawa,* E Mungu mi both mwa,
Kab ng’eicwiny peri cen kud i kumwa.
5 Nyo kwinyo bimeki i kumwa pi rondo ku rondo?
Nyo ng’eicwiny peri bimedere niai i kum dhanu m’utuk cil i kum dhanu m’utuki?
6 Nyo ibidwoko ngo tego i kumwa kendo
Kara anyong’a uneg dhanu peri i ii?
7 Nyuth iwa mer peri ma lokere ngo, E Yehova,
Man mii iwa both peri.
8 Abiwinjo lembe ma Mungu mandha Yehova biyero,
Kum ebiweco pi kwiyocwiny ni dhanu pare,
Ni jupare ma gibegwoko bedoleng’ migi,
Re dong’ kud gigeniri gigi kendo nisagu.
9 Andhandha both pare ni ceng’ini ku ju ma gibelwore,
Kara dwong’ pare ubed i ng’om.
10 Mer ma lokere ngo man bedoleng’ gibirombo karacelo;
Bedopwe man kwiyocwiny gibigwakiri i kindgi.
11 Bedoleng’ bitwii kud i ng’om,
Man bedopwe bineno piny niai kud i polo.
12 Eyo, Yehova bimiyo gin ma ber,*
Man ng’om mwa bicego nyinge.
13 Bedopwe biwotho i wang’e
Man ebiyiko yo ni tiende.