Yeremia
3 Dhanu ubepenjo kumae: “Tek nico moko uriemo dhaku pare, man dhakune uweke ucidh ugiero ng’atu mange, nyo nicone copo dogame kendo?”
Nyo ng’ombe cido ngo zoo?
“Itimo asara ku jumer dupa,
Man nyo kawoni kwayu wudwog i bang’a?” Yehova wacu.
2 “Ng’ay weng’i i bang’ ungulu gudi* ma lelele man inen.
Kakani ma juvuto ngo kudi i iye ku kero?
Ibedo i dhu yo pi nikurogi,
Calu jawotho* i langa.
Imediri ninyotho ng’ombe
Kud asara peri man timo peri ma reco.
3 Pieno jucero koth kud ucorere,
Man koth umbe i saa pa koth.
Lewic umbe i the weng’i calu dhaku ma won asara;
Ikwero lewic kud unegi.
4 Ento kawoni ibelwong’a ma tek kumae:
‘Vwa, itie jamerna mir aradu para!
5 Nyo ng’atini romo bedo kud akece rondo ku rondo,
Kunoke nikayu lembe saa ceke?’
Eno tie lembe m’iyero,
Ento ibemediri nitimo lembe ma reco m’itie ku copo mi timo.”
6 I rundi p’Ubimo Yosiya, Yehova uyero ira kumae: “‘Nyo ineno dubo ma Israel utimo? Eidho iwi gudi ceke ma wiw man i the yen ceke m’ujany pi nitimo asara. 7 Kadok i ng’ey m’etimo lembuno ceke de, amedara niyero ire nia edwog i bang’a, ento edwogo ngo; man Yuda umedere nineno nyamin ma jacibe. 8 Saa m’aneno lembuni, ariemo Israel ma jadubo cen ku waraga mi lalu gamiri mi magwei nikum abor pare. Ento lworo maku ngo Yuda ma nyamin ma jacibe; en de ecidh etimo asara. 9 Eneno asara pare ni gin ma rac ungo, emedere nicido ng’ombe man nitimo abor ku kidi man ku yen. 10 Kadok ku lembuno zoo de, Yuda ma nyamin ma jacibe udwogo ngo i bang’a kud adundene ceke, ento kende kende kud umbili,’ Yehova wacu.”
11 I ng’eye Yehova uyero ira kumae: “Israel ma jadubo unyuthere gire nia e pwe nisagu Yuda ma jacibe. 12 Cidh itwong’ lembe ma e yo malu:
“‘“Dwogi, Ee in Israel ma jajai,” Yehova wacu.’ ‘“Abineni ngo ku ng’eicwiny,* kum an a mandha,” Yehova wacu.’ ‘“Abibedo ngo kud akece rondo ku rondo. 13 Kende kende yii kosa peri, kum ijai ni Yehova Mungu peri. Imediri nilalu bero* peri ni juwirok* i the yen ceke m’ujany, ento iworo ngo dwanda,” Yehova wacu.’”
14 “Wudwogi, wu wot m’ujai,” Yehova wacu. “Kum adoko rwoth mwu mandha;* abigamuwu acel kud i adhura ma e, man ario kud i suru ma e, e abikelowu i Sayuni. 15 Abimiyo iwu jukwac m’adundena yenyo man gibitungowu ku ng’eyong’ec man rieko. 16 Wendwu binyay man wubicego nyingwu i ng’om i nindo maeca,” Yehova wacu. “Gibiyero ngo kendo kumae: ‘Sanduku mi lembariba pa Yehova!’ Lembene bidwogo ngo i adundegi kadi gibiparu ngo pire, avane de binegogi ngo man jubiyiko ngo mange. 17 I rundi maeca, jubilwong’o Yeruzalem nia komker pa Yehova; man thek ceke bicokiri karacelo pi nipaku nying’ Yehova i Yeruzalem, man gibilubo ngo kendo tok adundegi ma rac ku thwon.”
18 “I nindo maeca, ot pa Yuda biwotho karacelo ku ot pa Israel, man gibibino karacelo niai i ng’om ma yo malu nitundo i ng’om m’amiyo ni kwaru peri ni giralaga. 19 Aparu nia ‘calu m’akethi i kind wota man amiyo iri ng’om ma leng’ mandha, giralaga ma leng’ m’usagu i kind thek!’* Aparu bende nia ibilwong’a ‘Vwa!’ Man ibilokiri ngo cen ku lubo toka. 20 ‘Andhandha calu dhaku ma wondo cware* man eweke, kumeno bende, Ee ot mir Israel, iwonda,’ Yehova wacu.”
21 Dwal ubewinjere iwi ungulu gudi ma lelele,
Dhanu mir Israel ubewak man gibepaku dhoggi,
Kum gidaru nyotho yo migi;
Wigi wil ku Yehova Mungu migi.
22 “Wudwogi, wu wot m’ujai.
Abikeyo jai mwu.”
“Wani eni! Wabino i beng’i,
Kum in, Ee Yehova, itie Mungu mwa.
23 Andhandha ungulu gudi man woy mi gudi tie vupo.
Andhandha both mir Israel n’i Yehova Mungu mwa.
24 Ento niai i aradu mwa, piny mir acidi* ucamu piny ceke ma kwaruwa gitimo tic ma tek pire,
Rombe ku diegi migi man dhieng’ migi,
Wotgi man nyiggi.
25 Dong’ wavutu i acidi mwa,
Man lewic mwa uumwa,
Kum wadubo ni Yehova Mungu mwa,
Wan ku kwaruwa niai i aradu mwa cil tin eni,
Man waworo ngo dwand Yehova Mungu mwa.”