Zaburi
91 Ng’atu moko ci m’ubedo i kaka m’upondo pa Ng’atu ma Malu ngbir,
Bibedo i the tipo pa Jategokpo.
2 Abiyero ni Yehova kumae: “Itie kapondo para man kaka ma tek para,
Mungu para m’ageno.”
3 Kum ebibodhi kud i uwic pa jacik winyo,
Kud i thong’om ma kelo nyoth.
4 Ebiumi* kud ukondo pare,
Man ibipondo i the vombe.
Bedoleng’ pare bibedo iri ni ban ma lac man ni gang’ mi gwok.
5 Ndiri binegi ngo i kum gin ma nyayu lworo ku diewor,
Kadi i kum athero m’uberingo ku dieceng’,
6 Kadok i kum thong’om m’ubewotho kaka ma col,
Kadi i kum nyoth ma wok ku dieceng’.
7 Dhanu elufu acel (1 000) bipodho i ng’eti
Man dhanu elufu apar (10 000) yor i cingi ma yor acwic,
Ento in ebitundo ngo i kumi.
8 Ibineno lembe maeno anena kende ku weng’i
Kinde m’ibeneno matira* ma jubemiyo ni jutimrac.
9 Pilembe iwacu kumae: “Yehova tie kapondo para,”
Iketho Ng’atu ma Malu ngbir ni kabedo* peri;
10 Can moko mbe ma bibino i kumi,
Man masendi moko mbe ma bicoro ceng’ini i kum hema peri.
11 Kum ebing’olo piri ni jumalaika pare,
Pi nigwoki i yo peri ceke.
12 Gibijoli i cing’gi,
Kara tiendi kud utwang kidi.
13 Ibiwotho iwi nyathin umvor man urobi;
Ibinyono umvor ma ng’ute jumuzuga man thwol ma dit i the tiendi.
14 Mungu wacu kumae: “Abibodhe pilembe emara.*
Abigwoke pilembe eng’eyo nyinga.
15 Ebilwong’a man abidwoko ire lembe.
Abibedo karacelo kude i saa mi peko.
Abibodhe man abiyunge.
16 Abiketho ebikwo pi nindo ma lee,
Man abiketho ebineno tic mi both para.”*