Yeremia
23 “Can iwi jukwac m’ubenyotho man m’ubelalu rombe mi luba para!” Yehova wacu.
2 Pieno, Yehova Mungu mir Israel uyero pi jukwac m’ubekwayu dhanu para kumae: “Wulalu rombe para; wumeduru nilalu igi, man wukwanu ngo kugi.”
“Pi thelembe maeno, abiloko wang’a i kumwu pi timo mwu ma reco,” Yehova wacu.
3 “I ng’eye, abicoko dhu dong rombe para m’udong’ kud i ng’om ceke m’agam alalugi i iye, man abidwogogi i luba migi; e gibinyol man gibinyay. 4 Man abing’iyo igi jukwac ma bikwayugi andha. Lworo kadi ndiri de binegogi ngo kendo, man acel de mbe ma birwinyo,” Yehova wacu.
5 “Nen! nindo bebino,” Yehova wacu, “m’abiketho i iye jang yen* ma pwe biloth ni Daudi. E ubimo bicamu ker, ebibedo riek, man ebimoko kii i kum pokolembe m’atira man i kum bedopwe i ng’ombe. 6 I rundi pare, jubibodho Yuda, man Israel bibedo museme. Man jubilwong’e ku nying’ ma e: Yehova tie bedopwe mwa.”
7 “Ento nindo bebino,” Yehova wacu, “ma gibiyero ngo kendo kumae: ‘Calu andha Yehova bedo kwo, en m’ewodho dhanu mir Israel kud i ng’om mi Misiri!’ 8 Ento gibiyero kumae: ‘Calu andha Yehova bedo kwo, en m’ewodho man edwogo nyikway wot Israel niai kud i ng’om ma yo malu man niai kud i ng’om ceke ma nwang’u elalugi i iye.’ E gibibedo i ng’om migi ma dhe.”
9 Pi jubila:
Cwinya tur yor i iya.
Cogona ceke ubemiel krr.
Atie calu ng’atu m’umer
Man calu ng’atu ma pigulok ukadhu i wang’e,
Nikum Yehova man nikum lembe pare ma leng’.
10 Kum weg abor upong’ i ng’ombe;
Alam uketho ng’ombe ubewak
Man luba mi langa udaru thwo.
Gibetimiri rac man gibetiyo ku tego migi de rac.
11 “Jubila ku julam ceke udaru cido.*
Anwang’u timo migi ma reco kadok i ot para buu,” Yehova wacu.
12 “Pieno, gengi migi bidoko foth man bicido;
Jubicwalugi man gibipodho.
Kum abikelo nyoth i wigi
I oro ma gibiwodho i iye wel,” Yehova wacu.
13 “Man aneno lembe ma judagu i bang’ jubila mi Samaria:
Gibeewo lembila ku nying’ Baal,
Man gibeketho dhanu para Israel ukier.
14 I bang’ jubila mi Yeruzalem de aneno lembe ma rac mandha:
Gibetimo abor man gibewotho i ndra;
Gibetego cwiny jutimrac,*
Man gibelokiri ngo kud i timo migi ma rac.
Ira, gin ceke gi calu Sodoma,
Man dhanu ma bedo i iye utie calu Gomora.”
15 Pieno, Yehova mir udul uyero pi jubila kumae:
“Nen, abeciketho gicam yendadra
Man abimiyo gimadh pii m’adra n’i iye.
Kum jai unyay i die ng’ombe zoo niai i bang’ jubila mi Yeruzalem.”
16 Yehova mir udul uwacu kumae:
“Kud wuwinj wec mi jubila m’ubeewo lembila iwu.
Gibewondowu.*
Gin ma wok i wang’ ma gibeyero iwu uai i adundegi gigi,
Ento i dhu Yehova ngo.
17 Gibeyero kendo kendo ni ju m’ubecaya kumae:
‘Yehova uwacu kumae: “Wubikwo ku kwiyocwiny.”’
Man ni dhanu ceke m’ubelubo tok adundegi ku thwon, giyero kumae:
‘Nyoth biwok ungo i wiwu.’
18 Kum ng’a m’ucungo i kind jurimo ma ceng’ini mandha pa Yehova
Pi nineno man pi niwinjo wec pare?
Ng’a m’uciko ithe i kum wec pare pi niwinje?
19 Nen! ng’eicwiny ma lake tek pa Yehova bituk calu avuvu;
Ebiwinyere iwi jutimrac calu vira.
20 Ng’eicwiny pa Yehova biloko ngo ku ng’eye
Nitundo m’ebipong’o man ebitimo lembe m’ekeco i adundene.
I dong nindo mir ajiki, wubinyang’ terere i lembuno.
21 Aoro ngo jubila, ento giringo.
Aweco ngo i bang’gi, re gilund giewo lembila.
22 Ento ka nwang’u gicungo i kind jurimba ma ceng’ini mandha,
E nwang’u giketho dhanu para uwinjo lembe para,
Man nwang’u giketho giloko kud i yo migi ma rac man kud i timo migi ma reco.”
23 “Nyo atie ndhu Mungu ku ceng’ini kende?” Yehova wacu. “Nyo atie ngo bende Mungu ku bori?”
24 “Nyo ng’atu moko romo pondo kaka ma kut m’aromo nene ngo i iye?” Yehova wacu.
“Nyo apong’o ngo polo man ng’om?” Yehova wacu.
25 “Awinjo jubila m’ubeewo lembila mi ndra ku nyinga, gibeyero kumae: ‘Aleko lek! Aleko lek!’ 26 Jubilane gibimediri niewo ndra nitundo awene? Gibeewo ndra m’uai i adundegi gigi. 27 Gikeco niketho dhanu para uwil ku nyinga ku lek ma gibekoro i kindgi, tap calu ma kwarugi uwil ku nyinga nikum Baal. 28 Dong’ jabila m’uleko ukor lekne, ento ng’atu ma tie ku lembe para ucikere niyero lembe parane kubang’e kubang’e.”
“Cung’ cam utie ang’o i wang’ nying cami?” Yehova wacu.
29 “Nyo lembe para tie ngo tap calu mac?” Yehova wacu, “man nyo e calu ngo nyondo ma ng’enyo cana?”
30 “Pieno nen, an’i kum jubila,” Yehova wacu, “ma gibekwalu lembe para i kindgi.”
31 “Nen, an’i kum jubila,” Yehova wacu, “ju m’ubetiyo ku lebgi pi niyero kumae: ‘Ewacu!’”
32 “Nen, an’i kum jubila m’ubeewo lek mi ndra,” Yehova wacu, “m’ubekoro igi man m’ubeketho dhanu para ukier nikum ndra migi man luliri migi.”
“Ento aorogi ngo kadi ang’ola de ang’olo ngo igi. Pieno, gibimiyo ngo bero moko nyanok de ni dhanu maeni,” Yehova wacu.
33 “Man tek dhanu maeni, kunoke jabila, kadike jalam moko upenji kumae: ‘Ter* pa Yehova utie ang’o?’ Icikiri nidwoko igi kumae: ‘“Wun re ma wutie ter! Man abibayuwu cen,” Yehova wacu.’ 34 Man ni jabila, kunoke jalam, kadike ng’atu m’ubeyero nia ‘eni tie ter* pa Yehova!’ abiloko wang’a i kum ng’atune man i kum juruot pare. 35 Ng’atuman m’i kindwu ubepenjo jawodhe man umin kumae: ‘Yehova udwoko ang’o? Man Yehova uyero ang’o?’ 36 Ento kud wuwec kendo nyanok de pi ter pa Yehova, kum wec pa ng’atuman m’i kindwu re m’utie ter, man wuloko lembe pa Mungu ma kwo, Yehova mir udul ma Mungu mwa.
37 “Ibiyero ni jabila kumae: ‘Yehova udwoko iri ang’o? Man Yehova uyero ang’o? 38 Man tek wubemeduru niwacu nia “ter* pa Yehova!” Yehova uwacu kumae: “Calu ma wubeyero nia ‘wec maeni utie ter pa Yehova,’ i ng’ey m’ayero iwu nia ‘kud wuyer nia “ter pa Yehova!”’ 39 Wunen! abiting’owu malu man abibayuwu cen kud i vuta, wun kud adhura m’amiyo iwu man ni kwaruwu. 40 E abikelo lewic ma rondo ku rondo man acidi ma rondo ku rondo i wiwu, ma wijo biwil ungo pire.”’”