Yeremia
12 Itie pwe, Ee Yehova, kinde m’abewagara i beng’i,
Kinde m’abeweco kudi pi pokolembe m’atira.
Re pirang’o lembe mi jutimrac berombo,
Man pirang’o ju ma cibojo umbe ku lworo?
2 Ipidhogi man ulaggi nyang’.
Gidongo man gicego nying’gi.
Giweco piri saa ceke, ento ini bor ku pidoic migi m’upondo.*
3 Ee Yehova, ing’eya cuu man inena;
Ing’iyo adundena man inwang’u nia etie i acel kudi.
Koygi cen calu rombe ma jubecinego,
Man kethgi ang’et pi ceng’ mi nek.
4 Ng’om bithwo nitundo awene
Man uboko mi lum ceke bibedo ma githwo nitundo awene?
Nikum racu mi ju ma bedo i iye,
Yedi man winyo m’i iye utho.
Kum giyero kumae: “Ebeneno ngo lembe ma binwang’uwa.”
5 Tek niringo ku dhanu m’uberingo ku tiendgi de ubeoli,
Dong’ ibiromo ringo kwaya i dhu riuni?
Kadok ibenwang’u nia cwinyi tek i ng’om mi kwiyocwiny,
Re ibitimiri nenedi i kind vunga m’ujiyere m’i dhu Yordan?
6 Kadok umego peri ma buu,
Juruot pa wuru ngi de
Gicibi, gikok ma tek i kumi.
Kud iyiigi
Kadok nwang’u gibeyero lembe ma beco iri.
7 “Awenjo ot para; aweko giralaga para.
Amiyo nyaramara para* i cing’ judegi pare.
8 Giralaga para udoko calu umvor i luli.
Erundo ira,
Uketho adage.
9 Giralaga para utie ira calu acuth ma cuku cuku.
Acuth mange utieke man uloy i wiye.
Wubin, wucokuru karacelo wu yedi mi lum ceke,
Wubin wucam.
10 Jukwac dupa unyotho podho mir ulok para;
Ginyono theng ng’om para.
Gidwoko theng ng’om para m’amaru ni langa m’udong’ ni uvuru.
11 Edoko ni ng’om ngele.
Ethwo.*
Etie uvuru i wang’a.
Judaru dwoko ng’ombe zoo ni uvuru,
Ento ng’atu moko mbe m’ubekwanu ku lembene.
12 Junyoth utundo kud i yo ceke m’ulil m’ukadhu kud i langa,
Kum palamularu pa Yehova ubemvoro piny niai i tung’ ng’ombe acel nitundo i tunge mucelo.
Kwiyocwiny umbe ni ng’atu moko acel de.*
13 Gicoyo nganu, ento gikayu ukudho.
Gitimo tic ma tek mananu.
Lewic binegogi pi piny migi m’ucek
Nikum kwinyo pa Yehova m’uopo.”
14 Maeni tie lembe ma Yehova uyero pi jirani para ceke ma jutimrac, m’ubemulo kum giralaga m’aketho Israel ma dhanu para ulagu: “Nen, abefudhogi kud i ng’om migi man abifudho ot mi Yuda kud i kindgi. 15 Ento i ng’ey m’afudhogi, kisa binega kendo i kumgi man abidwogo ng’atuman m’i kindgi i bang’ giralaga pare man i ng’om pare.”
16 “Man tek andha giponjo nitimo lembe calu dhanu para man gikwong’o kwong’ ku nyinga kumae: ‘Calu andha Yehova bedo kwo!’ tap calu ma giponjo dhanu para nikwong’o kwong’ ku nying’ Baal, e gibinwang’u kabedo i kind dhanu para. 17 Ento tek gikwero nibedo wor, abifudho thekne bende; abifudhe man abinyothe,” Yehova wacu.