Zekaria
9 Atwong’a:
“Lembe pa Yehova i kum ng’om mi Hadrak,
Man etiro Dameski*
Pilembe wang’ Yehova n’i wi dhanu
Man n’i wi suru ceke mir Israel.
2 Man en’i kum Hamath ma tie mupaka pare,
Man i kum Turo ku Sidon pilembe gi riek akeca.
3 Turo ugiero gang’ ma tek ire gire.
Ecoko dhu mola ma tar calu utur
Man mola ma kwar calu usabu mi gengi.
5 Ackelon bineno lembene man lworo bimake;
Ang’abacwiny ma dit bimaku Gaza,
Man Ekron bende, pilembe lewic unyay iwi genogen pare.
Ubimo bibedo mbe i Gaza,
Man jubibedo ngo i Ackelon.
6 Wod ma luk bibedo i Acdod,
Man abikabu luliri pa Jafilisti cen.
7 Abikabu piny ma rimo vuko kume cen kud i dhoge
Man piny ma judagu kud i kind lake,
Man dong dhanu pare m’udong’ gibibedo pa Mungu mwa;
Man ebidoko calu rwoth i Yuda,
Man Ekron bidoko calu Jayebusi.
8 Abipondo i wang’ ot para calu jakur,*
Kara ng’atu moko kud ukadh kud i iye man kud ulok kud i iye;
Man jawi tic* moko mbe ma bikadhu kendo kud i iye,
Kum kawoni adaru nene* ku wang’a.
9 Anyong’a negi lee, Ee Nyasayuni.
Kok ku kok mir aloci, Ee Nyayeruzalem.
Nen! ubimo peri ubebino i beng’i.
10 Abikabu magali mi lwiny cen kud i Efraim
Man riuni* kud i Yeruzalem.
Jubikabu athero mi lwiny cen.
Man ebitwong’o pi kwiyocwiny ni thek;
Bimobim pare bibedo niai i nam nitundo i nam ma kucelo
Man niai i Kulo* nitundo i ajiki mi ng’om.
11 Ento in, Ee dhaku, nikum rimo mi lembariba peri,
Abiwodho ju peri ma jutwiyo kud i vur ma pii mbe i iye.
12 Wudwog i kaka ma tek, wu jukol ma wutie ku genogen.
Abeyero iri tin,
‘Abiculo iri makapiny wang’ ario, Ee dhaku.
13 Kum abigomo i* Yuda calu athero para.
Abiketho Efraim* i athero,
Man abicewo woti, Ee Sayuni,
I kum woti, Ee Giriki,
Man abiketho ibidoko calu palamularu pa jarukara.’
14 Jubineno Yehova i wigi,
Man nying athero pare biringo calu lukoth.
Rwoth Ubimo ma Malu Ngbir Yehova bikudho agwara,
Man ebicoro ku yamu ma tek ma yo piny.
15 Yehova mir udul biloyogi,
Man gibicamu kidi mi lacur man gibibimo wigi.
Gibimadhu man gibiwoy calu ve nikum pigulok;
Man gibipong’ bik calu tabu,
Calu gund pemlam.
16 Yehova Mungu migi bibodhogi i nindo maeca
Calu dwol mi dhanu pare;
Kum gibibedo calu kidi ma pigi tek mi jamker mi wic m’uberieny iwi ng’om pare.
17 Kum bero pare dit mire maa,
Man leng’o pare de dit mire maa!
Nying cam bimiyo tego i kum aradu ma co,
Man pigulok ma nyen i kum sumba.”