LEMBANYUTHA NI YOHANA

1 Lembanyutha* pa Yesu Kristu ma Mungu umiyo ire, kara enyuth ni jumiru pare lembe m’ucikere nitimere i ng’ei nindo ma nok. Man eoro malaika pare unyuthe nikadhu kud i giranyutha ni jamiru pare ma Yohana, 2 m’utuco pi lembe pa Mungu man pi lembatuca ma Yesu Kristu umiyo, eyo, pi lembe ceke m’eneno. 3 Mutoro ni ng’atu m’ubesomo ku dwande ma tek lembe mi lembila maeni man ni ju m’ubewinjo ku m’ubeworo lembe m’ugorere i iye, kum saa m’ukethere ni ceng’ini.

4 Niai kud i bang’ Yohana, ni cokiri abiro ma n’i theng’ ng’om mir Azia:

Wunwang’ bero ma yawe mbe man kwiyocwiny niai kud i bang’ “Ng’atu m’unuti, m’ubino nuti man m’ubebino,” man niai kud i bang’ tipo abiro ma n’i wang’ komker pare, 5 man niai kud i bang’ Yesu Kristu ma “Jamulembe mandha,” “kayu mi ju m’ucer ku kind ju m’utho,” man “Jabim mi jubim mi ng’om.”

En m’emaruwa man egonyowa kud i dubo mwa nikadhu kud i rimbe gire, 6 man eketho wabed jubim man julam ni Mungu pare ma tie bende Won, eyo, dwong’ ku tego ubed ire rondo ku rondo. Amen.

7 Nen! Ebebino ku kind afuru, man wang’ ceke binene, kadok ju m’ucobe de; e can ma lee binego suru ceke m’i ng’om* ni kume. Eyo, Amen.

8 “An a Alfa man Omega,”* Yehova Mungu wacu, “Ng’atu m’unuti, m’ubino nuti, man m’ubebino, Jategokpo.”

9 An a Yohana m’umegwu m’abenwang’ara bende ku ragedo calu wun man m’abidikara karacelo kudwu i Ker man abeciro pilembe atie jalub pa Yesu, anwang’ara i cula ma julwong’o Patmos pilembe abedo weco pi Mungu man abetuco pi Yesu. 10 Ni kum tipo anwang’ara i ceng’ pa Rwoth, e awinjo dwal ma dit yor i ng’eya ma calu dwand agwara 11 m’uwacu kumae: “Gin m’ibeneno, kiewe i kithabu m’adola man ore ni cokiri abiro: I Efeso, i Smurna, i Pergamo, i Thuatera, i Sardi, i Filadelfia man i Laodikia.”

12 E agam alokara nineno ng’atu m’ubeweco i bang’a, man saa m’alokara, aneno tiend thala abiro mi mola ma kwar, 13 man ng’atu moko ma calu wod dhanu ucungo i kind tiend thalane, m’ekendo bongu ma bor m’uloro nitundo i ng’udi tiende man etwiyo kore ku mukaba mi mola ma kwar. 14 Bende, wiye man yukwiye ubino tar calu yuk urombo ma tar man calu pei, man nying wang’e ubino calu lebmac, 15 tiende ubino rieny calu mola ma jubetwagu i uka man dwande ubino calu dwand pii dupa. 16 Nyikaluku abiro ubino i cinge ma yor acwic, man palamularu ma bor ma lake bith kun ku kun ubino wok kud i dhoge, man wang’e ubino ve ceng’ m’uberieny ku tego pare zoo. 17 Kinde m’anene, apodho i the tiende ve ng’atu m’utho.

E eketho cinge mir acwic i kuma man eyero kumae: “Lworo kud unegi. An a Ng’atu ma kwong’a man Ng’atu ma tokcen, 18 man ng’atu ma kwo; akeatho, ento nen! Abekwo rondo ku rondo, man atie ku nyamufutha mi tho man mi Kabuli.* 19 Ka kumeno, kiew lembe m’ineno man lembe m’ubetimere kawoni, ku lembe ma bitimere i ng’eye. 20 Maeni en e thelembe mi lembamung’a ma leng’ mi nyikaluku abiro m’ineno i cinga mir acwic man mi tiend thala abiro mi mola ma kwar: Nyikaluku abiro ubenyutho jumalaika mi cokiri abiro, man tiend thala abiro ubenyutho cokiri abiro.

2 “Ni malaika mi cokiri ma n’i Efeso kiew kumae: Ng’atu m’umaku nyikaluku abiro i cinge mir acwic man m’ubewotho i kind tiend thala abiro mi mola ma kwar uyero kumae: 2 ‘Ang’eyo tic peri, tic m’ibemuliri ko man cirocir peri; ang’eyo bende nia icopo ciro ngo nibedo ku dhanu ma reco, man nia imulo i dhanu ma gibeyero nia gi jukwenda ma ke gi jukwenda ngo, e inwang’u nia gitie juvupo. 3 Ibenyutho bende cirocir man idaru ciro masendi dupa pi nyinga, ento iol ungo. 4 Re kadok kumeno de, atie ku lembe ma e m’ukwayu ajuki pire: Iweko mer ma nwang’u ibino ko i acaki.

5 “‘Dong’ poy pi kaka m’ipodho kud i iye man ilok cwinyi, man tim gin m’ibed itimo i acaki. Kan ungo, abibino i beng’i man abikabu tiend thala peri ku kakare, tek iloko ngo cwinyi. 6 Ento lembe ma ber i beng’i ni e: Idagu tic mir ungu mi dini mi Junikolao ma an bende adagu. 7 Dong’ ng’atu ma ithe nuti uwinj lembe ma tipo ubeyero ni cokiri: Ni ng’atu m’uloyo abiyiyo ecam nying yen mi kwo ma n’i paradizo pa Mungu.’

8 “Man ni malaika mi cokiri ma n’i Smurna kiew kumae: ‘Ng’atu ma kwong’a man Ng’atu ma tokcen,’ m’ukeutho kan udoko kwo kendo uyero kumae: 9 ‘Ang’eyo masendi m’ibenweng’iri ko man can peri, ento i jalonyo; ang’eyo bende lembacidi ma ju ma gibelwong’iri gigi nia Juyahudi ma ke i andha gi Juyahudi ngo gibeyero i kumi, ento gitie udul dhanu* pa Sitani. 10 Lworo kud unegi i kum masendi m’ibinweng’iri ko ceng’ini eni. Nen! Wonabali bimedere nibolo jumoko m’i kindwu i kol kara jumul iwu lee mandha, man wubinweng’uru ku masendi pi nindo apar. Dong’ gwok bedoleng’ peri kadok cil i tho, e abimiyo iri jamkermiwic mi kwo. 11 Ng’atu ma ithe nuti uwinj lembe ma tipo ubeyero ni cokiri: Ng’atu m’uloyo bitho tho mir arionde ki ngo.’

12 “Ni malaika mi cokiri ma n’i Pergamo kiew kumae: Ng’atu m’utie ku palamularu ma bor ma lake bith kun ku kun uyero kumae: 13 ‘Ang’eyo kaka m’ibedo i iye, niwacu kaka ma komker pa Sitani ni iye; enre imoko asu kikiki i kum nyinga man ikwero ngo yiyoyic peri kadok i ceng’ pa Antipas ma jamulembe para mandha, ma junego i ng’etwu kaka ma Sitani bedo i iye.

14 “‘Re kadok kumeno de, atie ku lembe moko nyanok m’ukwayu ajuki pire: Itie ku dhanu moko m’ubelubo ponji pa Balam m’ugam uponjo Balak nia eketh cudho mi kier i wang’ nyithindho mir Israel, kara gicam piny ma juthiero ni ayi gin m’acwiya man gitim lembsasa mi tarwang’.* 15 I ayi ma rom eno, itie bende ku dhanu ma gibelubo ponji mir ungu mi dini mi Junikolao. 16 Dong’ lok cwinyi. Kan ungo abebino i beng’i pio man abikiedo i dhoggi ku palamularu ma bor m’ubewok kud i dhoga.

17 “‘Dong’ ng’atu ma ithe nuti uwinj lembe ma tipo ubeyero ni cokiri: Ni ng’atu m’uloyo, abimiyo kum mana ma jukanu, man abimiyo ire kidi ma tar ma iwi kidine jukiewo nying’ ma nyen ma ng’atu moko mbe m’ung’eyo, ndhu ng’atu m’ubenwang’e.’

18 “Ni malaika mi cokiri ma n’i Thuatera kiew kumae: Wod Mungu ma wang’e calu lebmac man ma tiende uberieny calu mola uyero kumae: 19 ‘Ang’eyo tic peri, mer peri, yiyoyic peri, tic m’ibetimo ni Mungu man cirocir peri, man ang’eyo nia tic peri ma kawoni utie lee nisagu m’itimo ku kwong’a.

20 “‘Re kadok kumeno de, atie ku lembe ma e m’ukwayu ajuki pire: Iweko dhaku ma Yezabel m’ubelwong’ere gire nia jabila, ubewingo jumiru para ku ponji pare nia gitim lembsasa mi tarwang’,* man gicam piny ma juthiero ni ayi gin m’acwiya. 21 Aweko ire saa m’elok ko cwinye, ento ebemito ngo elok cwinye kud i kum timo pare mi lembsasa mi tarwang’.* 22 Nen! Abecibole iwi kavuto mi remokum, man ju m’ubetimo abor* kude de abibologi i masendi ma dit, tek giloko ngo cwinygi kud i kum timo pare. 23 Man abinego awiya pare ku thong’om, e cokiri ceke bing’eyo nia atie ng’atu ma yenyo i paru m’upondo* man ma yenyo i adunde, man abimiyo ni ng’atuman m’i kindwu calku timo pare.

24 “‘Ento iwu wu jumange ma wudong’ i Thuatera, wun ceke ma wubelubo ngo ponji pa Yezabel, man ma wung’eyo ngo gin ma julwong’o nia “gin ma thuc pa Sitani,” awacu kumae: Abeketho ngo ter mange i wiwu. 25 Ndhu kende kende, wumok kikiki i kum gin ma wutie ko nitundo m’abibino. 26 Ng’atu m’uloyo man m’uworo nitundo i ajiki lembe m’ang’olo, abimiyo ire ng’ol iwi thek, 27 tap calu ma an de anwang’u ng’ol i bang’ Vwa. Ebibimo wi* dhanu kud uluth mi cuma, e igi bing’eny nziki nziki calu agulu mir ulobo. 28 Man abimiyo ire cero mi kugweno. 29 Dong’ ng’atu ma ithe nuti uwinj lembe ma tipo ubeyero ni cokiri.’

3 “Ni malaika mi cokiri ma n’i Sardi kiew kumae: Ng’atu m’utie ku tipo abiro pa Mungu man nyikaluku abiro uyero kumae: ‘Ang’eyo tic peri, nyingi uyik nia itie kwo kunke in avu. 2 Bed ku weng’i man itiel piny m’udong’ ma gibecitho, kum anwang’u nia idaru ngo tic ma Mungu para ukwayu i beng’i. 3 Pieno, mediri nipoy pi gin m’inwang’u man m’iwinjo, bende mediri nigwoke man lok cwinyi. Andha tekene icew ungo, abibino i wii calu jakwo man ibing’eyo ngo nyanok de nia abibino i wii i saa ma kani.

4 “‘Re kadok kumeno de, itie ku dhanu moko nyanok* i Sardi ma gicido ngo kendi migi, man gibiwotho karacelo kuda ma gironyo kendi ma tar pilembe giromo. 5 Ng’atu m’uloyo bironyo kendi ma tar man abikabu ngo* nyinge nyanok de kud i buku mi kwo, ento abituco i wang’ Vwa man i wang’ jumalaika pare nia ang’eye. 6 Dong’ ng’atu ma ithe nuti uwinj lembe ma tipo ubeyero ni cokiri.’

7 “Ni malaika mi cokiri ma n’i Filadelfia kiew kumae: Ng’atu ma leng’, ng’atu mandha, m’utie ku nyamufutha pa Daudi, ma kan eyabu ng’atu moko mbe ma ciko man kan eciko ng’atu moko mbe ma yabu uyero kumae: 8 ‘Ang’eyo tic peri, nen! Aketho dhugola ma tie ayaba i weng’i ma ng’atu moko mbe ma copo ciko. Man ang’eyo nia tego peri tie nok, ento igwoko lembe para man ikwero ngo nyinga nyanok de. 9 Nen! Abiketho udul dhanu* pa Sitani ma gibeloko nia gitie Juyahudi make gi Juyahudi ngo, ento ma gibecwayu ndra, eyo, abiketho gibibino man gibirum* i the tiendi man abiketho gibing’eyo nia ameri. 10 Calu m’igwoko lembe m’iwinjo pi cirocir para,* an bende abigwoki i saa mir amulaic m’ubecibino iwi ng’om zoo pi niketho dhanu m’ubekwo iwi ng’om i amulaic. 11 Abebino pio. Mediri nimoko kikiki i kum gin m’itie ko kara ng’atu moko kud umay jamkermiwic peri.

12 “‘Ng’atu m’uloyo abikethe ni mbegi i hekalu pa Mungu para, man ebiwok ungo nyanok de kud i iye, man abikiewo nying’ Mungu para i kume ku nying adhura pa Mungu para, Yeruzalem ma nyen m’ubeloro niai kud i polo i bang’ Mungu para man nyinga ma nyen. 13 Dong’ ng’atu ma ithe nuti uwinj lembe ma tipo ubeyero ni cokiri.’

14 “Ni malaika mi cokiri ma n’i Laodikia kiew kumae: Ng’atu ma nyinge Amen ma e jamulembe mandha man ma jugeno, acaki mi giracwiya pa Mungu uyero kumae: 15 ‘Ang’eyo tic peri, nia itie ng’ic ungo kadi i lieth de ngo. Timba nwang’u ibed ng’ic kunoke lieth. 16 Dong’ calu i nya dhey dhey, niwacu i lieth ungo kadi ang’ica de i ng’ic ungo, abecing’uli cen kud i dhoga. 17 Ibeyero nia, “An a jalonyo man acoko piny dupa, ambe ku yeny mi gin moko acel de,” make ing’eyo ngo nia imbe ku mutoro, i jacan ma juneno ku kisa, in abinga man itie muneru. 18 Dong’ akweyi nia ing’iew i bang’a mola ma kwar ma judwoko leng’ ku mac kara ilony, man kendi ma tar ma irony kara ku junen muneru peri man lewic kud unyay i wii, man yath ma iwir i weng’i kara inen piny.

19 “‘Dhanu ceke m’amaru ajukogi man atwinyogi. Dong’ bed kud amora man ilok cwinyi. 20 Nen! Acungo i wang’ dhugola man abedwong’o. Tek ng’atu moko uwinjo dwanda man eyabu dhugola, abimondo i ot pare man abicamu cam mir uthieno karacelo kude man en de ebicamu karacelo kuda. 21 Ng’atu m’uloyo abiyiyo ebed karacelo kuda iwi komker para, tap calu ma an de aloyo man abedo karacelo ku Vwa iwi komker pare. 22 Dong’ ng’atu ma ithe nuti uwinj lembe ma tipo ubeyero ni cokiri.’”

4 I ng’ei gin maeni aneno man nen! Dhugola m’ubedo ayaba i polo man dwal ma kwong’a m’awinjo m’ubeweco i bang’a ubino winjere calu dwand agwara m’ubeyero kumae: “Idh malu kuni, man abinyutho iri gin m’ucikere nitimere.” 2 E i ng’eye ndhundhu nica, tipo ugam uroma man nen! Komker moko uwok i polo man ng’atu moko ubedo iwi komkerne. 3 Ng’atu m’ubedo i wiye ubino nen ve kidi m’uberiang’ini ma julwong’o yaspi man kidi ma kwar ngbo ma julwong’o sardhwan, man danyu m’ubino nen ve kidi mi rangi mi ithlum, ma julwong’o emerod udhoko komkerne gbur.

4 Man komker pier ario wi ang’wen (24) utieko komkerne tingili, man aneno judongo pier ario wi ang’wen ubedo iwi komkernegi ma gironyo kendi ma tar man jamkermiwic mi mola ma kwar i wigi. 5 Lukoth ku dwal man morpolo ubino ai kud i komkerne, man thala abiro mi mac ubedo liel i wang’ komkerne; thalane ubenyutho tipo abiro pa Mungu. 6 Gin moko ubino nuti i wang’ komkerne m’ubino nen ve nam mi kieu, ma iye nen pelele ve kidi ma julwong’o kristhal.

Giracwiya ang’wen ma kwo ma wang’gi romo kumgi ceke yor i wang’gi man yor i ng’eygi gicungo i diere ka ma komkerne n’i iye man gidhoke tingili. 7 Giracwiyane ma kwo mi kwong’o ubino nen ve umvor, giracwiyane ma kwo mir ario ubino nen ve thwon dhiang’, giracwiyane ma kwo mir adek wang’e ubino nen ve wang’ dhanu, man giracwiyane ma kwo mir ang’wen ubino nen ve acur m’uberingo. 8 Giracwiya ang’wen ne gitie ku vombgi abusiel abusiel; man wang’gi uromo kum vombgine zoo yo woko ku yor i iye. Man dieceng’ ku diewor gibemediri niyero m’umbe yom kumae: “Leng’, leng’, leng’ en e Yehova Mungu, Jategokpo, m’ubino nuti, m’unuti man m’ubebino.”

9 Kinde ma tek giracwiya ma kwo eno gibemiyo dwong’ ku yung ni Ng’atu m’ubedo iwi komker man gibedwoko ire foyofoc, en m’etie Ng’atu ma kwo rondo ku rondo, 10 judongo pier ario wi ang’wen (24) gipodho piny i wang’ Ng’atu m’ubedo iwi komker, giworo Ng’atu ma kwo rondo ku rondo man gibolo jamkermiwic migi i wang’ komker ma gibewacu ko kumae: 11 “Eromo kudi, Yehova Mungu mwa, ya jumii iri dwong’, ku yung man tego; pilembe icwiyo piny ceke man ni kum yeny peri gidoko nuti man gicwiyiri de.”

5 Man aneno Ng’atu m’ubedo iwi komker umaku kithabu m’adola ma jukiewo wiye yo woko ku yor i iye i cinge mir acwic, man jumwono dhu kithabune kikiki kud ayi abiro. 2 Bende, aneno malaika moko ma tek ubekok ku dwande ma dit kumae: “Ng’a m’uromo niyabu dhu kithabu m’adola maeni man nialu ayi m’i dhoge?” 3 Ento ng’atu moko mbe m’ubino ku copo mi yabu dhu kithabu m’adolane kunoke mi neno lembe m’i iye, dok ebed i polo kunoke i ng’om kadi i the ng’om. 4 E awak lee dit pilembe junwang’u ngo ng’atu moko acel de m’uromo niyabu dhu kithabu m’adolane kunoke nineno lembe m’i iye. 5 Ento ng’atu acel m’i kind judongo uyero ira kumae: “Kud iwaki. Nen! Umvor mi suru pa Yuda, m’etie ulag Daudi uloyo, pieno eromo niyabu dhu kithabu m’adolane man nialu ayi abiro ma jumwono ko dhoge.”

6 Man aneno nyathi rombo m’ubino nen ve juai juthumo ucungo i kind komker, i kind giracwiya ma kwo ang’wen man i kind judongo, tunge bino abiro man wang’e de abiro; wang’ene ubenyutho tipo abiro pa Mungu ma juoro i ng’om zoo. 7 E ndhundhu ebino man egamu kithabu m’adolane kud i cing’ mir acwic pa Ng’atu m’ubedo iwi komker. 8 Kinde m’egamu kithabu m’adolane, giracwiya ma kwo ang’wen man judongo pier ario wi ang’wen (24) gipodho i wang’ Nyathi rombo, ng’atuman m’i kind judongone ubino kud adungu man tabu mi mola ma kwar m’upong’ kud udok ma ng’wice ng’ar. (Udok ma ng’wice ng’ar ubenyutho rwo mi jumaleng’.) 9 Man gibewero wer ma nyen giwacu kumae: “Iromo ya igam kithabu m’adola man ial ayine de, kum jugam juthumi man ku rimbi ing’iewo dhanu ni Mungu niai kud i suru ceke, dhok ceke, kodhi dhanu ceke, man thek ceke; 10 iketho gidoko jubim man julam, e gibicamu ker iwi ng’om.”

11 E aneno man awinjo dwal mi jumalaika dupa i ng’et komker, man mi giracwiya ma kwo ku mi judongo; wendgi bino elufu dak swa wang’ elufu dak swa, eyo, milion dak swa, 12 man gibino yero ku dwandgi ma dit kumae: “Nyathi rombo ma jukejuthumo uromo ya jumii ire tego, lonyo, rieko, kero, yung, dwong’, man pak.”

13 Man awinjo giracwiya ceke m’i polo man m’i wi ng’om, ku m’i the ng’om man m’i nam ku piny ceke m’i igi ubeyero kumae: “Pak, yung, dwong’, man tego ubed ni Ng’atu m’ujany iwi komker man ni Nyathi rombo rondo ku rondo.” 14 Giracwiya ma kwo ang’wen giwotho dwoko wang’ werne kumae: “Amen!” E judongo gipodho piny man girwo ni Mungu.

6 Man aneno kinde ma Nyathi rombo ualu ayi acel m’i kind ayi abiro, e awinjo acel m’i kind giracwiya ma kwo ang’wen uwacu ku dwal ma ve dwand morpolo kumae: “Bin!” 2 E aneno man nen! Kana ma tar man ng’atu m’ubedo i wiye umaku athero i cinge, jumiyo ire jamkermiwic man ewok pi niloyo, man pi nidaru aloci pare.

3 Kinde m’ealu ayi mir ario, awinjo giracwiya ma kwo mir ario uwacu kumae: “Bin!” 4 E kana mange ugam uwok, e kwar ngbo, man jumiyo copo ni ng’atu m’ubedo i wiye m’ekab ko kwiyocwiny cen kud i ng’om, kara dhanu ginegiri i kindgi, man jumiyo ire bende palamularu ma dit.

5 Kinde m’ealu ayi mir adek, awinjo giracwiya ma kwo mir adek uwacu kumae: “Bin!” E aneno man nen! Kana ma col man ng’atu m’ubedo i wiye umaku mukero* i cinge. 6 E awinjo gin moko ma ve dwal uwok kud i kind giracwiya ma kwo ang’wen uwacu kumae: “Kilo acel mi nganu utie denari* acel, man kilo adek mi nganu ma tung’* utie denari acel; man kud wunyoth moj oliv kadi pigulok.”

7 Kinde m’ealu ayine mir ang’wen, awinjo dwand giracwiya ma kwo mir ang’wen uwacu kumae: “Bin!” 8 E aneno man nen! Kana ma foo, man ng’atu m’ubedo i wiye nyinge tie Tho. Man Kabuli* ubino lubo ng’eye ceng’ini ceng’ini. Man jumiyo igi copo iwi thenge mir ang’wende mi ng’om kara gineg dhanu ku palamularu ma bor, ku ndru, ku thong’om man ku yedi ma kwiny m’i lum.

9 Kinde m’ealu ayine mir abic, aneno i the pemlam ng’eyong’ec* mi ju ma junego pi lembe pa Mungu man pi lembatuca ma gimiyo. 10 Gikok ku dwandgi ma tek giwacu kumae: “Ubimo ma Malu ngbir, in m’i leng’ man andha, ibiceriri nitundo awene nipoko lembe man niculo kwor pi rimbwa iwi dhanu ma gibedo i ng’omi?” 11 E jumiyo kanzu ma tar ni ng’atuman m’i kindgi man juyero igi nia gikegikur kendo nyanok nitundo ma wel mi jumiru wagi man mir umego migi ma jubecinego calu gin urom ko.

12 Man aneno kinde m’ealu ayi mir abusiel, digidi ma dit uyengo piny, ceng’ udoko col calu saki ma juyiko ku yuk diel, man dwi zoo udoko calu rimo, 13 man nyikaluku mi polo ugam upodho i ng’om, tap calu ma yamu ma tek oyo ko nying ulam ma fodi ucek ungo kud iwi tiende. 14 Polo ugam udolere calu kithabu m’adola ma jubedolo, man gudi ceke ku cula ceke giweko kakagi. 15 E jubim mi ng’om ku jego ma dongo, ku judong askari, ku julonyo, ku dhanu ma tek, ku dhanu ceke ma gitie ng’eca man dhanu ma gitie agonya gipondo i oding’om man i kind cana mi gudi. 16 Man gibemediri niyero ni gudi man ni cana kumae: “Wupodh i wiwa man wukanwa kud i wang’ Ng’atu m’ubedo iwi komker man ni kwinyo pa Nyathi rombo, 17 kum ceng’ ma dit mi ng’eicwiny migi udaru romo, man ng’a ma copo cungo?”

7 Yo ng’ei gin maeni, aneno jumalaika ang’wen gicungo i gund ng’om ang’wen, gimaku kikiki yamu ang’wen m’i ng’om, kara yamu moko kud ukot nyanok de iwi ng’om, kadi iwi nam, kadi iwi yen moko ci. 2 Man aneno malaika mange ubeidho ku yo kaka ma ceng’ wok kud i iye* m’emaku ayi* pa Mungu ma kwo; man ekok ku dwande ma tek ni jumalaika ang’wen ma jumiyo igi copo mi nyotho ng’om man nam, 3 ewacu kumae: “Kud wunyoth ng’om, kadi nam, kadi yen nitundo ma wabidaru niketho ayi i terwang’ jumiru pa Mungu mwa.”

4 Man awinjo wend ju ma juketho ayi i kumgine, elufu dak acel pier ang’wen wi ang’wen (144 000) ma juketho ayi i kumgi niai kud i suru ceke mi nyithindho mir Israel:

9 Yo ng’ei gin maeni, aneno man nen! Udul ma dit ma ng’atu moko mbe ma copo kwanu m’uai kud i thek ceke, suru, kodhi dhanu man dhok, gicungo i wang’ komker man i wang’ Nyathi rombo ma gikendo kanzu ma tar man gimaku ndhendhe i cing’gi. 10 Man gibekok ku dwandgi ma tek kumae: “Wanwang’u both i bang’ Mungu mwa m’ujany iwi komker man i bang’ Nyathi rombo.”

11 Jumalaika ceke gitieko komker gbur man judongo man giracwiya ang’wen ma kwo, gipodho arieba wang’gi i wang’ komker man giworo Mungu, 12 giyero kumae: “Amen! Wek pak, ku dwong’, ku rieko, ku foyofoc, ku yung, ku tego man kero ubed ni Mungu mwa rondo ku rondo. Amen.”

13 Ng’atu acel m’i kind judongo ugam upenja kumae: “Dhanu maeni ma gikendo kanzu ma tar, gi jukani man giai kani?” 14 E ndhundhu adwoko ire kumae: “Rwoth para, in re m’ing’eyo.” Man eyero ira kumae: “Dhanu maeni gitie ju ma giai kud i masendi ma dit man gilwoko kanzu migi gidwokogi tar de i rimo pa Nyathi rombo. 15 Pi thelembe maeno re ma gin’i wang’ komker pa Mungu man gibetimo ire tic ma leng’ dieceng’ ku diewor i hekalu pare; man Ng’atu m’ubedo iwi komker biguro hema pare i wigi. 16 Kec kadi rieu pii de binegogi kendo ngo, kadok ceng’ kadi lietho ma lake tek de biwang’ugi kendo ngo, 17 pilembe Nyathi rombo ma n’i kind komker bikwayugi man ebitelo wigi i bang’ pii mi kwo m’ubedhenyini. Man Mungu biweyo piwang’ pet kud i wang’gi.”

8 Kinde m’ealu ayi mir abiro, piny ugam uling’ ting’ i polo ma romo pi nusu saa. 2 Man aneno jumalaika abiro ma gicungo i wang’ Mungu man jumiyo igi agwara abiro.

3 Malaika mange m’umaku tabu mi mola ma kwar mir udok ma ng’wice ng’ar ugam utundo man ecungo ceng’ini ku pemlam, man jumiyo ire udok ma ng’wice ng’ar dupa, m’ethier karacelo ku rwo mi jumaleng’ ceke iwi pemlam mi mola ma kwar ma n’i wang’ komker. 4 Yiro mir udok ma ng’wice ng’arne uidho niai kud i cing’ malaika karacelo ku rwo mi jumaleng’ i wang’ Mungu. 5 E ndhundhu nica malaikane gam uting’o tabu mir udok ma ng’wice ng’ar, epong’e ku mac moko ma n’i wi pemlam man eng’ure iwi ng’om. E polo umor, dwal uwinjere, lukoth ugoyo piny, man digidi uyengo ng’om. 6 E jumalaika abiro ma gimaku agwara abiro giyikiri pi nikudhogi.

7 Malaika ma kwong’a ugam ukudho agwara pare. E jung’uro pei ku mac m’ujebere ku rimo iwi ng’om; man theng ng’om acel wi adek ugam uwang’ pet, man ng’et yen acel wi adek ugam uwang’ ruk, man lum kud uboko ceke ma numu giwang’ pet.

8 Malaika mir arionde ukudho agwara pare. Man jugam jubolo gin moko ma dit ma calu got m’ubewang’ ku mac i nam. E thenge acel wi adek mi nam udoko ni rimo; 9 man theng giracwiya ma kwo m’i nam acel wi adek ugam utho, man theng yei acel wi adek ung’eny.

10 Malaika mir adege ukudho agwara pare. E cero moko ma dit m’ubeliel calu thala ugam upodho niai kud i polo, man epodho iwi thenge acel wi adek mi kulo man iwi pii m’udhenyini. 11 Nying’ nyakalukune utie Yendadra. Man thenge acel wi adek mi pii udoko ni adra, e dhanu dupa githo ni kum pige pilembe edoko kec.

12 Malaika mir ang’wende ukudho agwara pare. E jugam jugoyo thenge acel wi adege mi ceng’, man thenge acel wi adege mi dwi, man thenge acel wi adege mi nyikaluku, kara thenge acel wi adege unyuthi man kara der kud uwok iwi ng’om i theng nindo acel wi adege, man diewor de kumeno.

13 E aneno acur acel uberingo i kor polo man awinjo ebeyero ku dwande ma dit kumae: “Can, can, can iwi ju m’ubedo iwi ng’om pi dong dwand agwara ma jumalaika adek gibecikudho.”

9 Malaika mir abije ugam ukudho agwara pare. Man aneno nyakaluku m’upodho niai kud i polo iwi ng’om, man jumiyo ire nyamufutha mi dhu vur mi longoro ma there mbe. 2 Eyabu dhu vur mi longoro ma there mbe man yiro uthwogere kud i vurne calu yiro mir uka ma dit, e ceng’ ucido bii man yamu bende ni kum yiro m’uai i vurne. 3 Man bonyo ugam uwok niai kud i yirone man gicoriri iwi ng’om, e jumiyo igi copo, kit copo ma rom ku ma ith m’i ng’om gitie ko. 4 Juyero igi nia kud gitim lum m’i ng’om rac kadi uboko moko ci ma numu kadi yen moko ci, ento kende kende dhanu ma gimbe kud ayi* pa Mungu i terwang’gi.

5 Man jumiyo copo ni bonyone mi negogi anega ngo, ento mi sendogi asenda pi dwi abic, man masendi migine e calu masendi pa ith kinde m’etong’ojo. 6 I nindo maeno, dhanu gibisayu ka tho ento gibinwang’e ngo nyanok de, man gibiyenyo githo ento tho biringogi.

7 Man bonyone gibino nen ve kana m’utie ayika pi lwiny; gikendo piny moko i wigi m’ubino nen calu jamkermiwic mi mola ma kwar, man wang’gi ubino ve wang’ dhanu, 8 ento yukwigi utie ve yuk wi mon. Man lakgi utie ve lak umvor, 9 man gikendo asi ma ve asi mi cuma i korgi. Ba dwand vombgi ubino winjere ve ba dwand magali dupa ma kana ubepeyo m’uberingo i lwiny. 10 Bende yibgi uthum kud ukudho calu pa ith, man gitie ku copo mi timo dhanu rac ku yibgine pi dwi abic. 11 Gitie kud ubimo i wigi ma en e malaika mi longoro ma there mbe. I dhu Juebrania nyinge tie Abadon,* ento i dhu Jugiriki nyinge tie Apolion.*

12 Can ma kwong’a ukadhu. Nen! Can mange ario ubebino i ng’ei lembe maeni.

13 Malaika mir abusiende ugam ukudho agwara pare. Man awinjo dwal moko uai kud i tung pemlam mi mola ma kwar ma n’i wang’ Mungu, 14 ubeyero ni malaika mir abusiel m’umaku agwara kumae: “Gony jumalaika ang’wen ma jutwiyo i dhu kulo ma dit ma Efrath.” 15 E jugonyo jumalaika ang’wen ne ma juketho gibedo ayika pi saa, pi nindo, pi dwi man pi oro, kara gineg thenge acel wi adek mi dhanu.

16 Wend udul askari migi ma ringo ku kana ubino elufu pier ario wang’ elufu apar;* awinjo wendgi. 17 Man kana ku ju m’ubedo i wigi m’aneno i ginmawokiwang’, gibino nen kumae: Gikendo asi mi rangi ma kwar calu mac, mi rangi mi ble,* man mi rangi mi thiwuriang’ i korgi; wi kananegi ubino nen ve wi umvor, man mac ku yiro ku muganga ubino wok kud i dhoggi. 18 Man thenge acel wi adege mi dhanu githo ni kum masendi adek maeno, niwacu mac, yiro man muganga m’uwok kud i dhoggi. 19 Copo mi kanane n’i dhoggi man n’i yibgi, kum yibgi utie calu thwol man wigi nuti, man gitong’o dhanu ku yibgine.

20 Ento dong dhanu ma githo ngo ni kum masendi maeno giloko ngo cwinygi kud i kum tic mi cing’gi, giweko ngo nirwo ni pajogi, ni ayi gin m’acwiya mi mola ma kwar, mi mola ma tar, mi mola, mi kidi man mi yen ma gicopo neno ngo piny, gicopo winjo de ngo, man awotha de gicopo wotho ngo. 21 Man giloko ngo cwinygi kud i kum nego nek migi, kud i kum timo migi mir ajoga, kadi kud i kum lembsasa migi mi tarwang’,* man kud i kum kwalu kwo migi.

10 Man aneno malaika mange ma tek ubeloro niai kud i polo m’eronyere* kud afuru, danyu ubino i wiye, wang’e ubino calu ceng’, tiende ubino calu mbegi mi mac, 2 man emaku nyathi kithabu moko m’adola ma tie ayaba i cinge. Man eketho tiende mir acwic iwi nam, mir acam ke iwi ng’om, 3 ekok ku dwande ma dit tap calu kinde m’umvor uberundo. Saa m’ekok, dwand morpolo abiro uweco.

4 Kinde ma morpolo abiro uweco, nwang’u dong’ abecikiewo, ento awinjo dwal moko m’uai kud i polo uyero kumae: “Mwon ayi i kum lembe ma morpolo abiro uyero, ento kud ikiewgi.” 5 Malaika m’aneno ucungo iwi nam man iwi ng’om uting’o cinge mir acwic i kor polo 6 man ekwong’o kwong’ ku nying’ Ng’atu ma kwo rondo ku rondo, m’ucwiyo polo ku piny ma n’i iye, ng’om ku piny ma n’i iye, man nam ku piny ma n’i iye, eyero kumae: “Saa m’ameda bibedo mbe. 7 Ento i nindo ma malaika mir abiro bidhingo nikudho agwara pare, e lembamung’a ma leng’ ma Mungu utwong’o calu lembanyong’a ni jumiru pare ma gi jubila bigam pong’o.”

8 Man awinjo dwal uai i polo ubeweco kendo i bang’a ubeyero kumae: “Cidh igam kithabu m’adola m’utie ayaba i cing’ malaika m’ucungo iwi nam man iwi ng’om.” 9 E acidho i bang’ malaika maeno man ayero ire nia emii nyathi kithabu m’adolane. Ewok eyero ira kumae: “Game man icame, ebidwoko ii bidoko kec ento i dhogi re ebibedo lim lim calu miyo kic.” 10 Agamu nyathi kithabu m’adola kud i cing malaikane man acame; i dhoga ebino lim lim calu miyo kic, ento kinde m’adaru mwonye edwoko iya udoko kec. 11 Man juyero ira kumae: “Icikiri niewo kendo lembe m’uneno dhanu, thek, dhok man jubim dupa.”

11 E jumiyo ira agada moko ma calu uluth* kinde ma dwal moko ubeyero ira kumae: “Ai malu, pim hekalu pa Mungu ku pemlam man dhanu m’uberwo i iye. 2 Ento wek lela ma ni woko mir hekalu, kud ipime; pilembe judaru miye ni thek man gibinyono adhura ma leng’ i the tiendgi pi dwi pier ang’wen wi ario (42). 3 Abiketho jumulembe para ario gibiewo pi nindo elufu acel dak ario ku pier abusiel (1 260) ma gikendo kendi mi saki.” 4 Jumulembe maeni gitie yend oliv ario man tiend thala ario, man gicungo i wang’ Rwoth mi ng’om.

5 Tekene ng’atu moko ubemito etimgi rac, mac wok kud i dhoggi man ewang’u judegi migi. Eyo, tek ng’atu moko ubemito etimgi rac, ecikere nitho i ayi maeno. 6 Jumulembe maeni gitie ku copo mi twiyo dhu polo kara koth kud ucwii pi nindo ceke ma gibeewo i iye, gitie bende ku copo mi loko pii udok ni rimo man mi goyo ng’om ku kit thong’om moko ci thiri thiri i kadhiri ma gibemito.

7 Kinde ma gibidaru nimiyo lembatuca migi, yedi ma kwiny m’ubewok kud i longoro ma there mbe bikiedo lwiny i dhoggi, ebiloyogi man ebinegogi. 8 Avujgi bibedo i wang’ ndaki mir adhura ma dit ma julwong’o i ayi mi lapor nia Sodoma man Misiri, kaka ma junego iye Rwoth migi bende iwi yen. 9 Man lwak m’uai kud i kind dhanu ma tung’ tung’, suru, dhok, man thek gibineno avujgi pi nindo adek ku nusu man gibiyiyo ngo nia juketh avujgi i odliel. 10 E anyong’a binego dhanu m’ubedo iwi ng’om pigi, gibitimo foc man gibioro giramiya i kindgi, pilembe jubila ario maeno ubed usendo dhanu m’ubedo iwi ng’om.

11 I ng’ei nindo adek ku nusu, tipo mi kwo m’uai i bang’ Mungu ugam umondo i igi man gicungo iwi tiendgi, e lworo ma dit umaku dhanu m’unenogi. 12 Man giwinjo dwal ma dit uai i polo ubeyero igi kumae: “Wuidh malu kuni.” E gigam giidho i polo ku kind afuru man judegi migi unenogi.* 13 I saa maeno, digidi ma dit uyengo piny man thenge acel wi apar mir adhura urwombere; digidine unego dhanu elufu abiro (7 000), man dong dhanu m’udong’ ndiri umakugi man gimiyo dwong’ ni Mungu m’i polo.

14 Can mir arionde ukadhu. Nen! Can mir adege ubebino pio.

15 Malaika mir abiro ugam ukudho agwara pare. E dwal ma dit uwinjere i polo m’ubeyero kumae: “Ker m’i ng’om udoko Ker pa Rwoth mwa man pa Kristu pare, man ebibimo rondo ku rondo.”

16 Man judongo pier ario wi ang’wen (24) ma gibedo iwi komker migi i wang’ Mungu, gipodho arieba wang’gi man girwo ni Mungu; 17 giyero kumae: “Wafoyi Yehova Mungu, in m’i Jategokpo, ng’atu m’unuti man m’ubino nuti, pilembe itiyo* ku tego peri ma dit man icaku bimo. 18 Ento kwinyo umaku thek man in de kwinyo peri uopo, e saa m’ukethere ugam uromo mi poko lembe mi ju m’utho man mi miyo sukulia ni jumiru peri ma gi jubila, ju ma leng’, ku ju m’ubelworo nyingi, ju ma thindho ku ma dongo, man mi nyotho ju m’ubenyotho ng’om.”

19 Hekalu pa Mungu ugam uyabere i polo, man sanduku mi lembariba pare unen i hekalu pare. E lukoth ugoyo piny, dwal uwinjere, polo umor, digidi uyengo piny, man pei ma dit ucwii.

12 I ng’eye, giranyutha ma dit unen i polo: Dhaku moko m’uronyere ku ceng’, dwi ubino i the tiende, man ekendo jamkermiwic mi nyikaluku apar ario (12) i wiye, 2 iye ubino nuti. Man ebino goyo nduru pi litho man remo m’ebegonyere ko.

3 Giranyutha mange ugam unen i polo. Nen! Ng’ec ma dit ma kwar calu mac, ma wiye abiro tunge ke apar man jamkermiwic abiro ubedo i wiye; 4 yibe ubepeyo thenge acel wi adek mi nyikaluku m’i polo man ebologi iwi ng’om. Man ng’ecne ucungo i wang’ dhaku m’ubecigonyere kara kinde m’ebigonyere ci, emwony nyathin parene.

5 Man enyolo wode, eyo, nyathin ma nico ma bibimo wi* thek ceke kud uluth mi cuma. Man juting’o nyathin ne pio jutere i wang’ Mungu man i wang’ komker pare. 6 Man dhakune uringo i langa kaka ma Mungu uyiko ire kabedo i iye kara jutunge i iye pi nindo elufu acel dak ario ku pier abusiel (1 260).

7 Man lwiny ugam utuk i polo: Mikael* karacelo ku jumalaika pare gikiedo i dhu ng’ec, man ng’ec karacelo ku jumalaika pare bende gikiedo 8 ento giloyo ngo,* man kakagi de unwang’ere kendo ngo i polo. 9 Pieno jubolo ng’ec ma dwong’ piny, en m’e thwol ma con, ma julwong’o Wonabali man Sitani, en m’ebewondo ng’om zoo;* jubole piny i ng’om man jumalaika pare de jubologi karacelo kude. 10 E awinjo dwal ma dit i polo uyero kumae:

“Kawoni both uwok man tego ku Ker pa Mungu mwa man ng’ol pa Kristu pare, pilembe jubolo jadot utumegwa piny, en m’edotogi dieceng’ ku diewor i wang’ Mungu mwa! 11 Man givoye ni kum rimb Nyathi rombo man ni kum wec mi lembatuca migi, man gimaru ngo kwo* migi kadok i wang’ tho. 12 Pieno anyong’a negwu, wu polo ku wun ma wubedo i igi de! Can ni ng’om ku nam de, pilembe Wonabali uloro piny i beng’wu m’etie ku kwinyo ma dit mandha, kum eng’eyo nia nindo dong’ ire nyanok kende.”

13 Ento kinde ma ng’ec uneno nia jubole piny i ng’om, enyayu ragedo i kum dhaku m’unyolo nyathin ma nico. 14 Ento jumiyo vomb acur ario ma dit ni dhakune kara ering i langa i kabedo pare, kaka ma jubitunge i iye pi nindo acel, pi nindo ario, man pi nusu nindo* bor kud i wang’ thwol.

15 Man thwol uthwogo pii ma calu kulo niai kud i dhoge i tok dhakune kara kulone uthung’e. 16 Ento ng’om ubin ukonyo dhakune, man ng’om uyabu dhoge emwonyo kulo ma ng’ec uthwogo kud i dhoge. 17 E ng’eicwiny uopo i ng’ec i kum dhakune man ecidho nikiedo lwiny i dhu dong kodhi pa dhakune ma gibeworo cik pa Mungu man ma ginwang’u tic mi miyo lembatuca iwi Yesu.

13 Man ewok ecungo* iwi kwiyo m’i dhu nam.

Man aneno yedi moko ma kwiny ubewok kud i nam, tunge apar man wiye tie abiro man jamkermiwic apar n’i wi tungene, ento nying’ mir acidi n’i wiye. 2 Man yedi ma kwiny m’anenone ubino calu ng’u, ento tiende ubino calu tiend urudi, dhoge ke calu dhu umvor. Man ng’ec umiyo tego pare, komker pare, man ng’ol ma dit ni yedine.

3 Aneno wiye acel ubedo ve gin ma jutong’o ku rem ma nwang’u romo nege, ento rem ma nwang’u romo negene ukey man dhanu ceke m’i ng’om gilubo toke ma igi ubewang’ lii. 4 Man girwo ni ng’ec pilembe emiyo ng’ol ni yedi ma kwinyne, man girwo ni yedine ma gibeyero kumae: “Ng’a ma calu yedi ma kwiny maeni, man ng’a ma copo kiedo kude?” 5 Jumiyo ire dhoge m’eyer ko lembe mi ting’iri man mir acidi, man jumiyo ire ng’ol m’etim ko pi dwi pier ang’wen wi ario (42). 6 Man eng’amu dhoge pi niyero lembacidi i kum Mungu pi nicido nyinge man ka m’ebedo i iye, kadok cil ju ma bedo i polo. 7 Juweko nia ekied lwiny i dhu jumaleng’ man eloygi, man jumiyo ire ng’ol iwi suru ceke, iwi dhanu, iwi dhok man iwi thek. 8 Man dhanu ceke ma bedo iwi ng’om gibirwo ire. Niai i thekiri mi ng’om jukiewo ngo nying’ ng’atu moko acel de m’i kindgi i kithabu m’adola mi kwo pa Nyathi rombo ma jugam juthumo.

9 Tek ng’atu moko ithe nuti, dong’ ewinji. 10 Tekene ubekwayu nia ng’atu moko ucidh i kol, ebicidho i kol. Tekene ng’atu moko binego nek ku palamularu,* jucikiri ninege ku palamularu. Keni re m’ukwayu jumaleng’ ginyuth cirocir man yiyoyic.

11 I ng’eye, aneno yedi mange ma kwiny ubewok kud i ng’om, tunge ario calu pa nyathi rombo, ento ecaku niweco calu ng’ec. 12 Ebetiyo ku ng’ol ceke pa yedi ma kwiny ma kwong’a i wang’ yedine. Man ebeketho ng’om ku dhanu ma bedo i iye girwo ni yedi ma kwong’a ma rem pare ma nwang’u romo nege udaru key. 13 Man ebetimo giranyutha ma dongo, eketho kadok cil mac ai i polo loro iwi ng’om ma dhanu ubeneno.

14 Ebewingo dhanu ma bedo iwi ng’om ku giranyutha ma juweko etim i wang’ yedi ma kwiny, man ebeyero ni dhanu ma bedo iwi ng’om nia giyik ayi pa yedi ma kwiny ma jugam jutong’o ku palamularu ento re ekwo. 15 Man juweko ekudh avuvu i ayi pa yedi ma kwiny kara ayi pa yedine uweci, man eketh juneg dhanu ceke ma gibekwero nirwo i wang’ ayi pa yedi maeno.

16 Ebediyo dhanu ceke, ju ma thindho ku ju ma dongo, julonyo ku jucan, ju ma tie agonya ku ng’eca nia juketh kiedo i kum cing’gi mir acwic kunoke i terwang’gi, 17 kara ng’atu moko kud ung’iew kunoke ulwor piny, kende kende ng’atu m’utie ku kiedo, niwacu nying’ yedi ma kwiny kunoke wel m’ucungo ka nyinge. 18 Kakeni re m’ubekwayu rieko: Dong’ ng’atu m’utie ku ng’eyothelembe udik wel pa yedi ma kwinyne kum etie wel mi dhanu, man welne utie dak abusiel pier abusiel wi abusiel (666).

14 I ng’eye aneno man nen! Nyathi rombo ucungo iwi Got Sayuni, man karacelo kude dhanu elufu dak acel pier ang’wen wi ang’wen (144 000) ma nyinge man nying’ Won ukiewere i terwang’gi. 2 Awinjo dwal moko uai i polo ma calu dwand pii dupa man calu dwand morpolo ma dit; man dwal m’awinjone ubino calu dwand juruwer m’ubewer kinde ma gibegoyo adungu migi. 3 Man gibewero wer ma ve wer ma nyen i wang’ komker, i wang’ giracwiya ang’wen ma kwo, man i wang’ judongo; man ng’atu moko mbe m’ubino ku copo mi ng’eyo weje ndhu dhanu elufu dak acel pier ang’wen wi ang’wen (144 000) kende ma jugam jung’iewo kud i ng’om. 4 Joni gitie ju ma gicidiri ngo ku mon, gitie sumba; gimediri nilubo tok Nyathi rombo kaka moko ci m’ecidho i iye. Jung’iewogi kud i kind dhanu calu landu wi mwoka ni Mungu man ni Nyathi rombo, 5 man junwang’u ngo ndra nyanok de i dhoggi, kadi poyo de mbe i kumgi.

6 Man aneno malaika mange uberingo i kor polo,* man ebedo ku lembanyong’a ma rondo ku rondo m’ebetwong’o ni dhanu m’ubedo iwi ng’om, ni thek ceke, ni suru, ni dhok man ni kodhi dhanu. 7 Ebino yero ku dwande ma tek kumae: “Wulwor Mungu man wumii ire dwong’, pilembe saa mi pokolembe pare uromo, man wurwo ni Ng’atu m’ucwiyo polo ku ng’om, ku nam man pii m’udhenyini.”*

8 Malaika mange mir arionde ulubo ng’eye m’ebeyero kumae: “Edaru podho! Babeli ma dit udaru podho, en m’eketho thek ceke umadhu pigulok mir awanya* pare mi lembsasa mi tarwang’* ma lake tek!”

9 Malaika mange mir adege ulubo ng’eygi m’ebeyero ku dwande ma tek kumae: “Tek ng’atu moko uberwo ni yedi ma kwiny kadi ni ayi pare man ejolo kiedo i terwang’e kunoke i kum cinge, 10 ebimadhu bende pigulok mi kwinyo pa Mungu ma judhilo ngo lake ma jukonjo i kopo mi ng’eicwiny pare, man ebisendere i mac man muganga i wang’ jumalaika ma leng’ man i wang’ Nyathi rombo. 11 Man yiro mi masendi migi uidho rondo ku rondo, man gimbe ku yom dieceng’ ku diewor, gi ju ma girwo ni yedi ma kwiny man ni ayi pare man ng’atu moko ci m’ujolo kiedo mi nyinge. 12 Keni re m’ukwayu jumaleng’ ginyuth cirocir, gin ma gibeworo cik pa Mungu man ma gimoko kikiki i kum yiyoyic pa Yesu.”

13 Man awinjo dwal moko uai i polo uyero kumae: “Kiew kumae: Mutoro ni ju m’ubetho i Rwoth niai kawoni. Eyo, tipo ubeyero, wek giyom i kum tic ma gimuliri ko, pilembe gin ma gitimo ubelubo tokgi.”

14 I ng’eye aneno man nen! Afuru ma tar man ng’atu moko m’ubino nen ve wod dhanu ubedo iwi afurune m’ekendo jamkermiwic mi mola ma kwar i wiye, man emaku viringo ma lake bith i cinge.

15 Malaika mange ugam uwok kud i hekalu m’ebelwong’o ng’atu m’ubedo iwi afuru ku dwande ma tek eyero kumae: “Tii ku viringo peri man kay cam, pilembe saa mi kayucam udaru romo kum ng’om udaru cego nyinge.” 16 E ng’atu m’ubedo iwi afuru uketho viringo pare ukadhu iwi ng’om man ekayu cam mi ng’om.

17 Malaika mange bende ugam uwok kud i hekalu m’i polo man en de ebino ku viringo ma lake bith.

18 Bende, malaika mange uwok kud i kum pemlam man ebino ku copo iwi mac. Ekok ku dwande ma dit ni malaika m’umaku viringo ma lake bith eyero kumae: “Tii ku viringo peri man icok dhu njuru nying ulok mi ng’om, pilembe nyinge daru cek.” 19 E malaikane uketho viringo pare ukadhu iwi ng’om man ecoko dhu nying ulok mi ng’om, man ecorogi i vur ma dit mi biyo pigulok mi kwinyo pa Mungu. 20 Man junyono i vur mi biyo pigulokne woko i ng’ei adhura, e rimo udhenyere kud i vur mi biyo pigulokne uidho malu i kum gwang’ mi dhu kana, man emol pi kilometre ma romo dak ario pier abung’wen wi abusiel (296).

15 Man aneno giranyutha mange ma dit man ma wang’u ijo i polo, jumalaika abiro ma gimaku masendi abiro. Gitie masendi ma tokcen, pilembe ni kumgi kwinyo pa Mungu bitundo i ajikine.

2 Man aneno piny moko ma ve pii ma dit ma calu kieu m’ujebere ku mac, man ju m’uloyo yedi ma kwiny kud ayi pare man wel mi nyinge gicungo i ng’et pii ma dit ma calu kieune, ma gimaku adungu pa Mungu i cing’gi. 3 Gibino wero wer pa Musa ma jamiru pa Mungu man wer pa Nyathi rombo ma gibeyero kumae:

“Tic peri gi dwong’ man giwang’u ijo, Yehova Mungu, in m’i Jategokpo. Yo peri gi pwe man andha, Ubimo ma rondo ku rondo. 4 I andha ng’a ma bilwori ngo, e Yehova man ma biyungo ngo nyingi? Kum in kendi re m’i leng’. Thek ceke bibino man gibirwo i weng’i, pilembe pokolembe peri ma pwe udaru nyuthere.”

5 Yo ng’ei gin maeni, aneno Kamaleng’ mi hema mi lembatuca uyabere i polo, 6 man jumalaika abiro ma gimaku masendi abiro giwok kud i hekalu ma gikendo bongu ma nwang’ ma leng’ m’uberieny man gitwiyo korgi ku mukaba mi mola ma kwar. 7 Acel m’i kind giracwiya ang’wen ma kwo ugam umiyo ni jumalaika abiro maeno tabu abiro mi mola ma kwar m’upong’ ku kwinyo pa Mungu ma kwo rondo ku rondo. 8 E yiro upong’o i hekalu ni kum dwong’ pa Mungu man ni kum tego pare, man ng’atu moko mbe m’ubino ku copo mi mondo i hekalune nitundo ma masendi abiro mi jumalaika abiro ugam uthum ko.

16 Man awinjo dwal ma dit uai i hekalu uyero ni jumalaika abiro kumae: “Wucidhi man wukonj kwinyo pa Mungu ma n’i tabu abiro iwi ng’om.”

2 Malaika ma kwong’a ugam ucidho man ekonjo piny ma n’i tabu pare iwi ng’om. E adhola ma lith mandha man ma rac usendo dhanu ma gibino ku kiedo pa yedi ma kwiny i kumgi man ma gibino rwo ni ayi pare.

3 Malaika mir arionde ugam ukonjo piny ma n’i tabu pare i nam. E nam udoko rimo calu rimb ng’atu m’utho, man giracwiya* ceke ma kwo ugam utho, eyo, piny ma n’i nam.

4 Malaika mir adege ukonjo piny ma n’i tabu pare i kulo man i pii m’ubedhenyini.* E gidoko ni rimo. 5 Man awinjo malaika m’utie ku ng’ol iwi pii* uyero kumae: “In m’inuti man m’ibino nuti, in m’i Ng’atu ma leng’, itie pwe kum ipoko lembe kumeno, 6 pilembe gicwiro rimb jumaleng’ man rimb jubila, man imiyo igi rimo gimadhi; giromo ku maeno.” 7 Man awinjo pemlam uyero kumae: “Eyo, Yehova Mungu ma Jategokpo, pokolembe peri gin andha man gi pwe.”

8 Malaika mir ang’wende ugam ukonjo piny m’i tabu pare iwi ceng’, man jumiyo ni ceng’ copo m’ewang’ ko dhanu ku liethone.* 9 Man lietho ma lake tek maeno uwang’u dhanu, ento giyero lembacidi i kum nying’ Mungu m’utie ku ng’ol iwi masendi maeno, man giloko ngo cwinygi kadi dwong’ de gimiyo ngo ire.

10 Malaika mir abije ugam ukonjo piny ma n’i tabu pare iwi komker pa yedi ma kwiny. E ker pare ucido bii, man dhanu gicaku kayu lebgi ni kum litho migi, 11 ento giyero lembacidi i kum Mungu m’i polo ni kum litho man adhola migi, man giloko ngo cwinygi kud i kum tic migi.

12 Malaika mir abusiende ugam ukonjo piny ma n’i tabu pare iwi kulo ma dit Efrath, e pii m’i iye uthwo kaw pi niyiko yo ni jubim m’uai yo nyangu.

13 Man aneno tipo adek m’ucido m’ubino nen ve ungwal uwok kud i dhu ng’ec, kud i dhu yedi ma kwiny, man kud i dhu jabila mi ndra. 14 I andha, gitie wec ma pajogi re m’uyuyo i wiye man gibetimo giranyutha dupa, man gibecidho woko i bang’ jubim m’i ng’om zoo pi nicokogi karacelo pi lwiny mi ceng’ ma dit pa Mungu ma Jategokpo.

15 “Nen! Abebino calu jakwo. Mutoro ni ng’atu m’ubekiyo man m’ubegwoko bongu pare ma yo woko, kara kud ewoth muneru man dhanu unen lewic pare.”

16 Man gicokogi karacelo i kaka ma julwong’o ku dhu Juebrania Armagedon.*

17 Malaika mir abirone ukonjo piny ma n’i tabu pare iwi yamu. E dwal ma dit uai i hekalu kud i komker uwacu kumae: “Edaru timere!” 18 Man lukoth ugoyo piny, dwal uwinjere, polo mor, man digidi ma dit mandha ma fodi uwok ungo niai ma dhanu n’i wi ng’om uyengo piny lee mandha; ebino digidi ma dit mi tuko ngo. 19 E i adhura ma dit ugam upokere ni adek man adhura mi thek girwombiri; e Mungu upoy pi Babeli ma dit pi nimiyo ire kopo mi pigulok mi kwinyo pare ma lake tek. 20 Bende, cula ceke girwinyo man gudi de junwang’u ngo. 21 I ng’eye, pei ma dongo ma acel pek pare romo bedo talanto* acel uai i polo upodho iwi dhanu man dhanu giyero lembacidi i kum Mungu ni kum masendi mi peine, kum masendine ubino dit ma yerere ngo.

17 Acel m’i kind jumalaika abiro ma gibedo ku tabu abiro ugam ubino man eyero ira kumae: “Bin, abinyutho iri pokolembe pa dhaku ma won asara ma dit m’ubedo iwi pii dupa, 2 ma jubim m’i ng’om gitimo kude lembsasa mi tarwang’* man dhanu m’ubedo iwi ng’om gimer ku pigulok mi lembsasa mi tarwang’* pare.”

3 Man i tego mi tipo etera nitundo i langa. E aneno dhaku moko m’ubedo iwi yedi ma kwiny ma kwar ngbo m’upong’ ku nying’ mir acidi man ma wiye abiro tunge ke apar. 4 Dhakune uronyere ku bongu mi rangi m’uluga* man ma kwar ngbo, man erukere ku jambruko mi mola ma kwar, ku kidi ma pigi tek, man kidi ma i upal, man emaku i cinge kopo mi mola ma kwar m’upong’ ku piny ma reco ma judagu man piny m’ucido mi lembsasa mi tarwang’* pare. 5 I terwang’e jukiewo nying’ moko ma tie lembamung’a kumae: “Babeli ma dit, meg weg asara man mi piny ma reco ma judagu m’i ng’om.” 6 Man aneno dhakune umer ku rimb jumaleng’ man ku rimb jumulembe pa Yesu.

E kinde m’anene, iya uwang’ lii. 7 Pieno malaikane uwacu ira kumae: “Ii uwang’ lii nedi? Abikoro iri the lembamung’a pa dhakune man pa yedi ma kwiny m’uyeye ma wiye abiro tunge ke apar: 8 Yedi ma kwiny m’ineno ubino nuti ento embe, re edhingo wok kud i longoro ma there mbe man ebecidho i nyoth. Dhanu m’ubedo iwi ng’om, niwacu ju ma nying’gi ugorere ngo i kithabu m’adola mi kwo niai i thekiri mi ng’om, igi biwang’ lii kinde ma gibineno nia yedi ma kwiny m’ukeubedo nuti, ento embe udog udwogo kendo.

9 “Kakeni ubekwayu ng’eyong’ec man rieko: Wic abiro ubenyutho gudi abiro ma dhakune ubedo malu i wigi. 10 Man jubim utie abiro: Abic udaru podho, acel unuti man ma kucelo fodi utundo ngo; ento kinde m’ebitundo, ebikebedo kokoro pi nindo moko nyanok. 11 Man yedi ma kwiny m’ukeubino nuti ento embe, en nini bende etie ubimo mir abora, ento ewok kud i abiro man ebecidho i nyoth.

12 “Tung’ apar m’ineno ubenyutho jubim apar ma fodi ginwang’u ngo ker, ento gibinwang’u copo mi camu ker pi saa acel karacelo ku yedi ma kwiny. 13 Gitie ku paru acel man gibemiyo tego ku copo migi ni yedi ma kwiny. 14 Gibikiedo i dhu Nyathi rombo, ento calu Nyathi rombo tie Rwoth mi rwodhi man Ubimo mir ubimo, ebiloyogi. Ju ma ni kude bende ma gitie ju ma julwong’o, ma jung’iyo man ma gigwoko bedoleng’ migi de gibiloyo.”

15 Bende, eyero ira kumae: “Pii m’ineno, ka ma dhaku ma won asara ubedo i iye utie kodhi dhanu, udul dhanu, thek man dhok. 16 Man tung’ apar m’ineno man yedi ma kwiny, gin nini gibidagu dhaku ma won asara man gibinyothe, gibiweke muneru, gibicamu ring’kume man gibiwang’e pet ku mac. 17 Kum Mungu uketho i adundegi nia gitim paru pare, eyo, gitim paru migi acel man gimii ker migi ni yedi ma kwiny nitundo ma lembe pa Mungu bipong’o ko kakare. 18 Man dhaku m’ineno en e adhura ma dit m’ubebimo wi jubim m’i ng’om.”

18 Yo ng’ei gin maeni, aneno malaika mange ubeloro niai kud i polo m’etie ku ng’ol ma dit, man ng’om ucarere ku dwong’ pare. 2 Ekok ku dwande ma tek eyero kumae: “Edaru podho! Babeli ma dit udaru podho, man edoko kabedo mi pajogi man ka ma tipo m’ucido ceke ku winyo m’ucido man ma judagu gikwo i iye! 3 Kum ni kum pigulok mir awanya* pare mi lembsasa mi tarwang’* ma lake tek, thek ceke gipodho i the cinge, man jubim m’i ng’om gitimo kude lembsasa mi tarwang’, man jukuloka m’i ng’om gilony ni kum piny dupa ma bei migi tek m’ebecoko m’umbe lewic.”

4 Man awinjo dwal mange uai i polo uyero kumae: “Wuwok kud i iye, dhanu para, tek wubemito ngo wudikuru kude i dubo pare man tek wubemito ngo wunwang’ kum masendi pare. 5 Kum dubo pare udhurere nitundo i polo man Mungu upoi i kum lembe ma reco* m’etimo. 6 Wucul ire kawang’ lembe m’etimo tap i ayi m’etime ko ni jumange, eyo, wucul ire wang’ ario kawang’ lembe m’etimo; i kopo m’ejebo i iye wujeb ire bende wang’ ario. 7 I kadhiri m’eyungere ko gire man m’ekwo ko i raha* m’umbe lewic, wumii ire masendi man can rukeno. Kum ebemedere niyero i adundene kumae: ‘Ajany calu ubimo ma dhaku, atie ngo dhatho, man lembcan biwok i wiya ki ngo.’ 8 Pi thelembe maeno re ma pi nindo acel masendi biwok i wiye, tho, can man ndru, man jubiwang’e pet ku mac, kum Yehova Mungu m’upoko lembe i wiye utie tek.

9 “E jubim m’i ng’om ma gitimo kude lembsasa mi tarwang’* man ma gikwo kude i raha m’umbe lewic gibiwak man can ma lee binegogi* pire kinde ma gibeneno yiro pare m’ebewang’ ko. 10 Gibicungo ku bor ni kum lworo m’ubenegogi pi masendi pare man gibiwacu kumae: ‘Kayo, kayo, adhura ma dit, Babeli in m’itie adhura ma tek, ndhu pi saa acel kende ci pokolembe utundo i wii!’

11 “Bende, jukuloka m’i ng’om gibiwak man can binegogi, pilembe dong’ ng’atu moko mbe ma bing’iewo piny ceke ma gibelworo: 12 Mola ma kwar, mola ma tar, kidi ma pigi tek, kidi ma i upal, bongu ma nwang’, bongu mi rangi m’uluga,* bongu ma juyiko ku thondh avaceng’, bongu ma kwar ngbo, man piny ceke ma juyiko ku bau ma ng’wicgi ng’ar, kwond piny ceke ma juyiko ku lak liec, ku bau ma pigi tek, mola, cuma man kidi ma beco; 13 man bende apoka yen ma ng’wice ng’ar, piny mange ma medo mido mi cam, udok ma ng’wice ng’ar, mo ma ng’wice ng’ar, udok sengi, pigulok, moj oliv, mogo ma yom, nganu, dhieng’, rombe, kana, magali, ng’eca man kwo mi dhanu. 14 Eyo, piny ceke ma beco ma cwinyi umaru hai uweki, man cam ceke ma mit ku jamb ayunga peri gidaru rwinyo kud i beng’i man jubinwang’ugi kendo ngo nyanok de.

15 “Jukuloka ma gibed gilworo piny maeno ma gilony ni kume gibicungo ku bor ni kum lworo m’ubenegogi pi masendi pare, gibiwak man can binegogi 16 ma gibewacu kumae: ‘Kayo, kayo, adhura ma dit ma nwang’u uronyere ku bongu ma nwang’, bongu mi rangi m’uluga* man bongu ma kwar ngbo, man m’urukere lee ku jambruko mi mola ma kwar, ku kidi ma pigi tek, man ku kidi ma i upal, 17 kum pi saa acel kende ci lonyo ma dit maeno ginyothiri!’

“Man jego ceke mi meli ku dhanu ceke ma wotho iwi nam, jutic mi meli man dhanu ceke ma gikwo ni kum nam gicungo ku bor 18 man gikok ma tek kinde ma gibeneno yiro pare m’ebewang’ ko, giwacu kumae: ‘Nyo adhura moko nuti de m’ubino calu adhura ma dit maeni?’ 19 Gibikonjo utur i wigi man gibikok ma tek ma nwang’u gibewak, can ubenegogi man giyero kumae: ‘Kayo, kayo, adhura ma dit, ma i iye dhanu ceke ma gibino ku meli i nam gidoko julonyo ni kum lonyo pare, kum i saa acel kende ci enyothere!’

20 “Anyong’a negwu pire, e polo, ku wun wu jumaleng’ bende man jukwenda ku jubila, pilembe Mungu udaru poko lembe i wiye piwu!”

21 Man malaika moko ma tek uting’o kidi ma calu kidi rego ma dit, ebole i nam man ewacu kumae: “Babeli m’adhura ma dit de jubibole nyapil kumeni man jubinwang’e kendo ngo. 22 Man dwand juruwer ma wer kud adungu, jubodho mi wer, ju ma kudho usegu, man ju ma kudho agwara biwinjere ngo kendo nyanok de i beng’i. Man jubinwang’u ngo kendo i beng’i jabodho mi tic moko ci, man dwand kidi rego de biwinjere ngo kendo i beng’i nyanok de. 23 Der mi thala birieny ungo kendo nyanok de i ii, man dwand cwar mugole* ku dwand mugole biwinjere kendo tak de ngo i ii; kum jukuloka peri gibino dhanu ma dongo m’i ng’om, man ni kum timo peri mir ajoga iwingo thek ceke. 24 I iye, junwang’u rimb jubila ku rimb jumaleng’ man rimb dhanu ceke ma junego iwi ng’om.”

19 Yo ng’ei gin maeni, awinjo dwal moko ma tek m’ubino winjere ve dwand udul ma dit i polo. Giyero kumae: “Wupak Yah!* Both, dwong’, man tego ubed ni Mungu mwa, 2 kum pokolembe pare gin andha man atira. Pilembe epoko lembe iwi dhaku ma won asara ma dit m’unyotho ng’om ku lembsasa mi tarwang’* pare, man eculo kwor iwi dhakune pi rimb jumiru pare ma n’i cinge.”* 3 Man ndhundhu nica giyero kendo wang’ mir arionde kumae: “Wupak Yah!* Yiro mir adhurane ubeidho malu rondo ku rondo.”

4 E judongo pier ario wi ang’wen (24) man giracwiya ang’wen ma kwo gipodho arieba wang’gi man girwo ni Mungu m’ubedo iwi komker, giyero kumae: “Amen! Wupak Yah!”*

5 Bende, dwal moko uai kud i komker uwacu kumae: “Wupak Mungu mwa, wu jumiru pare ceke ma wubelwore, ju ma thindho ku ju ma dongo.”

6 Man awinjo dwal moko ma calu dwand udul ma dit man calu dwand pii dupa, man bende calu dwand morpolo ma dit. Giwacu kumae: “Wupak Yah,* pilembe Yehova Mungu mwa ma Jategokpo ucaku nibimo! 7 Dong’ wabed ku mutoro man anyong’a negwa lee nisagu man wamii ire dwong’, pilembe nyom pa Nyathi rombo utundo man dhaku pare udaru yikere. 8 Eyo, juyiyo ire nia eronyere ku bongu ma nwang’ m’uberiang’ini man ma leng’; pilembe bongu ma nwang’ ubenyutho tic mi bedopwe mi jumaleng’.”

9 Man ewacu ira nia, “Kiew kumae: Mutoro ni ju ma julwong’ogi i cemo mir uthieno mi nyom pa Nyathi rombo.” Emedo bende kumae: “Eni tie lembe mandha ma Mungu uyero.” 10 E apodho piny i the tiende pi nirwo ire. Ento eyero ira kumae: “Itimo ang’o no! Kud itim kumeno! Atie kende kende jamiru calu in man calu umego peri ma gitie ku tic mi miyo lembatuca iwi Yesu. Rwo ni Mungu! Kum nimiyo lembatuca iwi Yesu re ma tie ukungu mi lembila.”

11 E aneno polo ugam uyabere man nen! Kana ma tar. Man ng’atu m’ubedo i wiye julwong’e Ng’atu mandha man Ng’atu ma jugeno, epoko lembe man ekiedo lwiny ku bedopwe. 12 Wang’e en e lebmac, man ekendo jamkermiwic dupa i wiye. Etie ku nying’ ma jukiewo ma ng’atu moko mbe m’ung’eyo, ndhu en kende; 13 man eronyere ku bongu ma yo woko, ma juvuko* rimo i kume, man julwong’o nyinge nia Lembe pa Mungu. 14 Bende, udul mony m’i polo gibino lubo ng’eye ma giidho iwi kana ma tar, man gikendiri ku bongu ma nwang’ ma tar, man ma leng’. 15 Man palamularu ma bor ma lake bith m’ebigoyo ko thek ubino wok kud i dhoge, man ebibimo wigi* kud uluth mi cuma. M’umedo maeno, ebenyono i vur mi biyo pigulok mi kwinyo ma lake tek pa Mungu ma Jategokpo. 16 Man etie ku nyinge ma jukiewo iwi kendi pare ma yo woko, iwi bambe nia Ubimo mir ubimo man Rwoth mi rwodhi.

17 Aneno bende malaika moko ucungo i ceng’, man ekok ku dwande ma tek ewacu ni winyo ceke m’uberingo i kor polo kumae: “Wubin kue, wucok dhogwu karacelo pi cemo ma dit mir uthieno pa Mungu, 18 kara wucam ring’ jubim, ring’ judong askari, ring’ dhanu ma tek, ring’ kana ku ring’ ju m’ubedo i wigi, man ring’ dhanu ceke: Ju ma gitie agonya ku ng’eca, ju ma thindho ku ju ma dongo.”

19 Man aneno yedi ma kwiny man ubimo m’i ng’om kud udul mony migi gicoko dhoggi karacelo pi nikiedo lwiny i dhu ng’atu m’ubedo iwi kana man i dhu udul mony pare. 20 Man jumaku yedi ma kwinyne man jabila mi ndra bende m’ubino timo musana i wang’e pi niwondo dhanu m’unwang’u kiedo pa yedi ma kwiny man ju m’urwo ni ayi pare. Kinde ma fodi gikwo, jubologi ceke i nammac m’ubewang’ ku muganga. 21 Ento dong’gi m’udong’ junego ku palamularu ma bor m’uwok kud i dhu ng’atu m’ubedo iwi kana. Man winyo ceke giyeng’ ku ring’gi.

20 Man aneno malaika moko ai malu ubeloro piny m’emaku nyamufutha mi longoro ma there mbe man nyoro ma dit i cinge. 2 Egam emaku ng’ec, en m’etie thwol ma con ma julwong’e Wonabali man Sitani, man etwiye pi oro elufu acel (1 000). 3 Man ebole i longoro ma there mbe, eciko dhoge man eketho ayi i wiye, kara kud ewing thek kendo nyanok de nitundo ma oro elufu acel (1 000) uthum ko. Yor i ng’eye, jubigonye kokoro pi nindo moko nyanok.

4 Man aneno komker, man jumiyo ng’ol mi pokolembe ni ju m’ubedo i wigi. Eyo, aneno ng’eyong’ec* mi ju ma junego* pilembe gimiyo lembatuca iwi Yesu man ginyutho pi Mungu, man ju ma girwo ngo ni yedi ma kwiny, kadok ni ayi pare man ma giyiyo ngo juketh kiedo pare i terwang’gi man i kum cing’gi. Gicer man gibimo karacelo ku Kristu pi oro elufu acel (1 000). 5 (Dong ju m’utho gicer ungo nitundo ma oro elufu acel [1 000] uthum ko.) Eni tie cer ma kwong’a. 6 Mutoro ni ju ma gibicer cer ma kwong’a man gitie bende leng’; kum tho mir arionde umbe ku tego i wigi, ento gibibedo julam pa Mungu man pa Kristu, man gibibimo karacelo kude pi oro elufu acel (1 000).

7 E ndhundhu kinde ma oro elufu acel (1 000) uthum, jubigonyo Sitani kud i kol pare, 8 man ebiwok woko pi niwingo thek mi gund ng’om ang’wen zoo, eyo Gog man Magog, pi nicokogi karacelo pi lwiny. Wendgi calu kwiyo m’i dhu nam. 9 Man gilal i wang’ ng’om zoo man gitieko kagonjo mi jumaleng’ man adhura ma jumaru. Ento mac uloro niai kud i polo uwang’ugi pet. 10 Man jubolo Wonabali m’ubino wingogi i nammac ma wang’ ku muganga, kaka ma nwang’u dong’ yedi ma kwiny ku jabila mi ndra gin’i iye, man gibisendiri dieceng’ ku diewor rondo ku rondo.

11 Man aneno komker moko ma dit ma tar ku Ng’atu m’ubedo i wiye. Ng’om ku polo uringo cen kud i wang’e man kaka unwang’ere igi ngo. 12 Man aneno ju m’utho, ju ma dongo ku ju ma thindho gicungo i wang’ komker, man juyabu kithabu m’adola. Ento juyabu kithabu m’adola mange; en e kithabu m’adola mi kwo. E jupoko lembe mi ju m’utho nimakere ku gin m’ugorere i kithabu m’adola maeno calku tic migi. 13 Man nam uwodho ju m’utho ma n’i iye, man tho ku Kabuli* de giwodho ju m’utho ma n’i igi, e jupoko lembe pa ng’atuman nimakere ku tic pare. 14 Man jubolo tho ku Kabuli* i nammac. Nammac ubenyutho tho mir arionde. 15 M’umedo maeno, ng’atu moko ci ma junwang’u nyinge ugorere ngo i buku mi kwo jubole i nammac.

21 Man aneno polo ma nyen ku ng’om ma nyen, kum polo ma con ku ng’om ma con udaru kadhu, man nam de dong’ umbe. 2 Aneno bende adhura ma leng’, Yeruzalem ma nyen m’ubeloro niai kud i bang’ Mungu i polo man juyike calu nyamugole* m’urukere ni nico pare. 3 E agam awinjo dwal ma dit uai i komker uwacu kumae: “Nen! Hema pa Mungu ni karacelo ku dhanu, man ebibedo kugi, man gibibedo dhanu pare. Man Mungu en gire bibedo karacelo kugi. 4 Man ebiweyo piwang’ pet kud i wang’gi, man tho bibedo nuti kendo ngo, kadok lembcan, kadi nduru, kadok remokum de bibedo nuti kendo ngo. Lembe ma con udaru kadhu.”

5 Man Ng’atu m’ubedo iwi komker uwacu kumae: “Nen! Abedwoko gin ceke nyen.” Eyero bende kumae: “Kiew, kum lembe maeni gi mandha man ma jugeno.” 6 Man ewacu ira kumae: “Gidaru timiri! An a Alfa man Omega,* acaki man ajiki. Ni ng’atu ma rieu ubenege, abimiyo ire mi mananu kum pii mi kwo m’ubedhenyini. 7 Ng’atu moko ci m’uloyo bilagu gin maeni, abibedo Mungu pare man ebibedo woda. 8 Ento julworo, ku ju ma gimbe ku yiyoyic, ku ju ma gicido man ma gi gin ma judagu, ku juneg nek, ku ju ma gitimo lembsasa mi tarwang’,* ku ju ma giweco ku tipo,* man ju ma girwo ni ayi gin m’acwiya, ku jundra ceke, maka migi bibedo i nammac ma wang’ ku muganga. Eni nyutho tho mir arionde.”

9 Acel m’i kind jumalaika abiro ma gibino ku tabu abiro m’upong’ ku masendi abiro ma tokcen ubino man ewacu ira kumae: “Bin, abinyutho iri nyamugole ma tie dhaku pa Nyathi rombo.” 10 E i tego mi tipo, etera nitundo iwi got moko ma dit man ma wiw, man enyutho ira adhura ma leng’, Yeruzalem m’ubeloro niai kud i polo i bang’ Mungu 11 m’etie ku dwong’ pa Mungu. Ebino rieny calu kidi moko ma pire tek lee dit, calu yaspi m’uberieny ve kidi ma iye pelele ma julwong’o kristhal. 12 Etie ku gang’ ma dit man m’uidho malu, man gang’ne tie ku dhugola apar ario (12) ku jumalaika apar ario i dhu dhugolanegi, man iwi dhugolanegi jukiewo nying’ suru apar ario mi wot Israel. 13 Yo nyangu etie ku dhugola adek, yo malu dhugola adek, yo piny dhugola adek, man yo reto de dhugola adek. 14 Jugiero gang’ mir adhurane iwi kidi apar ario (12) mi kathere, man jukiewo nying’ apar ario mi jukwenda apar ario pa Nyathi rombo i wigi.

15 Ng’atu m’ubino weco kudane umaku agada mi mola ma kwar mi pimo piny i cinge kara epim ko adhurane, dhugolane, man gang’ne. 16 Man adhurane tie ku ng’ete ang’wen ma girom rom, kabor pare ku kalacne gi rom. Man epimo adhurane kud agada, ewok kilometre ma romo elufu ario dak ario ku pier ario (2 220); kabor pare, kalac pare, man kadongone gi rom. 17 Epimo bende gang’ mir adhurane, ewok metre ma romo pier abusiel wi ang’wen (64) nimakere ku pim mi dhanu, ma tie bende pim pa malaika. 18 Jugiero gang’ mir adhurane ku kidi m’uriang’ini ma julwong’o yaspi, man adhurane ubino mi mola ma kwar ma leng’ ma iye pelele calu kieu. 19 Juruko kathere mi gang’ mir adhurane ku kwond kidi ceke ma pigi tek: Kathere mi kwong’o jugiero ku kidi m’uberiang’ini ma julwong’o yaspi, kathere mir ario ku kidi ma julwong’o safir ma iye nen ve rangi mi kor polo, kathere mir adek ku kidi ma kume ubed uthumo ma julwong’o kalsedhwan, kathere mir ang’wen ku kidi ma julwong’o emerod ma rangine calu lum ma numu, 20 kathere mir abic ku kidi m’ang’ec ma julwong’o sardhoniks, kathere mir abusiel ku kidi ma julwong’o sardhwan ma iye thumo col tar ku ma kwar, kathere mir abiro ku kidi ma julwong’o krizolith ma iye rieny calu mola ma kwar, kathere mir abora ku kidi ma julwong’o beril ma colne nen calu nam, kathere mir abung’wen ku kidi ma julwong’o thopaz ma iye nen calu rangi mi thiwuriang’, kathere mir apar ku kidi ma julwong’o krizopraz ma rangine calu arusi, kathere mir apar acel ku kidi m’uluga ma nyafurafura ma julwong’o yasenth, kathere mir apar ario ku kidi m’ulweku ma julwong’o amethist. 21 Bende, dhugola apar arione ubino kidi apar ario (12) ma i upal; kubang’ dhugolaneman juyiko ku kidi ma i upal acel. Man ndaki ma dit mir adhurane juyiko ku mola ma kwar ma leng’ ma iye pelele calu kieu.

22 Aneno ngo hekalu i iye pilembe Yehova Mungu ma Jategokpo re m’utie hekalune man bende Nyathi rombo. 23 Adhurane umbe ku yeny pa ceng’ kadi dwi pi nirieny i wiye, pilembe dwong’ pa Mungu ucare man thala pare utie Nyathi rombo. 24 Man thek biwotho i der mir adhurane, man jubim m’i ng’om gibikelo dwong’ migi i iye. 25 Jubiciko ngo dhugolane nyanok de ku dieceng’, pilembe diewor bibedo mbe i iye. 26 Man gibikelo dwong’ ku yung mi thek i iye. 27 Ento gin moko ci m’ucido man ng’atu moko ci m’utimo gin ma judagu man jandra bimondo ngo nyanok de i iye, ndhu kende kende ju ma jukiewo nying’gi i kithabu m’adola mi kwo pa Nyathi rombo re ma gibimondo.

22 Man enyutho ira kulo mi pii mi kwo ma wang’e terere calu kidi ma iye pelele ma julwong’o kristhal, m’ubemol niai kud i komker pa Mungu man pa Nyathi rombo, 2 ebeloro kud i die ndaki ma dit mir adhurane. Yen mi kwo ubino i ng’et kulone kun ku kun ma cego nying’gi wang’ apar ario (12), gicego nying’gine kubang’ dwi. Man ithyen ne utie pi keyo kum thek.

3 Man kwong’ bibedo mbe kendo. Ento komker pa Mungu man pa Nyathi rombo bibedo i adhurane, man jumiru pare gibitimo ire tic ma leng’; 4 man gibineno wang’e, nyinge de bibedo i terwang’gi. 5 Bende, diewor bibedo mbe kendo, man gibibedo mbe ku yeny pa der mi thala kadi pa der mi ceng’, kum Yehova Mungu biketho der birieny i wigi man gibibimo rondo ku rondo.

6 Eyero ira kumae: “Lembe maeni gi mandha man ma jugeno; eyo, Yehova Mungu m’uyuyo iwi jubila* uoro malaika pare unyuth ni jutic pare lembe m’ucikere nitimere i ng’ei nindo ma nok. 7 Nen! Abebino pio. Mutoro ni ng’atu m’ubeworo lembe mi lembila ma n’i kithabu m’adola maeni.”

8 An a Yohana, abino ng’atu m’uwinjo man m’uneno giki maeni. Kinde m’awinjo man anenogi, apodho i the tiend malaika m’ubino nyuthogi ira pi nirwo ire. 9 Ento eyero ira kumae: “Itimo ang’o no! Kud itim kumeno! Atie kende kende jamiru calu in, calu umego peri ma gi jubila man calu ju m’ubeworo lembe m’i kithabu m’adola maeni. Rwo ni Mungu.”

10 Eyero ira bende kumae: “Kud imwon ayi iwi lembe mi lembila m’i kithabu m’adola maeni, kum nindo ma juketho ni ceng’ini. 11 Wek ng’atu m’ugondere umedere asu ku timo gondiri, man ng’atu m’ucido umedere asu ku cilo pare; ento ng’atu ma pwe umedere asu ku timo bedopwe, man ng’atu ma leng’ umedere asu nibedo leng’.

12 “‘Nen! Abebino pio, man atie ku sukulia m’abimiyo ni ng’atuman calku tic pare. 13 An a Alfa man Omega,* ng’atu ma kwong’a man ma tokcen, acaki man ajiki. 14 Mutoro ni ju ma gilwoko kanzu migi kara ginwang’ twero mi cidho i bang’ yen mi kwo, man kara ginwang’ kaka mi mondo i adhura nikadhu kud i dhugolane. 15 Yo woko gwogi* man ju ma gitimo lembajoga, ju ma gitimo lembsasa mi tarwang’,* ju ma ginego nek, ju ma girwo ni ayi gin m’acwiya, man ng’atu moko ci m’umaru ndra man ma cwayu ndra.’

16 “‘An a Yesu, aoro malaika para pi nituco lembe maeni iwu pi bero mi cokiri. Atie ulag Daudi man nyakware man cero ma riang’ini mi kugweno.’”

17 Man tipo ku nyamugole* gibemediri niyero kumae: “Bin!” Man ng’atu moko ci m’uwinjo uyer kumae: “Bin!” Bende ng’atu moko ci ma rieu ubenege ubin; dong’ ng’atu moko ci m’umito ugam pii mi kwo mananu.

18 “Abetuco kumae ni ng’atu moko ci m’ubewinjo lembe mi lembila mi kithabu m’adola maeni: Tek ng’atu moko umedo gin moko i kum lembe maeni, Mungu bimedo ire masendi ma jugoro pigi i kithabu m’adola maeni; 19 man tek ng’atu moko ukabu cen kum wec mi kithabu m’adola mi lembila maeni, Mungu bikabu cen maka pare kud i kum yen mi kwo man kud i adhura ma leng’, giki ma jugoro pigi i kithabu m’adola maeni.

20 “Ng’atu m’ubetuco pi lembe maeni uyero kumae: ‘Eyo, abebino pio.’”

“Amen! Bin, Rwoth Yesu.”

21 Bero ma yawe mbe pa Rwoth Yesu ubed ku jumaleng’.