Wec mi woro utie sima ma copo talu i gamiri mwu cuu mandha karacelo
PI JU M’UGAMIRI
3 Woro
THELEMBENE TIE ANG’O?
Tekene ju m’ugamiri gibeworiri, eno bikonyogi ninyutho mer i kindgi kadok nwang’u dhoggi uberombo ngo iwi lembe moko de. Buku moko ma nyinge tie ponji apar pi niyiko i gamiri peri uyero nia, “ju m’ugamiri giuro nitimo lembe moko ci ma dhoggi urombo ngo i wiye. Ento, gimediri niweco i kindgi iwi lembe m’ubewotho rac. Ng’atuman m’i kindgi winjo jadhoge ku woro cil ma gin ario kpo dhoggi rombo ko iwi lembe m’ukwayu gitim.”
CIK MIR UKUNGU MI BIBLIA: ‘Mer . . . yenyo bero pare gire ngo.’—1 Jukorintho 13:4, 5.
“Nimiyo woro ni min ot para tie ninene ni ng’atu ma pire tek man nitimo ngo lembe moko ci ma ketho ewinjere rac kunoke ma copo nyotho gamiri mwa.”—Micah.
PIRANG’O PIRE TIE TEK NIWORIRI I KINDJO
Ka ju m’ugamiri gibeworiri ngo i kindgi, wec migi caku bedo kwa kud acaye, anyware kadike kud avone. Jusay lembe giyero nia, kura ma kumeno nyutho nia gamirine bilal alala.
“Nibemiyo juk ni dhaku peri kud anyware, ku wec m’ukwok man m’ibesembe asemba, binyotho gen m’egeni ko, ebinwang’u nia en kara tije mbe magwei man bilalu gamiri mwu.”—Brian.
ICOPO TIMO ANG’O?
KEPIM LEMBE MA E
Pi yenga acel, keketh wii cuu i kum wec man timo mwu ma tung’ tung’. E i ng’eye, kepenjiri kumae:
‘Acayu jadhoga mi gamiri wang’ adi, man ayunga ke ayunge wang’ adi?’
‘Anyutho woro ni jadhoga mi gamiri i kite ma tung’ tung’ ma kani?’
WUWECI WUKU JADHOGI MI GAMIRI
Timo man wec ma nenedi ma copo konyo ng’atuman m’i kindwu niwinjere nia jubewore?
Timo man wec ma nenedi ma ketho ng’atuman m’i kindwu nwang’u nia jukoso ire woro?
JUK MA TUNG’ TUNG’
Kekiew ayi adek ma tung’ tung’ m’icopo maru junyuth ko iri woro. Kway jadhogi mi gamiri de nia ekiew ma pare. Wuwil gin ma wukiewone i kindwu, man ng’atuman utim tego nitiyo iwi gin ma jadhoge ukiewo.
Kekiew timo moko ma tung’ tung’ ma benyeng’i i bang’ jadhogi mi gamiri. I ng’eye, kor ire nia timo pare m’ikiewone benyeng’i mi tuko ngo.
“Niworo won ot para tie ninyutho nikadhu kud i timo para nia abenene ni ng’atu ma pire tek lee, man abemito nia ebed ku mutoro. Worone benyuthere ku lem ma dongo dongo kwa ngo, ento saa moko, enyuthere ku nyithi lembe ma ng’ili ng’ili m’ibeyero man m’ibetimo.”—Megan.
I zoone, lem ma pire tek utie ngo nidieng’ nia nyo jadhogi ubewori kunoke ngo, ento lembe ma pire ket utie nia nyo andha jadhogi mi gamiri ubenwang’u nia ibewore.
CIK MIR UKUNGU MI BIBLIA: “Wuronyuru ku mer ma thuc, ku kisa, ku berocwiny, ku jwigiri, ku molcwiny man mwonyolembe hai.”—Jukolosai 3:12.