9 Gin ma ketho jung’eyi

THELEMBENE TIE ANG’O?

Gin ma ketho jung’eyi utie ngo kende kende nyingi man ayi peri. Eketho bende i iye kura peri, gin m’iyiyo, man kite peri. I andha, gin ma ketho jung’eyi utie piny ceke m’uketho itie in, nikebed ma yor i ii man ma yo woko.

PIRANG’O PIRE TIE TEK

Kan imoko cuu i kum kite peri, eno bikonyi nicungo ma tek i kum gin m’iyiyo man ibiweko ngo kadok jurimbi de utel wii.

“Dhanu ma pol gitie ve dali ma juketho kaka ma julworo i iye bongu. Ging’iyo ngo gin gigi bongu ma jurony i kumgi, ento jumange re ma ng’iyo.”​—Adrian.

“Aponjo nicero bang’ lembe m’atira kadok nwang’u etie yot ungo de. Aromo yero nia jurimba mandha utie ng’a ni kum gin ma gitimo, man ni kum gin m’atimo ka watiye wakugi.”​—Courtney.

CIK MIR UKUNGU MI BIBLIA: “Wuwek niwotho nimakere ku ng’om maeni, ento wuwek Mungu ulok ayi ma wuparu ko lembe.”​—Jurumi 12:2.

ICOPO TIMO ANG’O?

Ng’ii kilili mandha thenge m’itek i iye ku m’ing’ic i iye, man gin m’iyiyo, pi ning’eyo ka nyo itie kit dhanu ma nenedi kawoni, man imito idok kit dhanu ma nenedi. Yo ma ber m’icopo caku ko utie nidwoko wang’ penji m’ulubo e:

Thenge m’itek i iye: Atie ku bodho man copo ma kani? Lembe ma kanigi m’atek i iye? (Ku lapor: Nyo aworo saa? Akwerara gira? Atimo tic ku tego? Man nyo atie ku berocwiny?) Lembang’o ma beco m’abed atimo?

JUK: Nyo etiye tek iri nipoy pi gin ceke ma beco m’idaru timo kunoke m’iyero? Ka kumeno, penj janyodo peri kunoke jarimbi moko m’igeno ukeukor iri nia thenge peri ma kani m’itek i iye m’ebed eneno man ke pirang’o.

CIK MIR UKUNGU MI BIBLIA: “Ng’atuman ung’ii i tic pare gire, e anyong’a binege i kum tic pare gire, ento ungo pilembe ebeporere ku ng’atu mange.”​—Jugalatia 6:4.

Thenge m’ing’ic i iye: Kura para ma kani m’ukwayu atim alokaloka lee i iye? Saa ma kani m’abed anwang’ara akeca i wang’ abidhe mi timo lembe ma rac? Lembene ma kani m’ukwayu anyuth kweriri gijo lee mandha i iye?

CIK MIR UKUNGU MI BIBLIA: “Ka wabeyero nia, “Wambe ku dubo,” nwang’u wabewondara giwa.”​—1 Yohana 1:8.

Gin m’iyiyo: Abed alubo cik mi kurajo ma kani, man ke pirang’o? Nyo ayiyo Mungu? Ang’o m’uketho ayiyo andhandha nia etiye? Timo ma kani m’abed aneno ni lembe m’atira ngo, man ke pirang’o? Atiye ku genogen ma kani pi nindo m’ubino?

CIK MIR UKUNGU MI BIBLIA: “Lembapora bikuri; Ng’eyo thelembe bigwoki.”​—Lembrieko 2:11.