Juruot, wuwor Yehova karacelo

Calu idaru niponjo i nyathibuku maeni, Biblia tie ku juk dupa ma copo nikonyi ku juruot peri. Yehova mito nia wubed kud anyong’a. Eng’olo nia ka wuketho thier pare i kabedo ma kwong’a, “gin maeni ceke bimedre iwu.” (Matayo 6:33) Emaru dit nia ibed jarimbe. Tim kero peri ceke nibedo jarimb Mungu. Eno tie rwom ma dit akeca ma ng’atini copo nibedo ko.​—Matayo 22:37, 38.

1 KETH WINJIRI PERI KU YEHOVA BED TEK

LEMBE MA BIBLIA YERO: “‘Abibedo iwu ni Wego, man wubibedo ira ni wota ku nyiga,’ [Yehova] wacu.” (2 Jukorinto 6:18) Mungu mito nia idok jarimbe ma ceng’ni. Yo acel mi bedo jarimbene tie Rwo. Yehova ubekweyi nia ‘irwo areri.’ (1 Jutesaloniki 5:17) Etie kud ava mi winjo paru man adieng’acwiny peri. (Jufilipi 4:6) Kan iberwo karacelo ku juruot peri, gibinyang’ nia ineno Mungu ni ng’atu m’utie andha.

M’umedo rwo, ukwayu bende iwinj Mungu. Icopo niwinje kan ibeponjo Biblia man jemni m’ucungo iwi Biblia. (Zaburi 1:1, 2) Bed inyam i lembe m’ibeponjo. (Zaburi 77:11, 12) Kara iwinj Mungu, ukwayu bende ibed icokiri nja i coko mwa ma tung’ tung’.​—Zaburi 122:1-4.

Yo mange ma pire tek ma copo nikonyi kara ibed jarimb Yehova ma ceng’ni tie rweyo pire ni dhanu mange. Kan ibemediri nitimo kumeno, ibinwang’u nia ibedoko bende jarimbe ma ceng’ni akeca.​—Matayo 28:19, 20.

LEMBE M’ICOPO TIMO:

• Kubang’ ceng’, wubed wunwang’ saa mi somo Biblia man mi rwo

• Wuketh lembe pa Mungu ubed i kabedo ma kwong’a i ot mwu, niloyo galuwang’ ku nambu

2 NWANG’ ANYONG’A I KUM THIER MWU MI JURUOT

LEMBE MA BIBLIA YERO: “Cor i vut Mungu, man ebicoro i vutwu.” (Yakobo 4:8) Pang program mi timo thier mi juruot man ilube kubang’e kubang’e. (Thangambere 18:19) Ento lembe mange fodi unuti asu. Kubang’ ceng’, ukwayu wuponj Lembe pa Mungu kokoro. Keth juruot peri ubed ku winjiri ma ceng’ni ku Mungu. Pieno, wec pire igi “kinde m’ibedo i ot peri, man kinde m’iwotho i yo, man kinde m’ivuto piny, ku kinde m’iai malu.” (Poi mi Cik 6:6, 7) Keth timo ni Yehova ubed ni lembang’ola peri, calu Yocuwa m’uyero kumae: “An ku ot para, wabitimo ni Yehova.”​—Yocuwa 24:15.

LEMBE M’ICOPO TIMO:

• Wubed ku program mi ponji ma nja man ma copo pong’o yeny pa ng’atuman i ot