Barua m’uai i Guriri m’utelowic

Jurwei lembanyong’a wadwa ma jumer:

Watie ku rwom ma lee dit mi timo thier karacelo ni Yehova Mungu mandha kende! Wabetimo ‘karacelo kude’ tic ma leng’ m’emio iwa man ma bodho kwo; waberweyo lembanyong’a man wabeponjo dhanu iwi Ker pare m’eketho. (1 Kor. 3:9; Mat. 28:19, 20) Pieno, kara watim tic maeni i wang’ ng’om zoo i kwiocwiny man i acel, kwayu lembe upangere ma ber.​—1 Kor. 14:40.

Buku maeni bikonyi kara inyang’ i ayi ma cokiri mi Jukristu ubewotho ko tin eni. Ekoro pi rwom man tic peri m’itie ko Jamulembe pa Yehova. Tek ibeneno rwom peri ni gin ma pire tek man ibetimo tic peri kubang’e kubang’e, ‘ibidoko tek i yioyic.’​—Tic. 16:4, 5; Gal. 6:5.

Pieno, wabekweyi nia isom buku maeni cuu mandha. Nen ayi m’icopo tio ko ku lembe m’i buku maeni i kwo peri. Ku lapor, kan i kind nindo ma ceng’ini eni idoko jarwei ma fodi ulimo ngo batizo, icopo timo ang’o kara ilim batizo pi nidoko Jamulembe pa Yehova? Kan idaru limo batizo, icopo timo ang’o kara iteng’ini i tipo man imed tic peri ni Yehova? (1 Tim. 4:15) Bende, icopo timo ang’o kara cokiri ubed ku kwiocwiny? (2 Kor. 13:11) Nwang’ dwokowang’ penji ma tung’ tung’ maeno i buku maeni.

Kan itie umego m’udaru limo batizo, icopo timo ang’o kara ipong’ lembe m’ukwayere pi nidoko jakony tic man i ng’eye ke nidoko jadit cokiri? Calu ma dhanu elufu ma lee ubemediri nimondo i dilo pa Yehova, yeny mir umego ma giromo pi nitelo wi cokiri utie lee mandha. Buku maeni bikonyi nineno gin m’iromo timo kara itim kero pi nitundo i kum lembakeca maeno mi tipo.​—1 Tim. 3:1.

Waberwo ku cwinywa ceke kara buku maeni ukonyi ing’ei nia itie ku rwom i dilo pa Yehova man inen rwomne ni gin ma pire tek. Wamaru wun ceke lee dit man wabemedara nirwo nia in bende ibed i kind dhanu ma gibibedo ku mutoro rondo ku rondo pi nitimo thier ni Yehova, Wegwa mi polo.​—Zab. 37:10, 11; Isa. 65:21-25.