Dilo m’ubetimo yeny pa Yehova

I WANG’ ng’om zoo, dilo mi lembe mi dini, mi lembgamba, mi kuloka, mi konyo dhanu utie dupa, man ayi migi, thelembe migi man paru m’udikogi ubed ukoc. Ento dilone acel unuti m’ukoc bor dit ku mange ceke. Lembe pa Mungu unyutho kamaleng’ nia dilone tie mi Jumulembe pa Yehova.

² Lembe ma ber utie nia in de idaru mondo i dilo pa Yehova. Ituc ninyang’ nia yeny pa Mungu tie ang’o man kawoni ibetimo yenyne. (Zab. 143:10; Rum. 12:2) Itie jatic pare man ibetimo kud amora karacelo kud umego ku nyimego mi ng’om zoo ma gitie ku mer i kindgi. (2 Kor. 6:4; 1 Pet. 2:17; 5:9) Ni kum lembuno ibenwang’u mugisa man anyong’a lee, calu ma Lembe pa Mungu ung’olo. (Rie. 10:22; Mk. 10:30) Calu ibetimo yeny pa Mungu ku bedopwe tin, eno ibeyikiri pi kwo ma rondo ku rondo i nindo m’ubino.​—1 Tim. 6:18, 19; 1 Yoh. 2:17.

³ Jacwic mwa ma dit utie ku dilo ma tie iwi ng’om zoo m’ukoc ku mange ceke, man telowic mi dilone utie i ayi mi theokrasi. Thelembene, Yehova m’ubimo mi piny ceke, ubetelo wie en. Waketho genogen mwa ceke i wie, pilembe En re m’etie Japoklembe mwa, Jamicik mwa, man Ubimo mwa. (Isa. 33:22) Yehova en e Mungu mi yakini ngo, pieno emaku yub kara lembe uwoth ma ber man ‘watim karacelo kude’ pi nipong’o lembakeca pare.​—2 Kor. 6:1, 2.

⁴ Calu m’ajiki mi ng’om maeni udhingo magwei, wabemedara nicidho i wang’wa i the telowic pa Kristu Yesu, Rwoth ma Mungu ung’io. (Isa. 55:4; Nyu. 6:2; 11:15) Yesu ular uyero en gire nia julub pare gibitimo tic ma lee nisagu m’etimo kinde m’egam ebino iwi ng’om keni. (Yoh. 14:12) Eyero lemandha pilembe eng’eyo nia julub pare gibitimo tije pi nindo ma lee nisagu, wendgi de bibedo lee, man gibitimo tije i kabedo ma lee nisagu pare. Gibirweyo lembanyong’a mi Ker cil i tung’ ng’om ceke.​—Mat. 24:14; 28:19, 20; Tic. 1:8.

⁵ Lembuno ubetimere de andha kumeno. Re, calu ma Yesu ugam uyero kamaleng’, tic mi rweyo lembanyong’a bijik i nindo ma Yehova uketho en gire. Lembila ma pol ma nwang’ere i Lembe pa Mungu ubepong’o man ubenyutho nia ceng’ ma dwong’ pa Yehova ma ng’oyo ndiri ni ceng’ini magwei.​—Yoe. 2:31; Zef. 1:14-18; 2:2, 3; 1 Pet. 4:7.

⁶ Tek wanyang’ nia yeny pa Yehova tie ang’o i dong’ nindo maeni, wabimedo kero mwa ceke pi nitimo gin ma Mungu ubekwayu. Pieno, pire tie tek nia wang’ei cuu kite ma dilo pa Mungu ubewotho ko. Lembe zoo m’ubetimere i dilone ujengere iwi cik mir ukungu mi Biblia, m’uketho i ie cik ma tung’ tung’, telowic, ng’ol man ponji ma nwang’ere i Lembe pa Mungu m’eyuyo i wie.​—Zab. 19:7-9.

⁷ Ka dhanu pa Yehova gibeworo telowic maeno m’ujengere iwi Biblia, gituc nikwo man nitimo tic karacelo ku kwiocwiny man i acel. (Zab. 133:1; Isa. 60:17; Rum. 14:19) Ang’o m’ubediko kind umego ku nyimego kakare ceke ma gibenwang’iri i ie? Utie mer. Waronyo mer man merne re ma cwaluwa nitimo lembe ceke ni umego ku nyimego mwa. (Yoh. 13:34, 35; Kol. 3:14) Kite maeno ma nyayu anyong’a i Mungu re ma konyowa niwotho rom rom ku thenge mi polo mi dilo pa Yehova.

THENGE MI POLO MI DILO PA YEHOVA

⁸ Jabila Isaya, Ezekiel, man Daniel gigam gineno thenge mi polo mi dilo pa Yehova i ginmawokiwang’. (Isa., thek 6; Eze., thek 1; Dan. 7:9, 10) Jakwenda Yohana bende uneno thenge maeno mi dilo pa Yehova i ginmawokiwang’, man enyutho iwa i adundo gin m’enenone i buku mi Lembanyutha. Eneno Yehova ujany iwi komker mi dwong’ man jumalaika gitieko ng’ete, ma gibewacu kumae: “Leng’, leng’, leng’, [Yehova] Mungu, ma Jategokpo, ma yang’ enuti man enuti m’ebibino de.” (Nyu. 4:8) Yohana uneno bende “Nyathi Rombo” pa Mungu, niwacu Yesu Kristu, ucungo “i kind komker.”​—Nyu. 5:6, 13, 14; Yoh. 1:29.

⁹ I ginmawokiwang’ maeno, Yehova ujany iwi komker; eno ubenyutho nia en re m’ebetelo wi dilo pare. Giragora pa 1 Lemkei 29:11, 12 uyero pire man pi dito pare kumae: ‘E, Yehova, dit man tego, man yung, man aloci, ku dwong’ en e peri: kum gin ceke ma ni i polo ku ma ni i ng’om en e peri; Ker en e peri, E Yehova, man Idodiri calu wic wi gin ceke. Lonyo ku yung uai i beng’i, man ibimo wi gin ceke; man i cingi tego man tek ginuti; man dwoko dit ni i cingi, man mio tego ni dhanu ceke.’

¹⁰ Yesu Kristu ubetimo tic karacelo ku Yehova; pieno Mungu udode man emio ire dito ma lee i polo. Mungu “uketho gin ceke bed wor the tiende man emie ya ebed wic ni [cokiri].” (Ef. 1:22) Jakwenda Paulo uyero pi Yesu kumae: “Mungu dode dit apila, man emio ire nying’ ma sagu nying’ ceke; kara i nying’ Yesu cong ceke rum, m’i polo ku m’i ng’om ku ma the ng’om, man kara leb ceke kubang’gi kubang’gi ubin utuc nia Yesu Kristu en e Rwoth, ni dwong’ pa Mungu ma Wego.” (Flp. 2:9-11) Pieno, wacopo ketho genogen mwa ceke iwi telowic ma pwe pa Yesu Kristu.

¹¹ I ginmawokiwang’ moko, jabila Daniel uneno Jadwong’ mi ceng’ ujany iwi komker pare i polo, man jumalaika “rubanga mi rubanga gitimo ire, man rubanga apar bang’ rubanga apar gicungo i wang’e.” (Dan. 7:10) Biblia uweco pir udul mony mi jumalaika eno nia gitie “tipo [pi tic ma leng’], ma juorogi ya gitim tic pi ju ma bicamu pacu mi both.” (Ebr. 1:14) Giracwia maeno ceke mi tipo, jupangugi i ungu ma tung’ tung’ mi ‘komker, bim, ker, man dito.’​—Kol. 1:16, NWT.

¹² Ka wabedo yo man waneno kilili lembe maeno ma jukoro iwi thenge mi polo mi dilo pa Yehova, wacopo nyang’ cuu iwi kite ma jabila Isaya uwinjere ko kinde m’egam eneno i ginmawokiwang’, ‘[Yehova] ujanj iwi komker, ma ni malu malu man m’uting’ere’ man “Juserafi cungo malu i wie.” Isaya uyero kumae: “Can i wia! Kum athum; kum an a dhanu mi dendhok m’ucido, man abedo i kind dhanu mi dendhok m’ucido; kum wang’a neno Ubimo, Yehova mir udul.” Andhandha, saa ma jabila Isaya uneno dwong’ mi dilo pa Yehova, ie wang’ lii man enwang’u nia kara etie gin moko ngo. Lembe m’eneno umulo adundene lee dit, uketho kinde ma lwong’o uai i polo pi niyenyo ng’atu ma copo yio or ma segi mi twong’o pi pokolembe pa Yehova, Isaya uyio ndhu ndhu. Ewacu kumae: “Anuti eni; ora.”​—Isa. 6:1-5, 8.

¹³ Ninyang’ cuu i kum dilo pa Yehova man nibedo ku foyofoc i kume, cwalu dhanu pare bende nitimo kumeno. Calu ma dilo pa Yehova ubecidho i wang’e, wan bende wabetimo kero niwotho rom rom kude. Wabeii ninyutho genogen mwa iwi dilo pa Yehova tin.

DILO PA YEHOVA UBECIDHO I WANG’E

¹⁴ Buku pa Ezekiel thekne 1 unyutho nia Yehova ubetelo wi magali ma dit mi polo. Mutukari maeno mi zungo ubenyutho thenge ma nen ungo mi dilo pa Yehova. Ebetelo wi magaline i ayi ma ber, man ebetio kude nimakere ku lembakeca pare.​—Zab. 103:20.

¹⁵ Tiend magaline acel acel utie ku tiende mange yor i ie, ma tie rom rom man m’utharere athara kude. I ayi maeno re ma tiendgine copo ‘cidho i [ng’ete] ang’wen’ zoo. (Eze. 1:17) Gicopo loko yo migi ria pami goyowang’. Re, magaline utie ku Ng’atu moko ma riek m’ubetelo wie. Yehova copo weko ngo nia dilo pare ucidhi swa kumeni kaka moko ci m’eromo cidho i ie. Ezekiel 1:20 uyero kumae: “Ka ma tek tipo cidho i ie, gin de gicidho.” Pieno, Yehova re m’ubetio ku tipo pare maleng’ pi nitelo wi dilo pare kaka moko ci m’emaru. Dong’ ng’atuman m’i kindwa ucikere nipenjere kumae: ‘Nyo abewotho rom rom ku dilone?’

¹⁶ Niwotho rom rom ku dilo pa Yehova utie ngo kende kende nicidho i coko man nirweyo lembanyong’a. Ku kwong’a, wawotho rom rom ku dilo pa Yehova nwang’u wabetimo mediri mi tipo. Watimo kero ‘ning’io’ lembe ma pigi tek man ning’eyo lero ceke m’ubewotho wok iwi cam mi tipo. (Flp. 1:10; 4:8, 9; Yoh. 17:3) Bende, wiwa ucikere ngo niwil nia kaka ma dilo ni i ie, kwayu lembe zoo upangere ma ber man judik cingjo adika. Pieno, wacikara nipangu man nitio cuu mandha ku saa, kero, bodho man piny ma Yehova umio iwa pi nitimo tic pare. Tekene wabewotho rom rom ku magali mi polo pa Yehova, wabikwo nimakere ku lembe ma waberweyo.

¹⁷ Ku kony mi dilo pa Yehova, wabemedara i wang’wa nitimo yeny pare. Poi nia Ng’atu m’ubetelo wi magali maeno mi polo tie Yehova en gire. Dong’, niwotho rom rom ku magali pa Yehova, nyutho nia wabewore man waketho genogen mwa nia En re m’etie Cana mwa. (Zab. 18:31) Biblia ung’olo kumae: “Yehova bimio tego ni dhanu pare; Yehova bimio mugisa ni dhanu pare ku kwiocwiny.” (Zab. 29:11) Calu watie i dilo pa Yehova tin, wabenwang’u tego man kwiocwiny m’ebemio ni dhanu ma gitie i dilo pare. Ma jiji mbe, Yehova bimedere nipoko mugisa lee dit i wiwa tekene wabemedara nitimo yeny pare tin man nja ku nja.