Yo M’atira Mi Woro Mungu Tie Makani?

1. Ng’a ma copo nyutho iwa yo m’atira mi woro Mungu?

DINI mapol giloko nia giponjo lemandha iwi Mungu. Ento eno tie vupo, pilembe dinine ceke giponjo ponji m’ukoc iwi penji ma nia Mungu tie ng’a man nia wacikara niwore nenedi. Dong’, wacopo ng’eyo nenedi yo m’atira mi woro Mungu? Yehova kende re ma copo nyutho iwa kite ma wacikara niwore ko.

2. Icopo ponjo nenedi yo m’atira mi woro Mungu?

² Yehova umio iwa Biblia kara waponj yo m’atira ma wacopo niwore ko. Pieno, mediri niponjo Biblia, e Yehova bikonyi ninwang’u bero nikum ponji pare ma tung’ tung’ ma nwang’ere i Biblia, pilembe ebedieng’ lee piri.​—Isaya 48:17.

3. Mungu ubemito watim ang’o?

³ Dhanu moko giyero nia Mungu jolo dini ceke, ento Yesu uponjo ngo kumeno. Eponjo kumae: “Ku ba dhanu nzu ma giwacu ira kumae, Rwoth, Rwoth, gibimondo i Ker m’i polo ngo; ento ng’atu m’utimo yeny ma Vwa ma i polo yenyo re.” Pieno, etie lembe ma pire tek nia wakeng’ei yeny pa Mungu, kan ing’eye, watim yenyne. Eno tie lembe mi tuko ngo, pilembe Yesu uporo dhanu ma gibeworo ngo cik pa Mungu ku “ju m’utimo camuco” niwacu, juturcik.​—Matayo 7:21-23.

4. Yesu uyero ang’o pi ng’atu m’umito timo yeny pa Mungu?

⁴ Yesu ular upoyowa nia ebibedo ngo yot iwa saa ceke nitimo yeny pa Mungu. Ewacu kumae: “Wumond ku dhugang’ ma diny: kum dhugang’ ubedo lac, yo de bedo her, ma tundo kanyoth, gi dupa de ma gimondo i ie kud i yoje. Kum dhugang’ ubedo diny, yo de bedo likili, ma tundo i kwo, ju ma lam de e ma ginwang’e.” (Matayo 7:13, 14) Yo ma likili, kunoke ayi m’atira mi woro Mungu, terojo i kwo ma rondo ku rondo. Yo ma lac kunoke ayi m’atira ngo mi woro Mungu, terojo i tho. Ento Yehova ubemito ngo nia ng’atu moko acel de utho. Emio ni dhanu ceke kaka mi ponjo lembe iwie.​—2 Petro 3:9.

YO M’ATIRA MI WORO MUNGU TIE MAKANI?

5. Wacopo ng’io nenedi dhanu ma giworo Mungu i yo m’atira?

⁵ Yesu uyero nia wacopo ng’io ju m’uworo Mungu i yo m’atira. Wacopo ng’iogi nikadhu kud i ponji man i timo migi. Ewacu kumae: “Wubing’eyogi ku nying’gi.” Edok emedo kendo kumae: “Ku ba yen ceke ma ber ecego nyinge ma ber.” (Matayo 7:16, 17) Giragora maeno uwacu ngo nia dhanu ma giworo Mungu gidubo ngo. Ento, jurutic pa Mungu gitimo kero saa ceke nitimo lembe m’atira. Wakeponj kawoni lembe ma copo nikonyowa kara wang’ii dhanu ma giworo Mungu i yo m’atira.

6, 7. Pirang’o ponji mi dhanu ma giworo Mungu i ayi mandha ujengere iwi Biblia? Lapor pa Yesu ubeponjowa ku lembang’o?

⁶ Ponji mwa ucikere nicungo iwi Biblia. Biblia uyero kumae: “Lembagora ceke ma Mungu yuyo i wie ai ba Mungu man ke kulokane nuti mi ponji, mi nyuth ma junyutho ko dubo, ku mi twiny ma jutwinyo kojo de, ku mi ponji ma mi bedopwe: kara dhanu pa Mungu copo romo kakare, m’eyikre ndhu kum tic ceke ma ber kubang’gi kubang’gi.” (2 Timoteo 3:16, 17) Jakwenda Paulo ukiewo ni Jukristu kumae: “Ka wujolo lembe mi kwenda [niwacu, Lembe pa Mungu] i bang’wa, wujole calu en e lembe mi dhanu ngo, ento, calu ebedo andha Lembe pa Mungu.” (1 Jutesaloniki 2:13) Ponji mi dhanu ma giworo Mungu i ayi mandha cungo kende kende iwi Lembe pa Mungu, Biblia. Ejengere ngo iwi paru mi dhanu, iwi suru migi, kunoke iwi gin mange.

⁷ Lembe ceke ma Yesu ubed uponjo ujengere iwi Lembe pa Mungu. (Som Yohana 17:17.) Saa ceke, ebed edok iwi wec mi Lembagora. (Matayo 4:4, 7, 10) Jurutic mandha pa Mungu gilubo lapor pa Yesu man giketho ponji migi ceke jengere iwi Biblia.

8. Yesu uponjowa ku lembang’o iwi woro Yehova?

⁸ Wacikara niworo Yehova kende. Zaburi 83:18 uyero kumae: “In i kendi, ma nyingi Yehova, Ini Ng’atu ma Malu Ngbir wi ng’om ngung’.” Yesu umito dhanu ging’ei Mungu mandha, pieno eponjo dhanu ku nying’ Mungu. (Som Yohana 17:6.) Yesu yero kumae: “Rwo ni Rwoth [niwacu, wor Yehova] Mungu peri, man itim ire kende.” (Matayo 4:10) Pieno, wan ma watie jurutic pa Mungu walubo lapor pa Yesu. Waworo Yehova kende, watio ku nyinge, man waponjo ni dhanu nying’ Mungu, ku lembe m’ebitimo iwa.

9, 10. Wanyutho mer i kindwa nenedi?

⁹ Wacikara ninyutho mer mandha i kindwa. Yesu uponjo julub pare nia gimer i kindgi. (Som Yohana 13:35.) Kadok watie dhanu mi kabedo kunoke suru makani, kunoke nwang’u niki wabed julonyo kunoke jucan de, mer maeno umbe kud akoyakoya. Mer ma wanyutho i kindwa ucikere nidikowa ni umego ku nyimego. (Jukolosai 3:14) Pieno, wadikara ngo i lwiny, man wanego ngo dhanu. Biblia uyero kumae: “Nyithindho pa Mungu nyuthri, man nyithindho pa wonabali: ng’atu ma tek timo bedopwe ngo nwang’u en e pa Mungu ngo, kadok ng’atu m’umaru umin ungo bende.” Edok emedo kumae: “Dong’ wamara: calu Kain ungo ma en e pa ng’atu ma rac, man enego umin.”​—1 Yohana 3:10-12; 4:20, 21.

¹⁰ Wawodho saa mwa, tego mwa man jamcingwa pi nikonyo man niketho cwinywa ikindwa. (Juebrania 10:24, 25) Watimo “ber ni dhanu ceke.”​—Jugalatia 6:10.

11. Pirang’o wayio nia Yesu re ma tie yo ma terojo ibang’ Mungu?

¹¹ Wacikara ninyutho woro ni Yesu pilembe etie yo ma terojo ibang’ Mungu. Biblia uyero kumae: “Man ni kum ng’atu mange both umbe; kum nying’ mange mbe the polo, ma jumio i kind dhanu, ma wakowaboth be ni kume.” (Tic mi Jukwenda 4:12) I Wic mir 5 mi buku maeni, waponjo nia Yehova uoro Yesu ubin umio kwo pare ni jamgony pi dhanu ma wor. (Matayo 20:28) Yehova ung’io Yesu ubed Rwoth kara ebim wi ng’om ngung’. Pieno re ma Biblia uyero nia wacikara nibedo wor ni Yesu ka wamito nikwo rondo ku rondo.​—Som Yohana 3:36.

12. Pirang’o wadikara ngo i lemgamba?

¹² Wacikara ngo nidikara i lemgamba. Yesu udikere ngo i lemgamba. Kinde ma Yesu ubino iwang’ cik, eyero ni Pilato ma jabim mi Roma kumae: “Ker para en e mi ng’ombuni ngo.” (Som Yohana 18:36.) Calu Yesu, wageno mwa Ker pa Mungu mi polo kende; pi thelembe maeno re, ma wadikara ngo i lemgamba kaka moko ci ma wabekwo i ie. Re, Biblia ung’olo iwa nia wawor ‘tego ma ni i wiwa’ niwacu, bimobim. (Jurumi 13:1) Pieno, waworo cik mi ng’om ma wabekwo i ie. Ento, ka cikne ujai ku cik pa Mungu, walubo lapor mi jukwenda, ma giyero kumae: “Wakoworo Mungu be ma sagu woro dhanu.”​—Tic mi Jukwenda 5:29; Marko 12:17.

13. Warweyo lembang’o iwi Ker pa Mungu?

¹³ Wayiyo nia Ker pa Mungu kende re ma bidaru peko mi ng’om. Yesu yero nia jubirweyo “lembanyong’a mi Ker” iwi ng’om ngung’. (Som Matayo 24:14.) Bimobim pa dhanu acel de mbe ma copo timo lembe ma Ker pa Mungu bitimo iwa. (Zaburi 146:3) Yesu uponjo nia warwo pi Ker pa Mungu kinde m’ewacu kumae: “Ker peri bin, Yeny m’iyenyo utimbre i ng’om calu etimbre i polo.” (Matayo 6:10) Biblia uwacu iwa nia Ker pa Mungu binyotho ker ceke pa dhanu man Kerne kende re ma “bicungo mi nja.”​—Daniel 2:44.

14. Jukani ma gibeworo Mungu i yo m’atira?

¹⁴ Calu m’idaru niponjo lembe maeno ceke, penjiri kumae: ‘Jukani ma ponji migi ucungo iwi Biblia? Jukani ma nyutho nying’ Mungu ni dhanu mange? Jukani ma nyutho mer mandha i kindgi, man m’uyio nia Mungu uoro Yesu pi nilaruwa? Jukani ma dikiri ngo i lemgamba? Jukani ma rweyo nia Ker pa Mungu kende re ma bidaru masendi mwa?’ Tie Jumulembe pa Yehova kendgi.​—Isaya 43:10-12.

DONG’ UKWAYU ITIM ANG’O?

15. Wacikara nitimo ang’o ka wamito nia Mungu ujol kite ma wabewore ko?

¹⁵ Niyio kende kende nia Mungu nuti uromo ngo. Kadok pajogi bende giyio nia Mungu nuti, ento giwore ngo. (Yakobo 2:19) Ka wamito nia Mungu ujol kite ma wabewore ko, wacikara kende kende ngo niyio nia enuti, ento bende nitimo lembe m’eyero.

16. Pirang’o wacikara nikoyara cen ku dini mi vupo?

¹⁶ Kara Mungu ujol kite ma wabewore ko, wacikara nikoyara cen ku dini mi vupo. Jabila Isaya ukiewo kumae: “Wuai kud i kinde; wudwokru giwu leng’.” (Isaya 52:11; 2 Jukorinto 6:17) Pieno, wacikara nikoyara cen ku gin moko ci ma tie ku ribiri ku dini mandha ngo.

17, 18. “Babeli ma dit” tie ang’o, man pirang’o ukwayu niwok kud i ie pio pio?

¹⁷ Dini mi vupo tie ang’o? Tie dini moko ci ma tie ku ponji ma copo ketho wawor Mungu i yo m’ukoc ku yo ma Lembe pare yero. Biblia lwong’o dini ceke mi vupo, “Babeli ma dit.” (Lembanyutha 17:5) Pirang’o? Ing’ei pii madit m’uumo ng’om i saa pa Noa, ponji dupa mi dini mi vupo ucaku i adhura mi Babeli. Ponji maeno ugam uromo ng’om ngung’. Ku lapor, dhanu ma gibino nikwo i Babeli, gibed giworo ungu mi mungu adek. Tin bende, dini dupa ponjo nia Mungu tie trinita [niwacu, i Mungu acel juperson adek], ento Biblia ponjo kamaleng’ nia Mungu mandha tie acel kende; nyinge Yehova man nia Yesu tie Wode. (Yohana 17:3) Dhanu ma gibino kwo i Babeli gigam giyio bende nia ka ng’atini utho, kume moko medere asu nikwo man nia kumene copo nisendere i mac ma kuthum. Eno tie lembe mandha ngo.​—Som Thenge ma jumedo, namba 14, 17, kud 18.

¹⁸ Mungu ular uyero nia ceng’ni eni, dini ceke mi vupo binyothere. (Lembanyutha 18:8) Nyo inyang’ de nia ukwayu iwek dini mi vupo pio pio? Yehova Mungu ubemito nia iwok kud i ie pio pio ma fodi saa unuti eni.​—Lembanyutha 18:4.

19. Yehova bidieng’ piri nenedi kan imaku yub mi timo ire?

¹⁹ Kan imaku yub mi weko dini mi vupo kara itim ni Yehova, anyong’a copo nego ngo jurimbi kunoke wat peri moko ikum yub perine, man gicopo caku nisendi. Ento, kud ibed ku jiji, Yehova biweki ngo. Ibidoko acel m’ikind dhanu milioni dupa mi ng’om zoo ma gitie i acel, ma gimariri i andha, man ibibedo ku genogen mi kwo ma rondo ku rondo i ng’om manyen pa Mungu. (Marko 10:28-30) Saa moko yo yo, jurimbi kunoke wat peri ma gibejai ikum yub peri mi timo ni Yehova, gibimaru bende niponjo Biblia.

20. Pirang’o pire tie tek niworo Mungu i yo m’atira?

²⁰ Ceng’ni eni, Mungu bidaru lembe mareco ceke, man Ker pare bibimo wi ng’om ngung’. (2 Petro 3:9, 13) Ebibedo saa maber akeca! Dhanu ceke biworo Yehova i ayi ma Yehova maru wawore ko. Dong’, pire tie tek nia itim pio pio kawoni, man iwor Mungu i yo m’atira.