Dhasamaria i dhu pii m’atong’a

Nindo moko i ng’ey foc mi Kadhukuwijo, Yesu karacelo ku julub pare ging’olo yor i Samaria pi nidok i Galilaya. Ewok ebedo kaka moko ma julwong’o pii m’atong’a pa Yakobo, ceng’ini kud adhura mi Sukar. Kinde m’ebedo pi niyom, julub pare gicidho i adhura pi ning’iewo cam.

E dhaku moko uai kud i adhura ubino nitwomo pii. Yesu uyero ire kumae: ‘Mii ira pii amadhi.’ Edwoko ire kumae: ‘Ibeweco i bang’a pirang’o? An atie Dhasamaria. Juyahudi giweco ngo ku Jusamaria.’ Yesu uyero ire kumae: ‘Ka nwang’u ing’eyo nia atie ng’a, nwang’u in re m’icopo penjo pii i bang’a; e nwang’u acimiyo iri pii mi kwo.’ Dhakune upenje kumae: ‘Imito yero ang’o? Imbe kadok ku ndoy de.’ Yesu uyero ire kumae: ‘Ng’atu ma tek umadhu pii m’amiyo ire, rieu binege kendo ngo.’ Dhakune dwoko ire kumae: “Rwoth, mii ira pii maeno.”

I ng’eye, Yesu uyero ire kumae: ‘Cidh ilwong’ cweri wubin kude i dhu pii m’atong’a keni.’ Edwoko ire kumae: ‘Cwara mbe.’ Yesu uyero ire kumae: ‘Iyero lemandha. Idaru giero wang’ abic, man jal ma wubekwo kude kawoni de tie ngo cweri.’ Dhakune uwacu ire kumae: ‘Abeneno nia itie jabila. Dhanu ma thuwa giyiyo nia wacopo woro Mungu iwi goduni, ento Juyahudi giyero nia wacikara niworo Mungu i Yeruzalem kende. Ayiyo nia kinde ma Masiya bibino, ebiponjowa ku kite ma waromo woro ko Mungu.’ E Yesu uyero ire lembe moko ma nwang’u fodi eyero ngo ni ng’atu moko acel de; eyero kumae: ‘Atie Masiya.’

E dhakune uringo pio i adhura man ewacu ni Jusamaria kumae: ‘Abeparu nia anwang’u Masiya. Kum eng’eyo lembe ceke mi kwo para. Wubin wunen!’ Gilubo toke nitundo i dhu pii m’atong’a man giwinjo ponji pa Yesu.

Jusamaria gikwayu Yesu nia ekeebed i adhura migi. E pi bang’ ario zoo, eponjogi man dhanu dupa giyiye. Giyero ni Dhasamaria kumae: ‘Calu ma wadaru winjo ng’atu maeni ku ithwa, wang’eyo nia etie andhandha jalar mi ng’om.’