Nibedo “Jasamaria ma cwinye leng’,” thelembene tie ang’o?
Lembe ma Biblia udwoko
Jubed jutiyo ku wec ma nia “Jasamaria ma cwinye leng’” akeca pi ng’atu ma timo lembe moko pi nikonyo jumange ma gitie ku yeny mi kony. Wec maeno uwok kud i kpawa kunoke lembabola pa Yesu m’enyutho ko nia jirani ma cwinye leng’ nyutho kisa pi nikonyo jumange, m’umbe nidieng’ i kum thek kunoke kit kwo migi.
I thiwiwec maeni, juweco iwi lembe m’ulubo e:
Lembabola ma nia “Jasamaria ma cwinye leng’,” thelembene tie ang’o?
Nyo kpawa pa “Jasamaria ma cwinye leng’” ubino lembe m’utimere andha?
Lembabola ma nia “Jasamaria ma cwinye leng’,” thelembene tie ang’o?
I adundo, kpawa ma Yesu ukoro utie kumae: Jayahudi moko uai i Yeruzalem ubecidho i Yeriko. Kinde m’eni yo, juwok juyake, jufwode man juweke ceng’ini dhu tho.
Ku kwong’a jalam moko ma Jayahudi ular ukadhu kud i yo ma junyayu ret i iye i kum ng’atu maeno man i ng’eye jadit mi dini mi Juyahudi de udog ukadhu. Kadok gin ceke gibino i thek ma rom ku ng’atu ma junyayu ret i kumene de, re gin zoo gicungo ngo pi nikonye.
Tokcenne, ng’atu moko mi thek mange utundo. Ebino Jasamaria. (Luka 10:33; 17:16-18) Kisa umaku Jasamaria, e eriwo wang’ rem pa ng’atu ma junyayu ret i kume man i ng’eye etere i od welo. Kuca, ewok egwoko ng’atune diewor traka. Nindo m’ulubo, emiyo sente ni jagwok od welo man ewodhere nia ebiculo sente mange ma jagwokne binyotho pi ng’atune.—Luka 10:30-35.
Pirang’o Yesu umiyo lembabola maeno?
Yesu ukoro kpawa maeno ni ng’atu moko m’ubino paru nia dhanu mi thek kunoke mi dini pare kende re m’utie wadi. Yesu umito miyo ponji ma pire tek ni ng’atu maeno ya eng’ey nia “wadi” utie ngo Juyahudi kende. (Luka 10:36, 37) Jukiewo kpawa maeno i Biblia pi bero pa ng’atu moko ci m’ubemito enyay anyong’a i Mungu.—2 Timoteo 3:16, 17.
Lembabola maeno utie ku ponji ma kani?
Kpawa maeno ubeponjowa nia kisa pa jirani ma cwinye leng’ nen ku timo. Etimo lembe moko pi nikonyo ng’atu m’ubesendere m’umbe nidieng’ i kum kit kwo pare, rangi mi dendkume kunoke thek pare. Jirani mandha timo lembe ni jumange tap calu ma en de emito jutim ko ire.—Matayo 7:12.
Jusamaria gibino jukani?
Jusamaria gibed gikwo i ng’om ma nwang’ere ndhundhu yo malu mi Yudea. Jumoko m’i kindgi ubino nyikwayu ma Juyahudi unyolo ku Juyahudi ngo.
Nitundo i rundi ma kwong’a i ng’ey nyol pa Yesu (N.N.Y), nwang’u dong’ Jusamaria gicaku the dini migi gigi. Giyiyo buku abic ma kwong’a mi Giragora mi dhu Juebrania ento gikwero bukune mange.
Juyahudi ma pol mi rundi pa Yesu gibed gicayu Jusamaria man gikwero nidikiri kugi. (Yohana 4:9) Juyahudi moko gibed gitiyo ku wec ma nia “Jasamaria” pi ninywarujo.—Yohana 8:48.
Nyo kpawa pa “Jasamaria ma cwinye leng’” ubino lembe m’utimere andha?
Lembagora unyutho ngo ka nyo lembabola pa Jasamaria ma cwinye leng’ ubino lembe m’utimere andha kunoke ngo. Ento Yesu uweco pi kabedo ku lembe ma juwinj pare ging’eyo ma ber, man ma copo ketho ginyang’ yot yot i lembe m’ebino weco i wiye.
Lembe dupa m’umulo kum kpawa maeno urombo tap ku lembe ma jubed jukoro. Ku lapor:
Yo ma niai i Yeruzalem nicidho i Yeriko ubino kilometre ma kadhu 20, ma kilometrene 1 zoo ubino got ma lora. Kpawane ukoro tap tap nia juruwoth maeno giay i Yeruzalem gibino “loro i Yeriko.”—Luka 10:30.
Julam ku Julawi ma gibed gikwo i adhura mi Yeriko gibed giwotho kud i yo ma rom eno pi nicidho i Yeruzalem.
Wang’ ma pol, jukwo gibed gipondo i ng’et gengi ma ling’ pi nikuro juruwoth m’ubekadhu, asagane ju ma wotho kendgi.