Biblia uyero ang’o iwi gamiri?

Lembe ma Biblia udwoko

I ng’ey ma Mungu ucwiyo nico ku dhaku ma kwong’a, eribogi i gamiri. Eketho gamiri ubed ni dikiri ma segi i kind nico ku dhaku pi nicaku the juruot m’utie i acel.​—Thangambere 1:27, 28; 2:18.

Mungu ubemito jumugamiri gibed ku mutoro. (Lembrieko 5:18) I Biblia, eketho cik moko pi gamiri man cik mir ukungu ma romo konyo kara gamiri ubed ma ber.

I thiwiwec maeni

• Mungu uketho cik mir ukungu ma kani pi gamiri?

• Mungu uyero ang’o iwi pokiri man lalu gamiri?

• Nyo ukwayu juke jukiew nyom i wang’ leta kara Mungu uyiye?

• Biblia umiyo tic ku rwom ma kani ni nico man ni dhaku?

• Nyo Mungu uketho nia ju m’ugamiri gicikiri ninyolo awiya?

• Biblia romo konyo gamiri para nenedi?

• Giragora ma tung’ tung’ m’uweco iwi gamiri

Mungu uketho cik mir ukungu ma kani pi gamiri?

Niai i acaki, Mungu uketho gamiri ubed ni dikiri i kind nico acel ku dhaku de acel. (Thangambere 2:24) Mungu yiyo ngo adhura, gamiri i kind dhanu mi kit cwic ma rom, kunoke nikwo karacelo m’umbe gamiri m’atira. (1 Jukorintho 6:9; 1 Juthesaloniki 4:3) Yesu uponjo julub pare nia giwor cik ma Mungu ular uketho niai con iwi gamiri.​—Marko 10:6-8.

I wang’ Mungu, gamiri utie dikiri ma galu nja. Kinde ma nico ku dhaku gidaru gamiri, ging’olo nia ng’atiman bimoko i kum wadi man gibibedo karacelo i kwo migi ceke. Mungu ubemito gigwok lembang’ola migine.​—Marko 10:9.

Mungu uyero ang’o iwi pokiri man lalu gamiri?

Saa moko kind nico ku dhaku copo pokere, calu ve kinde ma ka ng’atu acel m’i kindgi ucidho i woth pi yeny moko ma pio pio mi juruot. Re Biblia ucwaku ngo nia peko mi gamiri ukel pokiri. Tung’ ku maeno, ebekwayu ju m’ugamiri ma gibenwang’iri i wang’ lembe ma kumeno nia gitim kero giyik lembe m’i kindgi.​—1 Jukorintho 7:10.

Abor re m’utie thelembe acel ma Biblia uyiyo pi nilalu gamiri. (Matayo 19:9) Pieno, ka nico kunoke dhaku ging’iyo nipokiri kunoke nilalu gamiri pi thelembe mange m’uweko abor, nimakere ku Biblia gin zoo gitie ngo agonya nicaku the mer mi gamiri kunoke nidog gamiri kendo ku ng’atu mange.​—Matayo 5:32; 1 Jukorintho 7:11.

Nyo ukwayu juke jukiew nyom i wang’ leta kara Mungu uyiye?

Mungu umito Jukristu giwor cik ma judongo mi ng’om uketho pi gamiri. (Tito 3:1) Kinde ma ka ju m’ugamiri gikiewo nyom migi, eca nwang’u gibenyutho woro ni judongo man i kum cik mir ukungu ma Mungu uketho nia gamiri ubed ni dikiri ma galu nja.a

Biblia umiyo tic ku rwom ma kani ni nico man ni dhaku?

• Rwom migi gin ario zoo. Won ot ku min ot gicikiri nitimo lembe ku mer man woro i kindgi. (Juefeso 5:33) Ukwayu ng’atuman m’i kindgi udieng’ ku yeny mi ribiri pa jadhoge ku mer man eur lembe moko ci ma nyotho gamiri pare ku jadhoge. (1 Jukorintho 7:3; Juebrania 13:4) Ka nico ku dhaku gitie kud awiya, gin ceke gitie ku rwom mi tungo awiyane.​—Lembrieko 6:20.

  

  Biblia ukoro ngo acel acel kite ma ju m’ugamiri gicikiri nipoko ko tic mi kum man mi pacu i kindgi. Gicopo ng’iyo karacelo lembe ma romo bedo ber ni juruot migi.

• Rwom pa nico. Biblia uyero nia “cwar dhaku en e wic ni dhaku.” (Juefeso 5:23) Etie wic i lembe ma nia ecikere nitelo wi juruot pare, nimaku yub ma copo miyo bero ni min ot pare man ni awiya migi.

  

  Ukwayu enen nia epong’o yeny mi juruot ot pare kara gibed ku yotkum ma cuu, kud anyong’a man gibed ceng’ini ku Mungu. (1 Timoteo 5:8) Enyutho nia ebeneno kite man copo ma min ot pare utie ko ni gin ma pire tek nwang’u ebetimo tic karacelo kude; man kan ebemaku yub edieng’ i kum paru man ayi ma min otne ubewinjere ko. (Lembrieko 31:11, 28) Biblia uyero nia won ot ucikere nipong’o rwom pare ku mer.​—Jukolosai 3:19.

• Rwom pa min ot. Biblia uyero nia “dhaku ucikere ninyutho woro ma thuc ni cware.” (Juefeso 5:33) Anyong’a nego Mungu ka dhaku ubenyutho woro i kum rwom ma Mungu umiyo ni won ot pare.

  

  Tic pa min ot utie nidiko cinge ku won ot pare, nibekonye kara emak yub ma cuu, man nicero ba dito pare. (Thangambere 2:18) Biblia uweco ma ber mandha pi dhaku m’ubepong’o rwom pare ma pire tek i gamiri.​—Lembrieko 31:10.

Nyo Mungu uketho nia ju m’ugamiri gicikiri ninyolo awiya?

Ungo. Yang’ con, Mungu ung’olo ni jutic pare moko nia ginyol awiya. (Thangambere 1:28; 9:1) Ento Jukristu gitiyo ngo ku cik maeno. Yesu ung’olo ngo nyanok de ni julub pare nia ginyol awiya. Kadok julub pare bende giyero ngo nia ju m’ugamiri gicikiri ninyolo awiya. Ju m’ugamiri gicopo ng’iyo gin gigi ka nyo gibinyolo awiya kunoke ngo.

Biblia romo konyo gamiri para nenedi?

Biblia utie ku cik ma copo konyo ju m’ugamiri nicaku the gamiri migi ma ber. Bende, cik mi Biblia romo konyo ju m’ugamiri niuro kunoke nivoyo peko ma tung’ tung’.

Cik mi Biblia copo konyo ju m’ugamiri ni . . .

• nyutho mer mandha.​—1 Jukorintho 13:4-7; Jukolosai 3:14.

• nyego i kum koso winjiri.​—1 Jukorintho 10:24.

• bedo juwinj ma ber.​—Yakobo 1:19.

• nyutho woro.​—Jurumi 12:10.

• bedo juwek lembe.​—1 Pethro 4:8.

• bedo ng’atu m’atira.​—Marko 10:9.

• bedo jucir lembe.​—Juefeso 4:2, 3.

• timo tic karacelo.​—Eklizia 4:9.

• dwoko winjiri m’i kindgi ubed ma tek.​—Wer pa Suleman 8:7.