4 Timo kisa

THELEMBENE TIE ANG’O?

Nitimo kisa thelembene tie niweko cen lembe ma rac ma ng’atu moko utimo iri man nikayu ngo lembene nyanok de. Nitimo kisa utie ngo nivono kosa ma jutimo man nibedo ve nia lembe moko mbe m’utimere.

CIK MIR UKUNGU MI BIBLIA: “Wumeduru niciruru i kindwu ng’atuman ucir wadi man ucir wadi, man wuwek lembe m’i kindwu yot yot kadok nwang’u ng’atu moko utie ku lembe i iye i kum wadi de.”​—Jukolosai 3:13.

“Kan imaru ng’atu moko, ibibesayu ngo kwa nyithi kosa pare, kakare nitimo kumeno, nen kite m’ebetegere ko nitimo lembe ma cuu.”​—Aaron.

PIRANG’O PIRE TIE TEK NITIMO KISA NI JADHOGI MI GAMIRI

Tekene ibed igwoko dhu kosa gbuku i adundeni, lembuno bitimi rac i leng’kum peri man i kite m’iwinjiri ko; bende icopo nyotho kadok gamiri peri.

“Nindo moko, won ot para ugam ukwayu kisa i bang’a pi lembe moko m’uton i iya lee mandha. Ebino ira lembe ma tek niweko ire. Re adok aweko ire, man adieng’ nia pirang’o agam atimo ngo kumeno i wang’ saa. Lembuno unyayu doy ma kathere mbe mananu i kindwa.”​—Julia.

ICOPO TIMO ANG’O?

KEPIM LEMBE MA E

Pi nindo ma cen, kinde ma ka jadhogi mi gamiri biyero kunoke bitimo lembe moko m’ucobo cwinyi, kepenjiri kumae:

• ‘Nyo an lembe beton i iya piyo dit ba?’

• ‘Nyo kosa nini pek m’ukwayu jutim ko ira kisa ngi, kunoke nyo acopo weko ngo lembene ukadhi?’

WUWECI WUKU JADHOGI MI GAMIRI

• Ebed eting’o iwa kare ma rukani pi niweko lembe i kindwa?

• Wacopo timo ang’o kara watuc niweko lembe piyo piyo?

JUK MA TUNG’ TUNG’

• Ka lembe moko utimi rac, kud iredh kosa ne wang’acel iwi jadhogi mi gamiri.

• Kepim nitimo kisa pi kura pa jadhogi mi gamiri, m’ibepoy ko nia, “wan ceke wakier wang’ ma pol.”​—Yakobo 3:2.

“Ebedo yot iwa nitimo kisa ka wan ario zoo watiye ku kosa, ento ka kosane ubenen ve nia etie pa ng’atu acel, ebedo lembe ma tek magwei nitimo kisa. Niyiyo kisa man weko lembe kwayu jwigiri mandhandha.”​—Kimberly.

CIK MIR UKUNGU MI BIBLIA: “Tim pio iyik lembe.”​—Matayo 5:25.