Nyo aromo nwang’u de jukocwiny i Biblia?

Lembe ma Biblia udwoko

Eyo. (Jurumi 15:4) Kenen verse moko mi Biblia m’udaru konyo dhanu ma dupa ma gibenyego ku peko man turcwiny mir ayi ma tung’ tung’.

I thiwiwec maeni, juweco iwi lembe m’ulubo e:

Peko

Zaburi 23:4: “Eyo, kadok akadhu kud i longro mi tipopiny mi tho, lworo binega ngo kum gin moko ma rac; kum ini karacelo kuda.”

Thelembene: Kan iberwo i bang’ Mungu man ibejengiri iwi telowic mi Lembe pare Biblia, ibinwang’u tegocwiny mi nyego ku peko peri.

Jufilipi 4:13: “Pi gin ceke atie ku kero ni kum ng’atu m’ubemiyo ira tego.”

Thelembene: Mungu romo miyo iri kero mi nyego ku peko moko ci.

Ka ng’atu moko m’imaru utho

Eklizia 9:10: “Tic moko mbe, kadi bodho, kadi ng’eyong’ec, kadi rieko, i liel.”

Thelembene: Ju m’utho gibesendiri ngo kadi gicopo timowa rac de ngo. Gin ma ging’eyo mbe.

Tic mi Jukwenda 24:15: “Cer bibedo nuti.”

Thelembene: Wedi mwa ma wamaru ma githo, Mungu bicerogi.

Ka pidocwinyi ubesendi asu asu pi dubo peri ma con

Zaburi 86:5: “Kum in, [Yehova],a i ber, man ibedo ayika mi weko dubo, man i dit i mer mi bero ni dhanu ceke m’ulwong’i.”

Thelembene: Mungu timo kisa ni dhanu m’ubedieng’ i andha i kum kosa ma gitimo con man ma gikeco nia gibitimo ngo lembe ma rom kendo.

Zaburi 103:12: “Calu yo nyangu bedo bor ku yo reto, e ecoro kier mwa bor kumeno kud i kumwa.”

Thelembene: Ka Mungu ubetimo kisa, ecoro dubo mwa bor nikadhu ma wacopo paru. Edwogo ngo iwi lembene kendo kendo pi nipenjo dhogwa kunoke pi nimiyo iwa matira.

Kan itie ku can i cwinyi

Zaburi 31:7: “Ineno masendi para; ing’eyo ng’eyong’ec para i ruvwa.”

Thelembene: Mungu ung’eyo lembe ceke m’ubenyayu can i cwinyi. Enyang’ i kite m’ibewinjiri ko kadok jumange ubenyang’ ungo de.

Zaburi 34:18: “Yehova ni ceng’ni [ku] ju ma adundegi tur, man ebodho wagi ju ma cwinygi dieng’ kum dubo migi.”

Thelembene: Mungu ung’olo nia ebikonyi kan ibewinjiri ku can. Ebimiyo iri kero m’inyeg ko ku can peri.

Twoyo

Zaburi 41:3: “Yehova bijenge wi kavuto mi mulima.”

Thelembene: Mungu copo miyo iri kwiyocwiny mir adunde, tego, cirocir, man rieko kara inyeg ku twoyo peri man kara imak yub ma cuu.

Isaya 33:24: “Ng’atu m’ubedo i ie biwacu ngo kumae, Kuma lith.”

Thelembene: Mungu ung’olo pi nindo ma dhanu ceke bibedo i iye ku yotkum ma ber.

Ang’abacwiny

Zaburi 94:19: “I udul pidoic ma yor i ia juk peri nyayu anyong’a i ng’eyong’ec para.”

Thelembene: Ka wajengara iwi Mungu kinde ma watie kud ang’abacwiny, eromo konyowa nibedo ma kumwa kwiyo.

1 Pethro 5:7: “Wubol adieng’acwiny mwu ceke i kore, pilembe ebedieng’ piwu.”

Thelembene: Mungu loko ngo ng’eye i kum masendi mwa, ento ekwayuwa nia wakor ire lembe m’ubedieng’o iwa.

Lwiny

Zaburi 46:9: “Ekwio lwiny cil i kajik mi ng’om.”

Thelembene: Ceng’ini eni, Ker pa Mungu bidaru lwiny kpo.

Zaburi 37:11, 29: “Ento ju ma mol gibicamu ng’om ni aba, man gibinyayu mutoro i igi gigi kum dit mi kwiocwiny. . . . Won bedopwe bicamu ng’om ni aba, man ebibedo i ie mi nja.”

Thelembene: Dhanu m’atira gibibedo ku kwiyocwiny rondo ku rondo iwi ng’om.

Ka itie ku lworo pir anyim peri

Yeremia 29:11: “Ang’eyo pidoic m’aparu yor i beng’wu, Yehova wacu, pidoic mi kwiocwiny, man mi lem ma rac ungo, kara umi iwu genogen i kajik mu ma cen.”

Thelembene: Mungu ubetego cwiny dhanu pare nia anyim ma ber udhingo igi ceng’ini eni.

Lembanyutha 21:4: “Ebiweyo piwang’ pet kud i wang’gi, man tho bibedo nuti kendo ngo, kadok lembcan, kadi nduru, kadok remokum de bibedo nuti kendo ngo. Lembe ma con udaru kadhu.”

Thelembene: Mungu ung’olo nia ebidaru lembe ma reco ceke m’ibeneno man m’ibekadhu kud i igi.

a Yehova utie nying’ Mungu ma dhe. (Zaburi 83:18) Som thiwiwec “Yehova tie ng’a?”