Gin moko mbe ma romo cerogi

Ng’atu moko ma wotho ngo ubed ubedo pi nikwayu piny i dhugola mir hekalu. Reto moko kumeni, eneno Pethro giku Yohana gibecidho i hekalu. Ekwayugi kumae: ‘Wukemii ira piny moko do!’ Pethro udwoko ire kumae: ‘Gin m’abecimiyo iri tie ber nisagu sente. I nying’ Yesu, ai malu iwothi!’ E Pethro umaku cinge kara eai malu, man ng’atune ucaku wotho! Anyong’a ma yawe mbe unego udul dhanu nikum udu maeno, uketho dhanu dupa udoko juyic.

Ento kwinyo ulund umaku julam ku Jusadukayo. Pieno gimaku jukwenda man giterogi i wang’ pido, e gipenjogi kumae: ‘Ng’a m’umiyo iwu copo mi keyo kum ng’atuni?’ Pethro udwoko igi kumae: ‘Wanwang’u copo i bang’ Yesu Kristu ma wunego.’ Judong dini gikok i wigi kumae: ‘Wuwek niweco iwi nying’ Yesu!’ Ento jukwenda gidwoko kumae: ‘Wabimedara mwa niweco pire. Wabiling’ ungo.’

Kinde ma giweko Pethro giku Yohana, gicidho ndhu ndhu i bang’ julub mange man gikoro igi lembe m’utimere. E gigam girwo karacelo, gikwayu Yehova kumae: ‘Ka copere, mii iwa tegocwiny kara wamedara nitimo tic peri.’ Yehova umiyo igi tipo pare ma leng’, uketho gimediri nirweyo man nikeyo kum dhanu. E dhanu ma dupa udoko juyic. Ento Jusadukayo gibino ku kumira ma lee uketho gitwiyo jukwenda man gibologi i kol. Re ku diewor nica, Yehova uoro malaika ubin ugonyo dhugola kol man eyero ni jukwenda kumae: ‘Wucidh i hekalu man wuponj kuca.’

Urwonde pir kugweno, jucidh juyero ni Sanedrini, niwacu otpido ma malu mi Juyahudi kumae: ‘Dhugola kol utie atwiya, re dhanu ma wutwiyo ca giwok! Gin’i hekalu; gibeponjo migi dhanu!’ E jucidh jumaku jukwenda kendo man juterogi i wang’ Sanedrini. Jalam ma dit uyero igi kumae: ‘Wang’olo iwu ya kud wuwec iwi nying’ Yesu!’ Ento Pethro udwoko igi kumae: “Wacikara niworo Mungu kakare niworo dhanu.”

Judong dini gibino ku kwinyo ma lee dit uketho gimito gineg jukwenda cen. Ento Jafarisayo moko ma nyinge Gamaliel uai malu man ewacu kumae: ‘Wubed ku weng’wu. Saa moko nyo Mungu tie ku dhanu maeni. Nyo andha wubemito wukied i dhu Mungu?’ E giwinjo juk pare. Pieno, i ng’ey ma gifodo jukwenda ku del, ging’olo igi kendo nia kud gimediri nirweyo, e giwekogi gicidho. Ento lembuno de ucero ngo jukwenda. Gimediri asu nirweyo lembanyong’a ku tegocwinygi i hekalu man bende ot kubang’ ot.