Julub ginwang’u tipo ma leng’

I ng’ey nindo apar niai ma Yesu udok i polo, julub pare ginwang’u tipo ma leng’. Lembene utimere i ceng’ mi foc mi Pentekoste mi oro 33 N.N.Y., man nwang’u dhanu giai kaka ma tung’ tung’ gibino i Yeruzalem pi nitimo focne. Ento julub pa Yesu ma romo 120 gicoko dhoggi karacelo i kusika moko ma malu. E mbwang’ kumeni, lembe moko mi wang’uic utimere. Piny moko ma calu lebmac uwok iwi ng’atuman acel acel m’i kind julub, man gin ceke gicaku weco dhok ma tung’ tung’. E dwal moko ma tek calu avuvu uromo ot zoo.

Welo ma tung’ tung’ m’uai i ng’om mange m’ubino i Yeruzalem giwinjo dwal ma tek maeno man giringo i bang’ otne pi nineno lembe m’ubetimere. Igi wang’ lii kinde ma giwinjo nia julub gibeweco dhok ma tung’ tung’. E giyero kumae: ‘Dhanu maeni gi dhanu mi Galilaya. Ka dong’ gibeweco dhok mwa e nenedi?’

Pethro ku jukwenda mange gigam gicungo i wang’ udul dhanu maeno. E Pethro ukoro ni dhanu pi nek ma junego ko Yesu man ayi ma Yehova ucere ko ku kind ju m’utho. Pethro uyero kumae: ‘Kawoni Yesu n’i polo i cing’ Mungu ma yor acwic man ekonjo tipo ma leng’ ma jular jung’olo pire. Eno re m’uketho wubeneno man wubewinjo udu maeni.’

Wec pa Pethro umulo adunde dhanu lee mandha uketho gipenje kumae: “Wacikara nitimo ang’o?” Edwoko igi kumae: ‘Wuyew dubo mwu man wulim batizo i nying’ Yesu. E wubinwang’u bende giramiya mi tipo ma leng’.’ Cing’ nica ci dhanu ma romo elufu adek (3000) gilimo batizo. Niai eca, wend julub ucaku medere pio pio mandha i Yeruzalem. Pieno ku kony mi tipo ma leng’, jukwenda gicaku the cokiri dupa, wek kara gibed giponj julub ku lembe ceke ma Yesu ung’olo igi.