Jakur otkol moko udoko Jakristu

I adhura mi Filipi, ng’eca moko ma nyaku ubino ku pajogi i iye. Pajogine ubed utiyo kude pi ninyutho lembe ma bitimere i nindo m’ubino, man nyakune ubed uroyo sente lee ni ju m’ebed etimo igi. Kinde ma Paulo giku Sila gitundo i adhura mi Filipi, nyaku maeno ubed ulubo tokgi pi nindo ma dupa. Pajogi m’i iye ubed uketho ekok kumae: ‘Dhanu maeni gitie jutic pa Mungu ma Malu ngbir.’ E nindo acel Paulo uyero ni pajogine kumae: ‘Abeng’olo iri ku nying’ Yesu, wok kud i iye!’ Pajogine ugam uwok cen kud i nyakune.

Kinde ma ju ma nyaku maeno ubed utimo igi gineno nia dong’ gibinwang’u ngo sente kendo nikume, lembene unyayu ng’eicwiny lee i igi. E gimaku Paulo giku Sila man giterogi i wang’ jupoklembe, giyero kumae: ‘Joni gibeturo cik man gibesendo dhanu ceke mir adhura mwa.’ Jupoklembe ging’olo nia jufod Paulo giku Sila man jubolgi i kol. Jakur otkol uroyogi i kusika mi the otkol kaka ma col bii man etwiyo tiendgi i bau.

Kinde ma Paulo giku Sila gibepaku Yehova ku wer, jumange ma jutwiyo gikugi de gibino winjo; e mbwang’ kumeni i diewor ma ling’, giwinjo digidi ma tek ucaku yengo otkol ceke. Dhugola otkol ugam uyabere wang’ acel man nyoro ku gin moko ci ma jutwiyo kogi ugony lwany. Jakur otkol uringo i kusika man enwang’u dhoge tie thwolo, e eparu nia dhanu ceke ma jutwiyo gipiey, pieno eting’o palamularu kara enegere ko cen.

E ndhu ndhu nica, Paulo ukok kumae: ‘Kud itim lembe ma rac i kumi! Wan ceke wanuti!’ Jakur otkol uringo i bang’ Paulo giku Sila man epodho i the tiendgi. Epenjogi kumae: ‘Acikara nitimo ang’o kara abothi?’ Giyero ire kumae: ‘In ku juruot peri ceke wucikuru niyiyo Yesu.’ I ng’eye, Paulo giku Sila giponjo lembe pa Yehova ni jakur otkol maeno ku juruot pare ceke, e gin zoo gilimo batizo.