Paulo giku Timoteo

Timoteo ubino umego moko m’aradu mi cokiri mi Lustra. Won ubino Jagiriki man min ke ubino Nyayahudi. Min ma Eunike giku wang’umire ma Lois gicaku ponje ku lembe pa Yehova niai m’e nyathin.

Kinde ma Paulo utundo i cokiri mi Lustra i saa mi woth pare mir ario mi rweyo lembanyong’a, ewok eneno nia Timoteo umaru umego lee man nia etie ayika nikonyogi. E Paulo ulwong’e nia gicak wotho kude pi nirweyo lembanyong’a. Nok nok, jakwenda Paulo ugam uponjo Timoteo kara ebed jarwey lembanyong’a man japonji ma jabodho.

Tipo ma leng’ utelo wi Paulo giku Timoteo kaka ceke ma gicidho i iye. I gin ma wok i wang’ ma Paulo uneno ku diewor moko, jalwo moko ulwong’e nia ebin i Makedonia pi nikonyogi. E Paulo, Timoteo, Sila man Luka gicidho kuca pi nirweyo lembanyong’a man nicaku the cokiri ma tung’ tung’.

I Thesaloniki ma tie adhura mi Makedonia, jumaco ku jumamon dupa gidoko Jukristu. Ento Juyahudi moko gibino ku kumira i kum Paulo ku juwodhe. Gicwayu udul dhanu ma kwiny i kumgi man gimaku umego giterogi i wang’ jubim mir adhura ma gibekok kumae: ‘Dhanu maeni gibejai i kum bimobim mi Roma!’ Calu ma kwo pa Paulo giku Timoteo ubino i ariti, giringo ku diewor i Beroya.

Dhanu mi Beroya gibino kud ava mi winjo lembanyong’a, e Jugiriki ku Juyahudi ma pol mir adhura maeno gidoko juyic. Ento kinde ma Juyahudi moko m’uai i Thesaloniki ubin unyayu yakini i adhura mi Beroya, Paulo uweko adhura maeno man ecidho i Athene. Timoteo giku Sila ke gidong’ i Beroya pi nitielo cwiny umego ku nyimego. I ng’eye, Paulo uoro Timoteo udok kendo i Thesaloniki pi nikonyo umego kara gicir ragedo ma tek ma gibenwang’iri ko kuca. I ng’ey kare, Paulo udok uoro Timoteo pi niliewo umego ku nyimego mi cokiri ma tung’ tung’ man pi nitielo cwinygi.

Paulo uwacu ni Timoteo kumae: ‘Dhanu ma gibemito gitim ni Yehova jubinyayu ragedo i kumgi.’ Jugam junyayu ragedo i kum Timoteo man jutwiye pi yiyoyic pare. Ento ebino kud anyong’a pilembe ragedo maeno umiyo ire kaka mi nyutho ni Yehova nia ebegwoko bedoleng’ pare ire.

Paulo uyero ni Jukristu mi Filipi kumae: ‘Abeoro Timoteo i beng’wu. Ebinyutho iwu lembe ma wutim kara wuwothi i lemandha man ebiponjowu ku bodho mi rweyo lembanyong’a.’ Paulo ung’eyo nia Timoteo tie ng’atu ma jugeno. Pirang’o? Pilembe gibino jurimo man gitimo tic pa Mungu karacelo pi oro ma dupa.