Jutero Paulo i Roma

Paulo ujigo woth pare mir adek mi tic mi rweyo lembanyong’a i Yeruzalem. Kuca, juwok jutwiye man jubole i kol. I gin ma wok i wang’ moko m’eneno ku diewor, Yesu uyero ire kumae: ‘Ibicidho i Roma man ibirweyo lembanyong’a kuca.’ Jugam juting’o Paulo kud i Yeruzalem jutere i Kaisaria; kuca ewok etimo oro ario i kol. Kinde ma Paulo ubino i wang’ kom mi pokolembe p’ubimo Festo, eyero kumae: ‘Abemito Kaisari re m’ucidh upok lembe para i Roma.’ Festo uyero ire kumae: “Calu m’ikwayu icidh ipid i wang’ Kaisari, ibicidho i wang’ Kaisari.” Juketho Paulo i meli man jutere i Roma; umego mange ario, niwacu Luka gikud Aristarko, de gicidho gikugi.

Kinde ma gin’i wi nam, avuvu ma tek ugam utuk i wigi man ekoto pi nindo ma dupa. Dhanu ceke ma gin’i meli giparu nia gibecitho. Ento Paulo uyero igi kumae: ‘Jurimona, malaika moko uyero ira i lek kumae: “Lworo kud unegi, Paulo. Ibitundo i Roma, man dhanu ceke ma wubedo kugi i meli bibedo museme.” Cwinywu bed tek, watho ngo.’

Avuvu maeno ukoto pi nindo 14. I ng’eye, gigam gineno ng’om moko. Ebino cula mi Maltha. Kinde ma gidhingo nyiko, meli ugudo ng’om man eng’eny dra, ento dhanu ceke m’ubino i iye giboth. Gibino dhanu 276. Jumoko ukwang’ nitundo i dhu wat, ento jumange umoko i kum dund bau. Dhanu mi Maltha uwok ugwokogi man gipangu igi mac kara gioy.

Dwi adek i ng’eye, juaskari giketho Paulo i meli mange man gicidho kude i Roma. Kinde ma gitundo kuca, umego gibin gijole. Saa ma Paulo unenogi, edwoko foyofoc ni Yehova man amora udwogo i kume. Kadok nwang’u i saa maeno fodi jung’olo ngo lembe pa Paulo nia etie agonya de, re juyiyo ire nia ebed i ot m’ebino pangu man jaaskari moko ubed ukure keca. Ebedo i ot maeno pi oro ario. Dhanu ubed ubin unene man ebed erweyo igi lembanyong’a mi Ker pa Mungu man eponjogi ku lembe iwi Yesu. I saa maeno, Paulo ukiewo bende barua ni cokiri ma dupa mir Azia ma nok man mi Yudea. Yehova utiyo ku Paulo lee mandha pi nirweyo lembanyong’a ni dhanu mi thek ma tung’ tung’.