PONJI MI 01

Biblia copo konyi nenedi?

Ma juwodho iwi karatasi

Wan ceke wabed wapenjara ku penji dupa iwi kwo mwa, iwi can, iwi tho, man iwi nindo m’ubino. M’umedo maeno, wabed wadieng’ bende iwi kwo mwa ma kubang’ ceng’, calu ve kite ma waromo nwang’u ko sente mi pong’o yeny mwa, kunoke ayi ma waromo nwang’u ko anyong’a i ot mwa. Dhanu ma dupa ginwang’u nia Biblia ubetuc nidwoko wang’ penji ma dongo dongo mi kwo migi, man ebemiyo igi bende juk ma beco m’ubekonyogi kubang’ nindo. Wan ceke Biblia copo konyowa.

1. Biblia udwoko wang’ penji moko ma kani?

Biblia udwoko wang’ penji moko ma pigi tek ma e: Piny ceke ma wabeneno e uai kani? Pirang’o wabekwo iwi ng’omi? Pirang’o dhanu besendiri? Ka ng’atini utho, edoko nenedi man ecidho kani? Pirang’o lwiny usagu thorukeni ma ke dhanu zoo ubeyenyo kwiyocwinyi? Lembang’o ma binwang’u ng’om i nindo m’ubino? Biblia udaru dwoko wang’ penji maeno i ayi ma cuu ni dhanu dupa dit man in de itie agonya nipenjo penjinegi, e ebidwoko wang’gi iri bende.

2. Biblia copo konyi nenedi kara inwang’ anyong’a i kwo peri ma kubang’ ceng’?

Biblia upong’ ku juk dupa ma beco. Ku lapor, etie ku ponji dupa ma romo konyo juruot kara gikwo kud anyong’a. Eromo konyowa bende kara wanyeg kud adieng’acwiny mwa man kara wamar tic mwa. Kinde ma wabemedara niponjo buku maeni karacelo, ibing’eyo nok nok gin ma Biblia ubeponjo iwi lembe maeni man iwi mange dupa. E ibinyang’ nia karaman andha “Lembagora ceke (niwacu lembe ceke ma nwang’ere i Biblia) . . . konyne nuti.”—2 Timoteo 3:16.

Girasoma maeni ubewilo ngo Biblia awila ento ebecweli niponjo Biblia in giri. Pieno wakweyi nia iwoth somo verse ma tung’ tung’ ma jumiyo i iye, man iwoth poro lembe mi igi ku gin m’ibeponjo.

MED NYANG’ PERI

Wakenen kite ma Biblia utuc nikonyo ko dhanu mange, kite m’iromo nwang’u ko anyong’a kinde m’ibesome, man pirang’o etie ber nia iketh jukonyi kara inyang’ i iye.

3. Biblia copo telo wiwa

Biblia tie ve thala m’ulero ma tar. Wacopo tiyo kude pi ning’eyo kite ma waromo maku ko yub ma beco man pi ning’eyo lembe ma bitimere i nindo m’ubino.

Som Zaburi 119:105, man i ng’eye wuwec iwi penji m’ulubo e:

Jagor Zaburi maeni ubino neno Biblia nenedi?
In ke paru peri tie ang’o iwi Biblia?

Ng’atu moko bewotho iwi kidi i dhu nam, man ekilo torsi ebemenyo ko the tiende.

4. Biblia copo dwoko wang’ penji mwa

Biblia udwoko wang’ penji m’ubino sendo dhaku moko pi oro ma dupa. Nen VIDEO man i ng’eye wuwec iwi penji m’ulubo e:

VIDEO: Kud ibai genogen peri ki! (1:48)

I video ma waai waneno, dhaku maeno ubed upenjere ku kit penji ma kani?
Ponjo Biblia ukonye nenedi?

Biblia ubetielo cwinywa nia wabed wapenj penji. Som Matayo 7:7, man i ng’eye wuwec iwi penji m’ulubo e:

Itie ku penji ma kani m’ibemito Biblia udwok wang’e?

5. Icopo maru nisomo Biblia

Dhanu ma pol gibed gimaru somo Biblia man gibenwang’u kony i kum somne. Nen VIDEO, man i ng’eye wuwec iwi penji m’ulubo e:

VIDEO: Somo Biblia (2:05)

Aradu ma waai waneno i video maeni gilar gibino ku paru ma kani iwi somo pinyi?
Kadok nwang’u gimaru ngo somo piny, pirang’o gilund gimaru somo Biblia?

Biblia copo miyo iwa ponji ma juko cwinywa man ma miyo iwa genogen. Som Jurumi 15:4, man i ng’eye wuwec iwi penji m’ulubo e:

Nyo imaru ing’ey lembe lee iwi jukojuk man iwi genogen ma juweco pire i verse maeni?

6. Jumange giromo konyowa kara wanyang’ i Biblia

M’umedo somo Biblia gijo, dhanu ma pol ginwang’u nia nibenyamu iye karacelo ku jumange bende konyo magwei. Som Tic mi Jukwenda 8:26-31, man i ng’eye wuwec iwi penji m’ulubo e:

Wacopo timo ang’o kara wanyang’ i Biblia?—Nen verse mi 30 ku 31.

Cal: 1. Filipo ma jayer lembanyong’a ubekoro i Lembagora ni Jaethiopia. 2. Jamulembe pa Yehova moko beponjo Biblia ku dhaku moko m’utie kud awiya ario. — Jaethiopia ubino ku yeny mi kony kara enyang’ cuu i Lembagora. Tin bende dhanu ma dupa gicuku nwang’u nia etie ber niweco iwi lembe mi Biblia karacelo ku dhanu mange

DHANU MOKO BEYERO KUMAE: “Ponjo Biblia tie nyotho saa.”

In ke icopo yero ang’o? Pirang’o iyero kumeno?

I ADUNDO

Biblia tie ku juk ma romo konyowa i kwo mwa ma kubang’ ceng’, ecopo dwoko wang’ penji ma tung’ tung’ m’ubedieng’o cwinywa, man ecopo miyo iwa jukojuk ku genogen.