PONJI MI 29

Ka watho, wadoko nenedi?

Ma juwodho iwi karatasi

Nyo ng’atu moko m’imaru lee udaru tho de? I saa maeno mi litho ma lee, icopo caku penjiri kumae: ‘Ka watho, wadoko nenedi man wacidho kani? Nyo nindo moko wabidonen kendo ku wedi mwa ma githo de?’ I ponji maeni ku m’ubelubo, wabineno kite ma Biblia udwoko ko wang’ penji maeno i ayi ma juko cwiny.

1. Ka watho, wadoko nenedi?

Yesu uporo tho ku nindo ma pek. Pirang’o? Nyo tho urombo andha ku nindo? Eyo. Ng’atu m’unindo nindo ma pek copo ng’eyo ngo gin moko acel de m’ubetimere i ng’ete. Kumeno bende, ka ng’atini utho, eng’eyo gin moko ngo: ewinjo ngo litho, esendere ngo, man esendo de ngo ju ma kwo. Biblia uyero nia “ju m’utho ging’eyo gin moko ngo.”—Som Eklizia 9:5.

2. Bero ma kani ma wacopo nwang’u ka wang’eyo lemandha iwi ju m’utho?

Dhanu ma pol gilworo tho man gilworo kadok ju m’utho. Ento lembe ma Biblia uponjo iwi ju m’utho copo juko cwinyi. Yesu uyero kumae: “Lemandha bigonyowu.” (Yohana 8:32) Jurudini moko giponjo nia ka ng’atini utho, piny moko nuti i kume ma medere asu nikwo. Ento Biblia uyero ngo kumeno. Eno nyutho nia ka ng’atini tho, esendere ngo. Bende, calu ju m’utho ging’eyo ngo gin moko, giromo sendowa de ngo. Pieno wacikara ngo nimiyo igi piny, kunoke niworogi, kadi nirwo igi.

Dhanu moko wacu nia gicopo weco ku ju m’utho. Ento eno tie lembe ma copere ngo. Pirang’o? Calu ma waai waponjo, ju m’utho “ging’eyo gin moko ngo.” Pieno, dhanu ceke ma giparu nia giweco ku wedi migi m’utho, i andha eca gibeweco ku pajogi ma gikethiri gin gigi kaka dhanu m’uthone. Dong’ ning’eyo lemandha iwi ju m’utho gwokowa i kum pajogi eno. Yehova ucimo wang’wa i kum timo mi weco ku ju m’utho, pilembe eng’eyo nia eca wabeweco ku pajogi, man nia lembe maeno copo nyayu peko i kumwa.—Som Poi mi Cik 18:10-12.

MED NYANG’ PERI

Wakenen kawoni lembe mange ma Biblia ubeponjo iwi tho, man lembe ma bitielo yiyoyic peri i Yehova, kum etie Mungu ma jamer man esendo ngo ju m’utho.

Jalwo moko ubedo iwi kom karacelo kud awiya pare ario, i saa mi ponji mi kuny pa dhaku pare. Jurimbe karacelo ku wedi pare gibino juko cwinygi.

3. Lemandha iwi ju m’utho

I wang’ ng’om zoo, dhanu giyiyo lembe ma tung’ tung’ iwi kite ma wadoko ko ka watho. Re i andha, lembe ma giyiyone ceke utie ngo lemandha.

Kaka m’ibekwo i iye, dhanu giyiyo nia wadoko nenedi ka watho?

Pi ning’eyo gin ma Biblia ubeponjo iwi lembe maeno, nen VIDEO.

VIDEO: Nyo ju m’utho ging’eyo lembe moko de?—Thenge (1:19)

Cal: Cal mi video ‘Nyo ju m’utho ging’eyo lembe moko de?’—Thenge.’ 1. Avu uvuto iwi kavuto mi odiyath. 2. Nindo ukwalu jalwo moko m’ubedo i diere mi dhanu ario kinde ma giberingo ku train (garimos).

Som Eklizia 3:20, man i ng’eye wuwec iwi penji m’ulubo e:

Nimakere ku verse maeni, ka ng’atini utho, edoko nenedi?
Nyo verse maeni uyero nia gin moko nuti i kum dhanu ma medere asu nikwo ka ng’atini utho?

Biblia ukoro iwa pi tho pa Lazaru m’ubino jarimo ma ceng’ini pa Yesu. Kinde m’ibesomo Yohana 11:11-14, kenen lembe ma Yesu uyero iwi kite ma Lazaru ubino ko kinde m’etho. I ng’eye, wuwec iwi penji m’ulubo e:

Yesu uporo tho kud ang’o?
Lembuno ubenyutho nia ka watho wadoko nenedi?
Ibeparu nia lembe ma Biblia ukoro iwi tho utie lemandha?

4. Bero mi ng’eyo lemandha iwi tho

Ning’eyo lemandha iwi tho ketho walworo ngo ju m’utho. Som Eklizia 9:10, man i ng’eye wuwec iwi penji m’ulubo e:

Nyo ju m’utho giromo sendowa de?

Ka wayiyo lemandha ma Biblia ubeponjo iwi ju m’utho, wabiyiyo ngo vupo ma nia jucikiri nimiyo igi piny pi ninyayu mutoro i igi kunoke nia juworgi. Som Isaya 8:19 man Lembanyutha 4:11, man i ng’eye wuwec iwi penji m’ulubo e:

Ibeparu nia Yehova winjere nenedi ka ng’atini ubeworo ju m’utho kunoke ubesayu kony moko i bang’gi?

Cal: Timo mi woro kwarujo m’utho. 1. Jalwo moko urum, eberwo i wang’ kabuli man ebethiero cam ni ng’atu m’utho. 2. Jumaco moko adek gibemielo miel mi suru. 3. Miel mi dhanu m’ukendo piny ma tung’ tung’ m’uumo wang’gi zoo. — Ning’eyo lemandha iwi ju m’utho gonyowa kud i kura man lembe ceke ma foyo ngo i Yehova

5. Ning’eyo lemandha iwi ju m’utho juko cwinywa

Dhanu ma pol juponjogi nia ka githo, gibisendiri pi lembe ma reco ma gilar gitimo i kwo migi. Ento lembe ma juko cwinywa utie ning’eyo nia ng’atu moko mbe ma sendere i ng’ei tho, kadok ng’atu m’ubed utimo lembe ma reco magwei de. Som Jurumi 6:7, man i ng’eye wuwec iwi penji m’ulubo e:

Calu ma wasomo i Biblia nia ka ng’atini utho dubo pare udaru wekere, nyo ibeparu nia andha jucopo sende asu pi lembe ma reco m’elar etimo?

Ka wabemedara ning’eyo Yehova, wabinyang’ cuu nia etie Mungu ma copo sendo ngo ju m’utho nyanok de. Parune de romo bino ngo i wiye. Som Poi mi Cik 32:4 man 1 Yohana 4:8, man i ng’eye wuwec iwi penji m’ulubo e:

Nimakere ku lembe ma giragora maeni ukoro iwi Mungu, nyo andha eromo yiyo nia ju m’utho gisendiri? Kekor.
Nyo inwang’u nia lemandha ma Biblia ubeponjo iwi ju m’utho copo juko cwinyjo andha? Pirang’o iyero kumeno?

DHANU MOKO BEYERO KUMAE: “Cwinya ubepido nia kan atho abicidho kaka mi masendi.”

Icopo tiyo ku verse ma kani pi nijuko cwinye?

I ADUNDO

Ka ng’atini tho, kwo pare jik man eng’eyo gin moko ngo. Ju m’utho gisendiri ngo, man gin de gisendo ngo ju ma kwo.

Penji mi poyowic

Ka watho, wadoko nenedi?
Ning’eyo lemandha iwi ju m’utho utie iwa ku bero ma kani?
Ning’eyo lemandha iwi ju m’utho juko cwinywa nenedi?

Nindo ma ponji maeni uthum i iye:

Lembe m’ukwayu itim

Tim kero imak ku wii giragora moko acel mi ponji maeni ma romo konyi nikoro kite ma wadoko ko ka watho.

Lembe mange:

Your other goal

TIM SAYUSAC

Nimakere ku Biblia, thelembe mi wec ma nia “ng’eyong’ec” utie ang’o i andha? Kenen.

“Ng’eyong’ec tie ang’o?” (Thiwiwec mi jw.org)

Nyo Mungu bebolo judubo i mac ma kuthumi? Kenen.

Nyo mac ma kuthum utie andha? (3:07)

Nyo wacikara nilworo ju m’utho?

Tipo ju m’utho—Nyo gicopo konyi kunoke gicopo timi raci? Nyo gitie andha? (nyathibuku, mi français)

Kenen ayi ma jalwo moko unwang’u ko jukocwiny kinde m’eponjo lemandha iwi kite ma wadoko ko ka watho.

“Iya wang’ lii i kum dwokowang’ lembe ma terere man ma piemere ngo mi Biblia” (Otkur ma Wiw, nindo 1, dwi mir 2, 2015)