PONJI MI 42
Biblia uyero lembang’o iwi bedo jamusuma man iwi gamiri?
I suru moko, dhanu beparu nia ng’atini romo kwo ngo kud anyong’a kan etie jamusuma. Re ju m’ugamiri ceke ngo re m’ubekwo kud anyong’a, man jumusuma ceke ngo re ma gikoso anyong’a. I andha, Biblia unyutho nia lembe ario zoo tie giramiya ma ber dit m’uai i bang’ Yehova.
1. Bedo jamusuma utie ku bero moko ma kani?
Biblia uyero kumae: “ng’atu m’ugamu kunoke m’ugiero utimo ber, ento ng’atu m’ugamu ngo kunoke m’ugiero ngo utimo ber ma sagu.” (Som 1 Jukorintho 7:32, 33, 38.) Pirang’o jumusuma “utimo ber ma sagu”? Pilembe gimbe ku yeny mi timo kero pi nipong’o yeny mi judhoggi mi gamiri. Uketho wang’ ma pol gitie agonya nisagu. Pieno jumoko ubenwang’u saa mi timo tic pa Yehova lee. Ku lapor, jumoko gibedok i kabedo mange pi nirweyo lembanyong’a kuca. M’usagu zoo, gicopo nwang’u saa lee mi twiyo mer ma ceng’ini ku Yehova.
2. Nigamiri calku cik utie ku bero moko ma kani?
Gamiri bende tie ku bero ma pare. Biblia uyero nia “juario sagu ng’atu acel.” (Eklizia 4:9) Eno tie lemandha asagane pi Jukristu ma gibetiyo ku cik mi Biblia i gamiri migi. Juario m’ugamiri calku cik ging’olo nia gibimariri, gibiworiri man gibigwokiri. Pieno wang’ ma pol gibedo ngo lingo lingo i gamiri migi, ento gikwo ma cwinygi tek nisagu ju m’ugamiri ngo calku cik. M’umedo maeno, ka nico ku dhaku gigamiri calku cik, kadok awiya migi de gikwo ma cwinygi tek i otne.
3. Paru pa Yehova tie ang’o iwi gamiri?
Kinde ma Yehova uribo dhanu ario i gamiri ma kwong’a, eyero kumae: “Nico biweko won ku min, man ebimoko [i] kum cege.” (Thangambere 2:24) Yehova ubemito nia nico giku dhaku pare gimariri man gibed kwa karacelo m’umbe nipoko kindgi ka fodi gitie kwo ci. Re eyiyo nia nico giku dhaku pare giromo lalu gamiri migi, kende kende ka ng’atu acel utimo abor. Saa maeno, Yehova umiyo twero ni ng’atu m’ukoso ngo, m’ecopo ng’iyo ko nilalu gamirine kan emaru.a (Matayo 19:9) Yehova uyiyo ngo nia Jukristu gigam kunoke gigom adhura.—1 Timoteo 3:2.
MED NYANG’ PERI
Wakenen kawoni gin m’iromo timo kara ikwo kud anyong’a man inyay bende anyong’a i i Yehova, nik’ibed jamusuma kunoke ngo.
4. Tii ma ber ku giramiya peri mi musuma
Yesu ubed uneno musuma pare ni giramiya ma pire tek. (Matayo 19:11, 12) Som Matayo 4:23, man i ng’eye wuwec iwi penji m’ulubo e:
Yesu utiyo nenedi ku musuma pare i tic pa Won man pi nikonyo dhanu mange?
Jukristu ma jumusuma bende giromo nwang’u anyong’a tek gibetiyo ku musuma migi calu ma Yesu utiyo ko. Nen VIDEO, man i ng’eye wuwec iwi penji m’ulubo e:
Jukristu ma jumusuma gicopo tiyo ku musuma migi i yo moko ma kani ma beco?
Nyo ing’eyo?
Biblia ung’olo ngo wend oro ma tap ma ng’atini ucikere nigamu kunoke nigiero i iye. Re, ebemiyo juk ni ng’atu m’aradu nia ukeucir nituc ‘m’ekadh ko nindo mir ayada,’ niwacu oro ma ng’atini bedo i iye kud ava ma lee dit mi timo ribiri, pilembe ava maeno m’akeca copo ketho ng’atini timo ngo ng’iyong’ic moko ma cuu.—1 Jukorintho 7:36.
5. Lond jadhogi mi gamiri ku rieko
Ning’iyo ng’atu ma bibedo jadhogi mi gamiri utie ng’iyong’ic ma pire tek lee mandha i kwo peri. Som Matayo 19:4-6, 9, man i ng’eye wuwec iwi penji m’ulubo e:
I wang’ nigamu dhaku kunoke nigiero, pirang’o Jakristu ucikere nilar paru i lembe cuu?
Biblia copo konyi ning’eyo kura ma beco m’ukwayu iyeny i bang’ jadhogi mi gamiri. Re lembe ma pire tek nisagu zoo utie niyenyo nico kunoke dhaku m’umaru Yehova ku cwinye ceke.b Som 1 Jukorintho 7:39 man 2 Jukorintho 6:14. I ng’eye, wuwec iwi penji m’ulubo e:
Pirang’o wacikara nigamu kunoke nigomo kende kende Jakristu wadwa?
Iparu Yehova copo winjere nenedi tekene wagamu kunoke wagiero ng’atu m’ubetimo ngo ire?
Ka jutwiyo lei ario m’ukoc lee nia giwoth karacelo, gibisendiri lee. Kumeno bende, Jakristu m’ugamu kunoke m’ugiero Jakristu wadi ngo binwang’u peko dupa i gamirine
6. Bed ku paru ma rom ku pa Yehova iwi gamiri
I Israel ma con, co moko ubed uriemo mon migi pi thelembe m’atira ngo. Som Malaki 2:13, 14, 16, man i ng’eye wuwec iwi penji m’ulubo e:
Pirang’o Yehova udagu ka jubelalu gamiri pi thelembe moko ma Biblia ucwaku ngo?
Timo abor man lalu gamiri nyayu can ma lee i kum jadhu nyom m’ukoso ngo man i kum awiya bende
Nen VIDEO, man i ng’eye wuwec iwi penji m’ulubo e:
Tekene jadhogi mi gamiri utie ngo Jamulembe pa Yehova, icopo timo ang’o kara gamiri perine ubed kud anyong’a man ecungi ma teki?
7. Wor cik ma Yehova umiyo pi gamiri
Ecopo bedo lembe ma yot ungo niworo cik ma Yehova umiyo pi gamiri.c Ento ng’ey nia Yehova poko mugisa iwi dhanu m’ubeii nitimo kumeno. Nen VIDEO.
Som Juebrania 13:4, man i ng’eye wuwec iwi penji m’ulubo e:
Iparu nia cik ma Yehova uketho iwi gamiri utie pek kunoke ngo? Pirang’o iparu kumeno?
Jukristu gicikiri nikiewo pi gamiri migi kunoke pi lalu gamiri migi i wang’ Leta pilembe i ng’om ma pol, cik pa gavmenti ukwayu kumeno. Som Tito 3:1, man i ng’eye wuwec iwi penji m’ulubo e:
Kan itie ku dhaku kunoke nico, nyo andha wudaru kiewo pi gamiri mwune i wang’ Leta calu ma cik ubekwayu?
NG’ATU MOKO ROMO PENJI KUMAE: “Pirang’o ubekwayu nigamiri calku cik ngi? Nyo nikwo karacelo ci uromo ngo?”
Icopo dwoko nenedi?
I ADUNDO
Bedo jamusuma man nigamiri, ceke tie giramiya ma cuu dit m’uai i bang’ Yehova. Lembe ario eno zoo copo miyo anyong’a ka wabekwo nimakere ku yeny pa Yehova.
Penji mi poyowic
Ng’atini copo tiyo nenedi ma ber ku musuma pare?
Pirang’o Biblia ukwayu nia wagamara kende kende i Rwothi?
Biblia uyiyo nia juromo lalu gamiri pi thelembe acel kende ma kani?
TIM SAYUSAC
Nigamiri kende kende “i Rwoth” thelembene tie ang’o?
“Penji mi jusom” (Otkur ma Wiw, nindo 1, dwi mir 7, 2004)
Nen video m’uweco pi lembe moko adek ma copo konyi kara imak yub ma cuu iwi ng’atu m’ibemito nigemiri kude man iwi nyom.
Nen thelembe m’uketho umego moko unwang’u nia gin ma Yehova umiyo ire usagu bor dit piny ceke m’etuc niweko.
Lembang’o ma ng’atini ucikere ning’iyo iye cuu i wang’ nimaku yub mi lalu gamiri kunoke mi pokere ku jadhoge mi gamiri pi nindo moko?
“Yung ‘gin ma Mungu ribo karacelo’” (Otkur ma Wiw, dwi mir 12, 2018)
a Pi lembe m’uneno pokiri ma nico ku dhaku gipoko ko kindgi pi nindo moko ma ke ng’atu moko mbe m’utimo abor, nen Thenge ma jumedo, mir 4.
b I suru moko, junyodo re ma ng’iyo dhaku kunoke nico ni nyathin migi. Kadok i suru ma kumeno de, junyodo ma jumer gicikiri ngo nineno ku kwong’a sente kunoke gin mange i bang’ ng’atu ma gibeng’iyone, ento gicikiri nineno mi kwong’o zoo ka nyo ng’atune umaru Yehova kunoke ngo.
c Tekene ibekwo ku dhaku kunoke nico moko ma wugemuru ngo kude calu ma cik ubekwayu, in re m’iromo ng’iyo niweke kunoke nigemiri kude dong’ ma zoo i yo m’atira.