Nwang’ ponji niai kud i Lembe pa Mungu
Lembang’o ma bitimere i nindo mi pokolembe?
Thiwiwec m’eni utie ku penji ma saa moko nyo idaru penjiri ko man enyutho kaka ma wang’e udwokere i iye i Biblia peri. Jumulembe pa Yehova gibibedo kud anyong’a nikonyi kara inwang’ dwoko wang’gi karacelo kugi.
1. Nindo mi pokolembe tie ang’o?
Calu ma cal mir acwic ubenyutho, dhanu dupa beparu nia i nindo mi pokolembe bilioni mi dhanu bicungo i wang’ Komker pa Mungu kara ginwang’ pokolembe nimakere ku lembe ma gitimo i wang’ tho migi—jumoko pi ninwang’u mugisa man kwo i polo, jumange ke pi nisendiri i mac ma kuthum. Ento, Biblia ulund unyutho nia lembakeca mi Nindo mi pokolembe tie nibodho dhanu kud i masendi. (Zaburi 96:13) Mungu udaru ng’iyo Yesu pi nimiyo kwiyocwiny ni kodhi dhanu.—Som Isaya 11:1-5; Tic mi Jukwenda 17:31.
2. Nindo mi pokolembe bikelo bedopwe nenedi?
Kinde ma ng’atu ma kwong’a, Adamu, ujai ni Mungu mir aka, ewayu nyikwaye ceke i dubo, masendi man tho. (Jurumi 5:12) Pi nidaru lembuno, Yesu bicero dhanu bilioni ma githo. Buku mi Lembanyutha ukoro nia lembuno bitimere i kind oro elufu acel (1 000) ma Yesu bibimo i iye.—Som Lembanyutha 20:4, 11, 12.
Jubipoko lembe iwi jum’ucer, ungo nimakere ku lembe ma gitimo i wang’ tho migi, ento nimakere ku lembe ma gitimo nicaku ma lembe ma nwang’ere i “kithabu m’adola” ma buku mi Lembanyutha thek mi 20 uweco pire biwok. (Jurumi 6:7) Jakwenda Paulo uyero nia dhanu ma bicer man ma binwang’u kaka mi ponjo lembe iwi Mungu, bibedo “weg bedopwe ku weg bedopwe ngo de.”—Som Tic mi Jukwenda 24:15.
3. Nindo mi pokolembe bipong’o lembang’o?
Dhanu ma githo ma re ginwang’u ngo kaka mi ng’eyo Yehova Mungu man mi timo ire; gidonwang’u kare mi wilo kura migi man timo migi. Tek gitimo lembe ma beco, gibicer “cer mi kwo.” M’umbe jiji, jumoko ma bicer bimaru ngo niponjo lembe iwi Yehova. Cer migi bibedo “cer mi pokolembe.”—Som Yohana 5:28, 29; Isaya 26:10; 65:20.
I thum mi oro elufu acel (1 000) ma nindo mi pokolembe biting’o, Yehova bimiyo leng’kum ni kodhi dhanu ceke ma wor tap calu m’elar epangu i acaki. (1 Jukorintho 15:24-28) Ebibedo anyong’a ma yawe mbe ni dhanu ceke ma wor. I amulaic ma tokcen, Mungu bigonyo Sitani Wonabali kud i kol pare, kaka ma nang’u jutwiye i iye pi oro elufu acel (1 000). Sitani bi ii kendo niwingo wi dhanu pa Yehova, ento ju ma bijai ire gibikwo rondo ku rondo kud anyong’a iwi ng’om.—Som Isaya 25:8; Lembanyutha 20:7-9.
4. Nindo mange ma kani mi pokolembe ma bimiyo bero ni dhanu?
Biblia tiyo bende ku wec ma nia “nindo mi pokolembe” pi niweco iwi lembe ma bitero ng’om maeni i ajikine. Nindo maeno mi pokolembe bitundo mbwang’ tap calu pii ma dit mi rundi pa Noa, m’ukabu judubo ceke cen. Lembe ma ber tie nia, nyoth ma dit mi “dhanu ma woro ngo Mungu” biyabu yo ni thek mi ng’om ma nyen ma i iye “bedopwe bibedo nuti.”—Som 2 Pethro 3:6, 7, 13.