Nyo Jumulembe pa Yehova gibed giweko mon de uponji?

Eyo, i kind Jumulembe pa Yehova junwang’u mon milioni dupa ma gijurwey lembanyong’a i wang’ ng’om zoo. Gitie udul ma dit mi jurwey lembanyong’a mi Ker pa Mungu. Zaburi 68:11 uewo pi mon maeno ma jurwey lembanyong’a kumae: “Rwoth mio lembe: Mon m’urweyo rwonglembe gin udul ma dit.”

Ento, ukwayu ngo wapor lembanyong’a ma mon ma gitie Jumulembe pa Yehova girweyo ku tic mi ponji ma mon mi dini mange timo. Tung’ tung’ ma lee dit m’utie i kindgi. Dong’ gikoc nenedi ke?

Dhanu ma giponjo igi lembe ukoc. Mon mi dini mange gitie ku rwom mi telo wi dhanu i kanisa migi, man ju ma pol m’i kind dhanu ma giponjo igi lembe utie de dhanu ma rom mi dini migine. Ento mon ma gitie Jumulembe pa Yehova, girweyo lembanyong’a ni dhanu ma woko, niwacu dhanu ma gitie ngo Jumulembe pa Yehova. Ginwang’u dhanune kinde ma giberweyo ot kubang’ ot kunoke i ayi mange.

Gin mange m’uketho mon ma gitie Jumulembe pa Yehova gikoc ku mon m’i dini mange utie tic ma gitimo i cokiri. Mon mi dini ma giwacu nia gin de gi Jukristu ku m’i dini mange, gitelo wi dhanu m’i dini migi man giponjogi ku lembe mi dinine. Mon ma gitie Jumulembe pa Yehova ke lundo, giponjo ngo dhanu i cokiri migi tek ng’atu moko ma nico m’udaru limo batizo unuti keca. Ju ma co ma jung’iyogi nia giponj lembe kende re ma copo ponjo dhanu.​—1 Timoteo 3:2; Yakobo 3:1.

Biblia unyutho nia ju ma co kende re ma jumiyo igi rwom mi telo wi cokiri. Jakwenda Paulo ukiewo wec ma e ni Tito ma tie jadit cokiri wadi, ewacu ire kumae: “Aweki i Krete kara . . . iketh judong cokiri kubang’ adhuraman.” Paulo umedo nia ukwayu nico ma jung’iyo nibedo jadit cokiri ubed “ng’atu m’adote mbe i wiye, cwar dhaku acel.” (Tito 1:5, 6) I baruwa ma Paulo ukiewo ni Timoteo, emiyo ire bende telowic ma rom eno; eyero kumae: “Tek ng’atu moko ubeyenyo edok jadit cokiri, nwang’u ebeyenyo tic ma ber. Pieno, jadit cokiri ucikere nibedo ng’atu m’adote mbe i wiye, cwar dhaku acel, . . . jabodho mi ponji.”​—1 Timoteo 3:1, 2.

Pirang’o jumiyo rwom mi telowic i cokiri ni ju ma co kende? Paulo uyero kumae: “Abemiyo ngo kaka ni dhaku nia eponj ponji kunoke nia ebed ku dito iwi ng’atu ma nico, ento ecikere nibedo ling’. Kum ku kwong’a jular jucwiyo Adamu, kan i ng’eye jucwiyo Eva.” (1 Timoteo 2:12, 13) Pieno, kite ma Mungu ucwiyo ko cwic ubenyutho lembakeca pare i lembe m’uneno rwom mi ponji man mi telowic.

Jumulembe pa Yehova gibelubo lapor pa Jatelwic migi ma Yesu Kristu. Luka m’ubino acel m’i kind julub ukiewo kumae pi tic ma Yesu utimo: “Ecidho kubang’ adhura man kubang’ pacu m’eberweyo, man ebetwong’o pi lembanyong’a mi Ker pa Mungu.” I ng’eye, Yesu oro julubne gicidh gitim tic ma rom eno: “Gicidho man giwotho kubang’ pacu ma giberweyo lembanyong’a.”​—Luka 8:1; 9:2-6.

Tin Jumulembe pa Yehova ma co ku ma mon ceke gibedikiri kud amora pi nitimo tic ma Yesu ung’olo pire nia: “Lembanyong’a maeni mi Ker jubirweyo i ng’om zoo ni lembatuca ni thek ceke, e ajiki bilund wok.”​—Matayo 24:14.